रिसइबी साध्ने नियत

सम्पादकीय

काठमाडौं — नेपाल–भारत सीमा दशगजामा खाँडो खोलाको मुहान बन्द हुने गरी भारतीय पक्षले गत वर्ष एकतर्फी बाँध बनाउन थालेपछि प्रतिरोध गरेका सप्तरी, कोइलाडी तिलाठी–२ का देवनारायण यादव छोरासहित सीमापारि भारतमा पक्राउ परेका छन् ।

भारतीय प्रहरीले आइतबार पक्राउ गरेका देवनारायण र उनका छोरा अजयलाई अपहरण तथा शरीर बन्धक मुद्दामा सोमबार जेल चलान गरिएको छ । भारतीय प्रहरीले जेजस्ता आरोप/बहानामा देवनारायण र अजयलाई पक्राउ गरे पनि गत वर्षको घटनाकै बदला लिन खोजेको देखिन्छ । गत वर्ष साउन १३ गते देवनारायणलगायत सीमावर्ती क्षेत्रका नेपालीले अवरोध गरेपछि भारतीय पक्ष बाँध निर्माणबाट पछि हट्नुपरेको थियो । अवरोध गर्ने क्रममा झडप हुँदा देवनारायण घाइते भएका थिए । त्यो घटनाले उनलाई राष्ट्रियस्तरमा चर्चितसमेत बनाएको थियो । सरकारले उपचार खर्चसँगै उनलाई सच्चा राष्ट्रवादीको सम्मानपत्रसमेत दिएको थियो ।

दशगजामै जोडिएको सीमापारिको आदर्श ग्राम पञ्चायतमा सांस्कृतिक कार्यक्रम हेर्न गएका बेला भारतीय प्रहरीले अजयलाई रक्सी खाएर होहल्ला गरेको झूटो आरोपमा पक्राउ गरेपछि छुटाउन जाँदा देवनारायण पनि पक्राउ परेका हुन् । गत वर्षको घटनापछि भारतीय सुरक्षाकर्मीले जुनसुकै बेला बदला लिन सक्ने आशंकामा असुरक्षित महसुस गर्दै आएका बेला उनीहरू पक्राउ परेका छन् । उनीहरू पक्राउ पर्नुको कारण अपहरणसम्बन्धी जाहेरी रहेको भारतीय प्रहरीको दाबी छ । भारतको विहारस्थित कुनौली १ की ज्योति कुमारीलाई अपहरण गरेको व्यहोराको जाहेरी उनकै दाजुले दिएको बताइएको छ । अजय र ज्योतिले छ महिनाअघि भागेर विवाह गरेका थिए । अहिले अजयसँगै कोइलाडी तिलाठीमा बस्दै आएकी ज्योतिले राजीखुसीले बिहे गरेको बताउँदै आएकी हुनाले अपहरण गरेको पुष्टि हुने आधार नै छैन । त्यसैले देवनारायण पक्राउ पर्नुमा अपहरणको विषय देखावटी मात्र रहेको र पुरानो रिसइबी नै साध्न खोजेको देखिन्छ । पक्राउ गरेपछि उनीहरूलाई हत्कडी लगाएर अपमानजनक ढंगले डोरीले बाँधिएको थियो जुन निन्दनीय छ । 

Yamaha

सीमावर्ती क्षेत्रमा रहेका दुई देशका नागरिकबीच प्राय: सौहार्दपूर्ण सम्बन्ध रहने गरे पनि भारत सरकारले निर्माण गर्ने संरचनाका कारण बेला–बेला तनावपूर्ण अवस्था निम्त्याउने गर्छ । यस्तो अवस्थामा प्राय: सीमावारिका नेपालीले मर्का खेप्नुपर्छ । खासगरी तराईका सीमावर्ती क्षेत्रमा बाँध/तटबन्ध निर्माण विवादका कारण बन्ने गरेका छन् किनभने त्यस्ता संरचनाले सीमावारि क्षेत्रलाई वर्षायाममा डुबानमा पार्ने गर्छ । सिमानाकै विषयमा पनि तराईका विभिन्न क्षेत्रमा विवाद छ । त्यसैले भारतीय पक्षले सिमानामा एकतर्फी रूपमा बाँध/तटबन्धजस्ता भौतिक संरचना निर्माण गर्दा नेपाल सरकार प्राय: मौन रहनाले प्रभावित क्षेत्रका बासिन्दा प्रतिकारमा उत्रनुपर्ने अवस्था आइपर्छ र नेपाली नागरिक भारतीय सुरक्षाकर्मीबाट असुरक्षित बन्नुपर्छ । सप्तरीको कोइलाडी तिलाठीमा पनि त्यही भएको हो । 

सीमावर्ती क्षेत्रमा यस्ता तनाव हुने र नागरिक असुरक्षित बन्ने अवस्था नदोहोरिने गरी दिगो समाधान खोज्न जरुरी छ । सीमाक्षेत्रमा संरचना निर्माण दुईदेशीय सहमतिका आधारमा मात्र हुनुपर्छ । सीमासम्बन्धी विद्यमान विवादका विषयलाई नेपाल पक्षले भारतीय पक्षसँगको उच्चस्तरीय छलफल र वार्तामा राखेर समाधान गर्नुपर्छ । सीमाक्षेत्रमा समस्या उत्पन्न भइहाले उच्चस्तरबाटै तत्काल पहलकदमी थालिनुपर्छ ताकि नागरिक प्रतिरोधमा उत्रनुपर्ने अवस्था नआओस् । तत्कालका लागि भने सुपौलको वीरपुर जेलमा राखिएका देवनारायण र उनका छोरा अजयलाई रिहा गराउन सरकारले प्रभावकारी पहल गर्न जरुरी देखिएको छ । अहिले जिल्लास्तरबाट प्रयत्न भइरहे पनि प्रभावकारी बन्न सकेको छैन । त्यसैले केन्द्रीय तहबाटै उनीहरूलाई जतिसक्दो छिटो सम्मानपूर्वक रिहा गराउन पहल गर्नुपर्छ । बदलाको नियतले आफ्ना नागरिकविरुद्ध यस्तो क्रियाकलाप नदोहोरिने अवस्थासमेत सुनिश्चित गराउनुपर्छ । 

Esewa Pasal

प्रकाशित : आश्विन १८, २०७४ ०८:१०
प्रतिक्रिया
पठाउनुहोस्
ADVERTISEMENT

मुस्ताङमा बस दुर्घटना- चालकसहित तीनको मृत्यु

कान्तिपुर संवाददाता

म्याग्दी — मुक्तिनाथ दर्शन गरी फर्कंदै गरेका तीर्थयात्री चढेको बस दुर्घटना हुँदा चालकसहित तीन जनाको मृत्यु भएको छ । दुर्घटनामा दुई बच्चासहित १९ यात्रु घाइते छन् ।

ग१ख ५५२९ नम्बरको बस बाहगाउँ मुक्तिक्षेत्र गाउँपालिका ४ कागबेनीको सिरानमा मंगलबार साँझ ५:३० बजे दुर्घटनामा परेको हो । प्रहरीका अनुसार विराटनगरका गणेश सुवेदी, चालक बागलुङका खेम बुढामगर र एक सनाखत नभएकी महिलाको घटनास्थलमै मृत्युभएको छ ।
घाइतेको जिल्ला अस्पताल जोमसोममा उपचार भइरहेको छ । बस कालोपत्रे, भिरालो सडकको घुम्तीबाट करिब सय मिटर तल बगरमा खसेको थियो ।
‘दुर्घटनामा तीन जनाको मृत्यु भएको छ । मृतकको प्रारम्भिक विवरण मात्र प्राप्त भएको छ, पूर्ण सनाखत हुन बाँकी छ,’ मुस्ताङ प्रहरी प्रमुख डीएसपी रामहरि पाण्डेले भने, ‘दुई बालबालिकासहित १९ घाइतेको जोमसोम अस्पतालमा उपचार भइरहेको छ । थप उपचारका लागि अन्यत्र लैजान सक्ने अवस्था छैन ।’
मुस्ताङ जिप तथा बस व्यवसायी समितिका क्यु संयोजक मिङ्युर गुरुङले भिरालो घुम्तीमा ब्रेक फेल भएर दुर्घटना भएको अनुमान गरे ।
दुर्घटनामा बालिकाको मृत्यु
गोरखा– सदरमुकामबाट आँबुखैरेनीतर्फ जाँदै गरेको बा१ज ४३४९ नम्बरको ट्याक्सीले गोरखा १३ स्थित तीनकिलोमा सोमबार ठक्कर दिँदा ४ वर्षीया बालिका नेबिसा गुरुङको मृत्यु भएको छ । सडक पार गर्न खोज्दा उनलाई ट्याक्सीले ठक्कर दिएको थियो । ठक्करबाट घाइते भएकी गुरुङलाई उपचारका लागि पोखरा लैजाने क्रममा बाटोमै मृत्यु भएको प्रहरीले जनाएको छ । चालक र ट्याक्सी प्रहरी नियन्त्रणमा रहेको प्रहरी नायब उपरीक्षक भेषराज रिजालले बताए ।
बस–कन्टेनर जुधे
नुवाकोट– पासाङल्हामु मार्गको विनपा ५ माझीटारमा दुई सवारीसाधन ठोक्किँदा ११ यात्रु घाइते भएका छन् । मंगलबार बिहान त्रिशूलीबाट काठमाडौंतर्फ जान लागेको यात्रुवाहक ना३ख ६३४७ नम्बर बस र पीपलटारबाट त्रिशूली आउँदै गरेको बा३ख ६३७० नम्बरको कन्टेनर जुधेका हुन् । घाइतेमध्ये केही जिल्लाका अस्पतालमा उपचारपछि घर फर्केका छन् भने कसैलाई थप उपचारका लागि राजधानी लगिएको प्रहरीले जनाएको छ । घाइतेको अवस्था सामान्य रहेको जिल्ला प्रहरी कार्यालयका डीएसपी मधुकरजंग विष्टले बताए ।

प्रकाशित : आश्विन १८, २०७४ ०८:१०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT