जीवनका सहयात्री सहयोगी सामग्री

बालिका थपलिया

शरीरको कुनै पनि भागमा समस्या आएर आफ्नै अङ्गले काम गर्न नसक्ने भएपछि परिस्थितिलाई सहज बनाउन व्यक्तिपिच्छे कुनै न कुनै सामग्रीको आवश्यकता पर्छ ।

ती सामग्रीलाई सहयोगी सामग्री भनिन्छ । विभिन्न प्रकारका अपाङ्गता भएकाहरूको लागि सहायक सामग्रीहरूले महत्त्वपूर्ण भूमिका खेल्छन् । यिनीहरूले दैनिक जीवनका कठिनाइ समाधान गर्न सहयोग गर्छन् । अपाङ्गता नभएकाहरूले पनि अवस्थाअनुसार यस्ता सामग्रीहरू प्रयोग गर्न सक्छन् ।

दृष्टिविहीनले आफ्नो जीवनलाई केही सहज बनाउन सेतो छडी प्रयोग गर्न सक्छन् । यसलाई ट्याक—ट्याक बजाएपछि अगाडि अग्लो, होँचो, साँघुरो, फराकिलो अनि कोही आइरहेको छ कि भनी महसुस गर्न सक्छन् । उनीहरूले हिँड्ने विशेष खालको बाटोलाई ‘टेकटाइल’ भनिन्छ । यस्तो बाटो चिल्लो नभई भाग—भाग छुट्टिएको हुन्छ । सहरका कुनै—कुनै मेनरोडको छेउ फुटपाथमा यस्तो बाटो देख्न सकिन्छ । न्युन दृष्टि हुनेहरूले हेर्न सजिलो बनाउन म्याग्निफाइङ ग्लासको प्रयोग गर्न सक्छन् । कान कम्ती सुन्नेहरूले श्रवण यन्त्रको प्रयोग गर्न सक्छन् । यसलाई कानमा लगाएपछि अलिअलि सुन्न सक्छन् र सञ्चारको समस्या केहीमात्र भए पनि घट्छ । इसाराको सट्टामा दोहोरो कुरा गर्न सकिन्छ । 

Yamaha

उठेर ट्वाइलेटसम्म पनि जान नसक्नेहरूलाई ट्वाइलेट चेयरको सुविधा उपलब्ध गराउनसके जीवनयापनमा केही हदसम्म सरलता थपिन्छ । अग्लो ट्वाइलेट प्यानको पहुँच नभएका, घुँडा नखुम्चिने समस्या भएकाहरूका लागि पनि यो सामग्री लाभदायक सावित हुन्छ । मस्तिष्क पक्षाघात तथा मांसपेशी विचलन भएका बच्चाहरूले बस्न लगायत पढ्न र लेख्न सजिलोका लागि विशेष कुर्सीको सहयोग लिन सक्छन् । अन्य शारीरिक समस्यामा पनि यसले काम दिन्छ । त्यस्तै शरीरभन्दा उँधोको भाग चल्न नसक्ने समस्या हुनेहरूका लागि ह्विलचेयरले अग्रणी भूमिका खेल्छ । ह्विलचेयर विशेषगरी दुई प्रकारका हुन्छन् । एउटा हातले चलाएर गुडाउने, अर्को विद्युतीय शक्तिले गुड्ने । पक्षाघात भएको, मांसपेशीसँग सम्बन्धित समस्या भएको, खुट्टाको हड्डी भाँच्चिएको, नशासम्बन्धी समस्या, सन्तुलन अथवा हिँडडुल गर्न समस्या, लामो दूरी हिँड्न कठिन भएको अवस्थामा यसको प्रयोग गर्न सकिन्छ । 

तत्काल हुने चोटपटक, छोटो समयका लागि हुने चोटपटक, एउटा वा दुइटा खुट्टामा समस्या छ भने बैसाखीको प्रयोग गर्न सकिन्छ । बैसाखी पनि विभिन्न प्रकारका हुन्छन् । बाथरोगका बिरामीले पनि यसको सदुपयोग गर्न सक्छन् । कँुजोपन अथवा दुखाइको कारणले गर्दा हात, कुहिनो र नाडीका जोर्नीहरूको भार लिन नसक्ने अवस्थामा पनि हिँडडुल गर्न यसको सहयोग लिन सकिन्छ । अलिअलि हिँड्न सक्नेहरूलाई हिँडाइमा सन्तुलनमा राख्न तीनखुट्टे अथवा चारखुट्टे लठ्ठी प्रदान गर्न सकिन्छ । खुट्टामा अन्य समस्या भएकाहरूले विभिन्न प्रकारका विशेष जुत्ता लगाउन सक्छन् । खुट्टा लुला भएकाहरूले हिँड्न बनाइएका वाकर, वाकिङ फ्रेमजस्ता सामग्रीहरूलाई दैनिक जीवनमा सदुपयोग गर्न सक्छन् । बराबर लेभल भएको प्यारालाल बारको प्रयोगले पनि हिँड्ने बानीको विकास गर्न सहयोगी भूमिका खेल्छ । भर्खर जन्मिएका बच्चाहरूलाई हिँड्ने बानीको विकास गराउन वाकरको सहयोग लिने चलन बढिरहेको छ । यदि कुनै पनि व्यक्तिको एउटा खुट्टा छैन भने कृत्रिम खुट्टा पनि लगाउन सकिन्छ । हात छैन भने कृत्रिम हातको प्रयोग गर्न सकिन्छ । कुनै खुट्टा छोटो भएमा सुज राइजको (जुत्ताको उचाइ बढाउने) सहयोग लिँदा हिँडाइमा सन्तुलन मिल्छ र ढाड दुख्ने सम्भावना कम हुन्छ । 

सहायक सामग्रीहरू प्रयोग गर्ने निश्चित नियम हुन्छ । जथाभावी प्रयोग गर्‍यो भने समस्या बढ्छ । पहिला—पहिला काठका मात्र सामग्रीहरू पाइन्थे । ती चलाउन सजिला थिएनन् । तर अहिले धातु अथवा रबरका आधुनिक खालका, आवश्यक परेका बेला साइज घटाउन/बढाउन, होँचो/अग्लो बनाउन मिल्ने खालका हुन्छन् ।

यिनीहरूलाई प्रयोग गर्ने विधि जानेर मात्र चलाउनुपर्छ । नत्रभने शरीर अझ बढी असन्तुलित हुन्छ । समग्रमा सहायक सामग्रीहरूलाई जीवनको लागि सहयात्रीको रूपमा लिन सकिन्छ । फरक—फरक प्रकारका अपाङ्गताको लागि यिनीहरू दैनिक साथी बन्न पुगेका छन् । तर यिनीहरूबारे धेरैले जानकारी लिन पाएका छैनन् र साथसाथै सुविधा पनि भोग्न पाएका छैनन् ।  

प्रकाशित : माघ २०, २०७३ ०८:०८
ADVERTISEMENT
प्रतिक्रिया
पठाउनुहोस्
ADVERTISEMENT

विधेयक बहुमतले पारित भएसँगै बेलायतलाई ब्रेक्जिट प्रक्रियाका लागि ढोका खुल्यो

नवीन पोखरेल

लन्डन — बेलायत सरकारले पेस गरेको युरोपियन युनियनसँग बहिर्गमन प्रक्रिया (ब्रेक्जिट) गर्न प्रस्तुत गरेको विधेयक बेलायती संसदले बुधबार अत्याधिक बहुमतले पारित गरेको छ । विधेयकको पक्षमा ४९८ र विपक्षमा ११४ मत परेको थियो । यसले बेलायत सरकारले मार्च अन्तिमबाट सुरु गर्ने लक्ष्य राखेको ब्रेक्जिट प्रक्रियाका लागि आधिकारिक रुपमा ढोका खुलेको छ ।

प्रस्तुत उक्त विधेयकमाथि संसदमा दुई दिन चर्को बहस हुँदा प्रतिपक्षी लेबरका ४७, बेलायतको तेस्रो ठूलो स्कटिस नेशनल पार्टीका ५०, चौथो ठूलो पार्टी लिबरल डेमोक्रयाटका ७ सांसदसहित बाँकी अन्यले विपक्षमा मतदान गरेका थिए । स्कटिस नेशनल पार्टीले गरेको संशोधन पराजित भएको थियो । उक्त पार्टीले स्कटल्याण्डका बहुसंख्यक जनताले जनमत संग्रहमा यूके इयूमा रहनुपर्ने पक्षमा मत हालेकाले स्कटिस जनताले चाहेजस्तो छुट्टै इयूसँग सम्झौता हुनुपर्ने माग राख्दै आएको छ ।

गत जुनमा भएको जनमत संग्रहपछि धेरै उतारचढाव हुँदै गत साता सर्वोच्च अदालतले ब्रेक्जिट प्रक्रिया संसदले पारित गर्नुपर्ने फैसला गरेको थियो ।

ब्रेक्जिट मुद्दामा बेलायती समाज विभाजित रहँदै आएकाले सबैलाई मान्य हुने शर्तबाट इयू छोड्न बेलायत सरकारलाई ठूलो चुनौती छ । आफूले चाहेजस्तो शर्तमा इयू बहिर्गमन नभए बिना सम्झौता नै बेलायत इयूबाट बाहिरिने भन्ने बेलायती प्रधानमन्त्री टेरेजा मेको कडा उद्घोषले इयू समर्थकहरु आक्रोसित छन् ।


अमेरिकी राष्ट्रपति ट्रम्प, रसिया र इस्लामिक आतंकवाद नै इयूको ऐक्यबद्धताका लागि मुख्य चुनौती रहेको बताउँदै इयूले बेलायतले चाहेको मात्र सबै पूरा नहुने प्रतिक्रिया दिएको छ । रेस्टुरेन्टमा आफूले चाहेको खाना रोजे जस्तो ब्रेक्जिट वार्ता नहुने युरोपियन युनियनको स्पष्ट अडान छ ।

ब्रेक्जिटको खास अर्थ इयूसँग बेलायतको पारपाचुके हुने भएकाले आर्टिकल ५० निस्कने शुल्कको सम्झौता हो भन्ने विश्लेषकहरुको राय छ । युरोपियन युनियनसँग तोकिएको दुई वर्षको समयावधिपछि बेलायतले करिब ६० अर्ब पाउन्डको सम्बन्धविच्छेद बिल फछ्‍‍र्यौट गर्नुपर्ने अनुमान गरिएको छ ।

यसबीचमा इयूको कमन मार्केट, भन्सार संघ, ब्यापार सम्झौता, आप्रवासी नियम, असंख्य कानुनबीच चर्को मतभेद बेलायतमा छ । ब्रेक्जिट वार्ता सुरु भएपछि नै राजनीतिमा अनेक उतारचढाव हुने अनुमान एकथरिको छ ।

प्रकाशित : माघ २०, २०७३ ०८:०७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT