प्रधानमन्त्रीलाई प्रश्न

प्रधानमन्त्रीज्यू, तपाईंलाई सब कुराको ज्ञान छ, तर तिनलाई व्यवहारमा लागु गर्न सक्नुहुन्न भने कसरी सफल बन्नुहुन्छ ?
राेजिना पाेखरेल

काठमाडौँ — निजामती कर्मचारीलाई राज्यको सक्षम र दिगो एवं स्थायी सरकार मानिन्छ । तर निजामती कर्मचारीमाथि अल्छी, भ्रष्टाचारमा लिप्त, कामचोर प्रवृत्तिको भनेर लाञ्छना लगाउने गरिन्छ । तर किन कर्मचारी यस्ता भए ? सामान्य प्रशासन मन्त्री लालबाबु पण्डितले यसबारे के–के रणनीति बनाए ?

कर्मचारीलाई सकारात्मक उत्तप्रेरणाका लागि के–के गरे ? कर्मचारी समायोजन गर्न किन सकेनन् ? कर्मचारीलाई हप्काएर, दाषी देखाएर, हाजिर छड्के गरेर के परिवर्तन आयो र आउँछ ? नकारात्मक उत्प्रेरणा र सस्तो लोकप्रियताले के प्रगति देखियो ?

Yamaha

विकासे मन्त्रालयका मन्त्रीले विभाग, आयोजना, डिभिजनमा प्रमुख लगायत अन्य कर्मचारी खटाउँदा कस्तो प्रक्रिया अपनाउँछन् ? विभागीय प्रमुख, आयोजना प्रमुख बनाउँदा रकम मागियो कि मागिएन ? आर्थिक वर्ष समाप्तपछि कार्यालय, डिभिजन, विभाग हुँदै मन्त्रालयसम्म कमिसन आइपुग्यो कि पुगेन ?

अर्थ मन्त्रालयमा असार महिनामा थप बजेट निकासा गर्दा गत वर्षहरूझैं प्रिपेडमा १.५ देखि ३ प्रतिशतसम्म कमिसन मागियो कि मागिएन ? कमिसन नबुझाउनेको पनि रकम निकासा दिनु भनी अर्थमन्त्रीले निर्देशन दिए त ? आन्तरिक राजस्व विभाग, भन्सार विभाग लगायतका राजस्वका कार्यालय, विभागबाट उठाइएकोदाम सहितका मुठाहरू अर्थमन्त्रीकामा पुग्योकि पुगेन ?

विभिन्न समूह, एसोसिएसन, समिति, स्वार्थ समूहले आफ्ना हितका लागि नीतिगत निर्णय गराउँदा रकमको प्रभाव पर्‍यो कि राष्ट्रहितको ? संस्थान, कम्पनी, समितिमा सञ्चालक, सदस्य, प्रमुख नियुक्तिको मापदण्ड के कायम गरियो र गरिँदैछ ? निष्पक्षताको आधार के छ ?

डन, तस्कर, कालोबजारीसँगको सम्बन्धमा प्रहरी, इलाका प्रशासन कार्यालय, जिल्ला प्रशासन कार्यालयमा केही परिवर्तन आयो ? तस्कर, कालोबजारीले प्रहरी, प्रशासनलाई दाम चढाउन छाडेको छन् ? उठेको दाम कहाँसम्म पुग्दैछ ? के त्यो जालो तोडियो ?

मालपोत, नापी, भूमिसुधार, जिल्ला प्रशासन, यतायात लगायतका जनसम्पर्क बढी हुने कार्यालयमा दलाल, रकमी सहयोगी, एजेन्टलाई प्रवेश निषेध गरियो ? त्यहाँको ठड्डामा सोझै पहुँच
पुर्‍याउने दलालहरू आउनछाडे ? दिनहुँ कार्यालय, कर्मचारीले पाउने, उठाउने घुसमा कमी आयो ? अध्यागमनमा सुधार आयो कि आएन ? त्यहाँकोमानव तस्करीको सेटिङ तोडियो कि तोडिएन ? सेटिङमा कमिसन उठ्न बन्द भयो ?

उपभोक्तामार्फत गरिने कार्य, विकासका काममा ठेकदारी प्रथा बन्द गरियो ? ठूला विकासे निर्माण गराउँदा, सेवा खरिद गर्दा अलिअलि लागत अनुमान बढाउने, ठेक्का सम्झौतापछि मोबिलाइजेसन दिँदा १ देखि २ प्रतिशतसम्म, प्रत्येक बिल भुक्तानीपछिको कमिसन र समग्र निर्माणको ६ देखि २० प्रतिशतसम्म कमिसन लिने चलन छाडेर सम्झौता अनुसारकार्य भयो भएन भनेर चनाखो हुन थालियो ?

ठेक्का अवधिको पटक–पटक म्याद थप गर्ने चलन तोडियो ? पुरस्कार, पदक प्रदान गर्दा तिनको मान राखियो कि भागभन्डा र अफन्तवादमै सीमित गरियो ? ससाना जलविद्युत आयोजना प्राथमिक सेयर जारी हुँदा कैयौं गुना आवेदन पर्छ । सरकार अग्रसर भएर आफ्नो नेतृत्वमा सर्वसाधारणको सेयर प्रतिशत बढी हुनेगरी आयोजना निर्माण गराउन किन लाग्दैन ?

कुल गार्हस्थ उत्पादनको अधिक हिस्सा राख्ने कृषिलाई व्यावसायिक र सम्मानित बनाउन के गरिँदैछ ? युवाका लागि वैदेशिक रोजगारको नयाँ गन्तब्य खोज्ने कि कृषि पेसालाई मर्यादित, सम्मानजनक बनाउन पहल र प्रेरणा गर्ने ? मिठा भाषण हैन, काम र सबल नेतृत्व चाहियो सरकार । मन्त्री मन्त्रालयमा गएर फाइलमा सदर लेख्नमात्र गएका हुन् त ? दैनिक प्रशासन चलाउन मन्त्रालयमा सचिव हुन्छन् ।

मन्त्री ठोस निर्णय गर्ने, परिवर्तन र अग्रगामी नीति ल्याउन भूमिका खेल्ने व्यक्ति हैन र ? अधिकार केन्द्रीकृत गर्ने नै हो भने किन संघीयता चाहियो ? स्थानीय, प्रदेशलाई अधिकार दिन किन कञ्जुस्याइँ ?

प्रधानमन्त्रीज्यू, मन्त्री र कर्मचारीले कमिसन लिनमात्रै छाडे आयोजना गुणस्तरीय हुनेछन्, समयमा सकिनेछन् । कर्मचारी, प्रहरी, प्रशासनलाई सकारात्मक उत्प्रेरणाका योजना चाहिन्छ । तपाईंलाई सब कुराको ज्ञान छ, तर तिनलाई व्यवहारमा लागु गर्न सक्नुहुन्न भने कसरी सफल बन्नुहुन्छ ?

rniraula39@gmail.com

प्रकाशित : आश्विन २६, २०७५ ०८:२७
प्रतिक्रिया
पठाउनुहोस्
ADVERTISEMENT

सूर्य नेपाल गल्फ टुर : शिवरामको उपाधि नम्बर ४२

राजु घिसिङ

काठमाडौँ — पहिलो दिन २, दोस्रोमा ७ र तेस्रो दिन १० स्ट्रोकको अग्रता । त्यसैले अन्तिम चरणको प्रतिस्पर्धा बाँकी छँदै शिवराम श्रेष्ठले सूर्य नेपाल सेन्ट्रल ओपन गल्फको उपाधि जित्ने लगभग पक्का भइसकेको थियो । त्यसैले उनले बिहीबार गोकर्ण गल्फ क्लबमा औपचारिकता पूरा गर्दै करिअरको ४२ औं उपाधि हात पारे ।

प्रतियोगिताको एमेच्योरतर्फ विजेता र उपविजेता बनेका दाजुभाइ टासी छिरिङ र वान्चेन ढोन्डुप । तस्बिर : कान्तिपुर

‘तेस्रो दिन नै उपाधि होड समाप्त भइसकेको थियो,’ सूर्य नेपाल गल्फ टुर २०१८–१९ को पहिलो प्रतियोगिताको अन्तिम दिन बिहीबार तीन अन्डर ६९ स्कोर गरेका शिवरामले भने, ‘त्यसैले अन्तिम चरणमा मलाई कुनै दबाब थिएन । र, ४–५ अन्डर खेल्ने लक्ष्य बनाएर कोर्समा उत्रिएँ । ब्याक नाइनमा राम्रो गर्न नसक्दा तीन अन्डरमात्र खेल्न सकें ।’ उनले ७२ होलको प्रतियोगितामा १५ अन्डर २ सय ७३ स्कोर गरे । पार ७२ को गोकर्ण गल्फ क्लबमा उनले पहिलो दिन ६८, दोस्रोमा ६७, तेस्रो र चौथो दिन समान ६९ स्ट्रोक खेलेका थिए ।

‘प्रतियोगिता १२–१३ अन्डरमा सिध्याउने लक्ष्य राखेको थिएँ । प्रदर्शन राम्रै भयो । र, १५ अन्डर खेले । खुसी लागेको छ,’ नवौंपल्ट सेन्ट्रल ओपनको ट्रफी चुमेपछि शिवरामले भने, ‘यस प्रतियोगिताको तयारीमा निकै मिहिनेत गरेको थिएँ । त्यसैले नतिजा पनि राम्रै भयो ।’ उनले सूर्य नेपाल गल्फ टुर सन् २००८–०९ मा सुरु भएयता दुईपल्ट (२००९–१० र २०१५–१६) मात्र सेन्ट्रल ओपनको ट्रफी गुमाएका छन् ।

रोयल नेपाल गल्फ क्लब (आरएनजीसी) का उनले हरेक दिन सुरुका नौ होलमा उत्कृष्ट प्रदर्शन गरे । तर, उस्तै प्रदर्शन पछिल्ला ९ होलमा दोहोर्‍याउन सकेनन् । यस्तोक्रम अन्तिम चरणमा पनि कायमै रह्यो । उनले सुरुका नौ होलमा पाँच बर्डी गर्दै ५ अन्डर ३१ स्कोर गरे । होल १, ३, ५, ७ र ९ मा एक–एक शट जोगाएका उनी १२ र १५ औं होलमा भने बोगीमा परे । त्यसैले पछिल्ला ९ होलमा उनको स्कोर २ ओभर ३८ रह्यो ।

कुल ६ लाख ६६ हजार ४ सय ९८ रुपैयाँ पुरस्कारको प्रतियोगितामा शिवरामले १ लाख २० हजार हात पारे । सूर्य नेपाल मास्टर्स (२०१४) सहित व्यावसायिक गल्फमा ४२ औं उपाधि जितेका सर्वाधिक सफल यी नेपाली गल्फरले अघिल्लो सिजन (२०१७–१८) मा पाँच उपाधि (घनश्याम गोल्डेन जुब्ली, सेन्ट्रल ओपन, इस्टर्न ओपन, एनपीजीए म्याच प्ले र गल्फर पाइलट्स) जितेका थिए ।

भुवन उपविजेता
गोकर्णका प्रो भुवन नगरकोटीले उपाधि होडमा शिवरामलाई चुनौती दिन सकेनन् । तर, दोस्रो स्थानका लागि भएको प्रतिस्पर्धामा उनले अरु गल्फरको कडा चुनौती पनि सामना गर्नुपरेन । उनले अन्तिम दिन १ ओभर ७१ खेल्दै कुल तीन अन्डर २ सय ८५ स्कोरमा प्रतियोगिता पूरा गरेर ७७ हजार रुपैयाँ प्राप्त गरे । उनले सुरुका नौ होलमा २ अन्डर ३४ र पछिल्ला ९ मा १ ओभर ३९ खेलेका थिए ।

अन्तिम चरणमा ३ ओभर ७५ खेलेका आर्मीका धनबहादर थापा (५ ओभर २९३) तेस्रोमा रहे । उनको भागमा ५५ हजार रह्यो । दुई ओभर ७४ को कार्ड बनाएका रामकृष्ण श्रेष्ठ (१२ ओभर ३ सय) ले व्यावसायिक गल्फ करिअरकै सबैभन्दा राम्रो नतिजा (चौथो स्थान) हासिल गर्दै ४३ हजार प्राप्त गरे । अन्तिम चरणमा ७० शट खेलेका भेट्रान प्रो दीपक मगर (१४ ओभर ३०२) शीर्ष पाँचमा अटाए । उनले ३५ हजार हात पारे ।

पार ३ को पाँचौं होलमा ‘होल इन वान’ गरेका कृष्णमान राजवाहकसहित रामे मगर, विकास अधिकारी (सबै १५ ओभर ३०३), रवि खड्का (१६ ओभर ३०४) र शिवकुमार माझी (१७ ओभर ३०५) शीर्ष दसमा रहे ।

‘फाइनल ग्रुप’ मा रहेर अन्तिम दिन चार ओभर ७६ खेलेका टासी छिरिङ एमेच्योरतर्फ पहिलो भए । उनको कुल स्कोर ४ ओभर २ सय ९२ रह्यो । एमेच्योरतर्फ उनका भाइ वान्चेन ढोन्डुप (८ ओभर २९६) उपविजेता भए । वान्चेनले अन्तिम चरणमा ३ ओभर ७५ खेलेका थिए ।

प्रोफेसनल गल्फर्स एसोसिएसन अफ नेपाल (एनपीजीए) ले सूर्य नेपाल गल्फ टुरको ११ औं सिजनमा ९ प्रतियोगिता आयोजना गर्नेछ, जसको पुरस्कार ५५ लाख रुपैयाँ बढी छ । यो सिजनको दोस्रो प्रतियोगिता सूर्य नेपाल काठमाडौं ओपन २८ अक्टोबरदेखि आरएनजीसीमा हुनेछ ।

प्रकाशित : आश्विन २६, २०७५ ०८:१९
पूरा पढ्नुहोस्
प्रतिक्रिया
पठाउनुहोस्