राष्ट्रिय अनुसन्धान विभागका डीआईजी थापा र जोशी एआईजीमा बढुवा

थापा र जोशीको बढुवा नभएको भए दुवै जना आगामी भदौ दोस्रो साता ५ वर्षे पदावधिका कारण अवकाशमा जाने थिए । दुवै जना २०७४ भदौ १४ मा डीआईजीमा बढुवा भएका थिए । बढुवाका लागि थापा र जोशीसहित हरिहर पौडेल, सुनील ढकाल, टेकेन्द्र कार्की, सुमन वैद्यलगायत प्रतिस्पर्धामा थिए ।

वरीयता क्रममा क्रमश: पहिलो र दोस्रो नम्बरमा रहेका थापा र जोशीलाई एआईजीमा पनि सोही वरीयतामा बढुवा गरिएको छ । यससँगै थापा र जोशी मध्येबाट आगामी भदौ २९ गते एक जनाले विभागको नेतृत्व सम्हाल्ने छन् ।

विभागका प्रमुख यदुलाल खरेल ५८ वर्षे सेवाअवधिका कारण भदौ २८ गतेबाट अनिवार्य अवकाशमा जाने छन् । त्यसपछि रिक्त पदमा थापा र जोशीमध्येबाट एक जनाको बढुवा हुनेछ । यसअघि विभागमा एआईजी सरहको पद एउटामात्रै थियो । थप एउटा दरबन्दी बढाएर थापा र जोशीलाई एकैचोटी एआईजीमा बढुवा गरिएको छ ।

एआईजीको दरबन्दी थप्नकै लागि केही दिनअघि मात्रै विभागको संगठन तथा व्यवस्थापन (ओएण्डएम) संशोधन गरेर एआईजीको संख्या २ पुर्‍याइएको थियो । यसअघि केपी शर्मा ओली प्रधानमन्त्री भएका बेला दुई एआईजीको संख्या घटाएर एकमा झारिएको थियो । अघिल्लो सरकारको सो निर्णय संशोधन गरेर वर्तमान सरकारले पुन: एआईजीको संख्या बढाएको हो ।