प्रदेशसभाको अन्योल

सम्पादकीय

काठमाडौँ — प्रदेशसभा सदस्यको निर्वाचन भएको एक महिना सात दिन बित्दा पनि प्रदेशसभा गठन हुन नसक्नु उदेकलाग्दो छ । सरकारले प्रदेशको अस्थायी राजधानी त तोक्न सकेको छैन नै, प्रदेशसभा सदस्यको निर्वाचन परिणाम बुझ्ने प्रदेश प्रमुख नियुक्तिका लागि सिफारिससमेत गरेको छैन ।

प्रदेशको अस्थायी राजधानी नतोकिँदा पूर्वाधार तयारी अघि बढेको छैन भने प्रदेश प्रमुख नभएकैले निर्वाचन परिणाम घोषणा नै अड्किएको छ । प्रदेशसभा कहिले गठन हुन्छ भन्ने निश्चितसमेत छैन । संघीयता कार्यान्वयनका सन्दर्भमा सरकारले देखाएको यस्तो अकमण्र्यता लज्जास्पद छ ।
प्रदेशको अस्थायी मुकाम तथा प्रदेश प्रमुख टुंगो लागिसकेको र निर्वाचन आयोगले बेलैमा प्रक्रिया अघि बढाएको भए यतिबेला प्रदेशसभाका सदस्यहरूले सम्भवत: शपथ लिइसकेका हुन्थे । राजनीतिक दलहरूले समानुपातिक सिटमा निर्वाचित हुने उम्मेदवारहरूको नामावली निर्वाचन आयोगमा बुझाएकै १२ दिन भइसकेको छ । त्रुटि भए सच्याउने म्याद थप तीन दिन हो, त्यो पनि बितिसकेको छ । प्रत्यक्षतर्फ निर्वाचितहरूको टुंगो एक महिनाअघि नै लागेको छ । तर प्रदेशसभाको अन्तिम निर्वाचन परिणाम घोषणा भएकै छैन । प्रदेशसभा सदस्य निर्वाचन ऐनअनुसार आयोगले निर्वाचनको नतिजा घोषणा भएको सात दिनभित्र परिणामसहितको प्रतिवेदन प्रदेश प्रमुखसमक्ष पठाउनुपर्छ । यही कानुनी बाध्यताका कारण निर्वाचन आयोगलाई अन्तिम नतिजा सार्वजनिक गर्न समस्या भएको देखिन्छ । प्रदेश प्रमुखको नियुक्तिमा भएको ढिलाइले प्रदेशसभा एवं प्रदेश सरकार गठन धकेलिँदै छ । प्रदेश प्रमुखले प्रदेशसभा सदस्य निर्वाचनको अन्तिम परिणाम घोषणा भएको मितिले २० दिनभित्र प्रदेशसभाको अधिवेशन आह्वान गर्नुपर्ने संवैधानिक प्रावधान छ । यस्तै, ३५ दिनभित्र मुख्यमन्त्री नियुक्तिसम्बन्धी प्रक्रिया सक्नुपर्छ । यी प्रक्रिया टाढिँदा केही महिनाअघिदेखि सञ्चालनमा आएका स्थानीय सरकारको कार्यसञ्चालनमा समेत असर पुग्छ । संविधानले तोकेको प्रदेश र स्थानीय तहको साझा अधिकार सूचीका विषयमा प्रदेशले कानुन नबनाएसम्म स्थानीय तहहरू अलमलमा गुज्रिरहनुपर्छ ।

Yamaha

संविधानअनुसार प्रदेश प्रमुखको नियुक्ति राष्ट्रपतिले गर्ने हो र त्यसका लागि मन्त्रिपरिषद्ले सिफारिस गर्नुपर्छ । सरकारले चुनावअघि नै प्रदेश प्रमुख सिफारिस गर्न नसकेकाले अहिले शेरबहादुर देउवा नेतृत्वकै सरकारले गर्ने कि भर्खरैको निर्वाचनको जनादेशअनुरूप बन्ने सरकारले भन्नेमा मतभेद देखिएको छ । निर्वाचनमा बहुमत ल्याएको वाम गठबन्धन नयाँ सरकारले प्रदेश प्रमुख तोक्नुपर्ने अडानमा देखिन्छ । यो विवादमा रुमल्लिइरहँदा संवैधानिक र कानुनी प्रक्रिया नै प्रभावित भइरहेको छ । अहिलेको आवश्यकता जतिसक्दो छिटो प्रदेश प्रमुखको नियुक्ति हो । नयाँ सरकार तत्काल बन्ने पनि नदेखिएकाले देउवा सरकारले नै राजनीतिक दलहरूबीच सहमति र समझदारी गरेर अलिवम्ब प्रदेश प्रमुख सिफारिस गर्नुपर्छ । राजनीतिक सहमतिका लागि प्रधानमन्त्री देउवाले अग्रसरता लिनुपर्छ र राजनीतिक दलहरूको पनि यसमा सकारात्मक भूमिका निर्वाह गर्नुपर्छ ।
सरकारले प्रदेशको अस्थायी मुकाम तोक्न नसक्नु पनि विडम्बनापूर्ण छ । प्रदेशको राजधानी सम्बन्धित प्रदेशसभाबाट दुई तिहाइ बहुमतले निर्धारण गर्ने संवैधानिक प्रावधान भए पनि त्यतिन्जेलसम्म प्रदेशको कार्य सञ्चालन गर्ने ठाउँ तोक्ने जिम्मेवारी केन्द्र सरकारकै हो । ‘विवादबाट जोगिनका लागि’ अस्थायी केन्द्र तोक्न सरकारले आनाकानी गरिरहेको देखिन्छ । स्थायी राजधानी प्रदेशसभाले निर्धारण गर्ने हुनाले अहिले अस्थायी केन्द्र तोक्न हच्किनुपर्ने अवस्था छैन । यसबीचमा केन्द्र नतोकेर राजधानी काठमाडौंमै प्रदेशसभा सदस्यको शपथ खुवाउने तयारीबारे पनि चर्चा आइरहेको छ तर यसले थप विवाद निम्त्याउन सक्छ । प्रदेशसभा र प्रदेश सरकार सञ्चालन गर्न तत्काललाई आवश्यक पूर्वाधार तयार गर्न पनि सरकारले प्रदेशको केन्द्र जतिसक्दो छिटो तोकेर अघि बढ्नुपर्छ ।

प्रकाशित : पुस २७, २०७४ ०७:०६
ADVERTISEMENT
प्रतिक्रिया
पठाउनुहोस्
ADVERTISEMENT

एपीएफको जितमा अञ्जनको गोल

खप्तड गोल्डकप
कान्तिपुर संवाददाता

धनगढी — अञ्जन विष्टका दुई गोलमा विभागीय टोली नेपाल एपीएफ क्लब बुधबार विजय प्राप्त गर्दै नेपाल आइस सुदूरपश्चिम खप्तड गोल्डकप फुटबलको सेमिफाइनल पुगेको छ । धनगढी क्षेत्रीय रंगशालामा भएको पहिलो क्वाटरफाइनलमा एपीएफले सीएमजी क्लब संकटालाई २–० ले हराउँदै अन्तिम चारको यात्रा गरेको हो ।

खप्तड गोल्डकपमा बुधबार प्रतिस्पर्धा गर्दै एपीएफ र संकटा (नीलो) का खेलाडी ।

संकटा गत वर्ष खप्तड गोल्डकपमा उपविजेता बनेको टोली हो । युवा खेलाडी अञ्जनले पहिलो हाफको २३ औं मिनेटमा हेड गोल गर्दै एपीएफलाई अग्रता दिलाएका थिए । दोस्रो गोल पनि उनलै गरको थिए । अञ्जनले खेलका ८५ औं मिनेटमा गोल थप्दै एपीएफको जित सुनिश्चित गरेका थिए । उनी म्यान अफ म्याच भए ।
एपीएफ टोली पहिलो हाफमा संकटामाथि पूर्ण हाबी भएको थियो । दोस्रो हाफमा आक्रामक बनेको संकटाले केही अवसर पाए पनि गोल गर्न सकेन । संकटाका खेलाडीले दोस्रो हाफमा पटक–पटक मौका गुमाए । अन्य दिनभन्दा चिसो बढेकाले बुधबारको खेलमा दर्शक उपस्थिति पनि कम थियो ।

एपीएफका अञ्जन विष्ट (सेतो) र संकटाका अर्नेस्ट टाम्पी भिड्दै (तल) । तस्बिर : डीआर पन्त/कान्तिपुर

पाएका अवसरमा गोल प्रहार गर्न नसक्नु हारको कारण भएको संकटाका प्रशिक्षक सल्यान खड्गीले बताए । उनले भने, ‘पहिलो हाफमै गोल खाएका कारण टिम दबाबमा परेर खेलमा खेल्न सकेन । दोस्रो हाफमा पाएका अवसर चुकाउँदा खेल नै गुमायौं ।’
एपीएफका प्रशिक्षक रत्नकाजी महर्जनले पहिलो खेलमा सुधारोन्मुख प्रदर्शन हुँदा टोलीले सफलता पाएको बताए । उनले भने, ‘पहिलो खेलमा भन्दा हामीले राम्रो प्रदर्शन गर्न सक्यौं । समयमै गोल पनि निस्कियो ।’
उनले खेलमा अझै धेरै सुधार बाँकीरहेको र त्यसलाई सुधारेर उपाधि जित्न प्रयत्न गरिने बताए ।

आजको खेल
त्रिभुवन आर्मीविरुद्ध थ्री स्टार क्लब

प्रकाशित : पुस २७, २०७४ ०७:०३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT