टिकट लिन युवाको दौडधुप

एमाले, कांग्रेसलगायत पार्टी नेतालाई टिकटका लागि दबाब नै पर्न थालेको छ
मोहन शाही

डोटी — वैशाख ३१ मा हुने स्थानीय तह निर्वाचनका लागि विभिन्न पदमा आकांक्षा राख्दै उम्मेदवारीका लागि युवा पुस्ताको दौडधुप चलेको छ । मुख्य दलका युवा कार्यकर्ता र नेताहरू जिल्लादेखि केन्द्रसम्म टिकट पार्न कसरत गर्दै छन् ।

जिल्ला तहसम्म अधिकांश आकांक्षीले प्रस्ताव पुर्‍याएर कार्यकर्ता रिझाउन थालेका हुन् । यद्यपि आफ्नै पार्टीभित्र आकांक्षी बढी भएकाले कांग्रेस र एमाले नेतालाई टिकटका लागि दबाब बढी नै पर्न थालेको छ । पाको उमेर र विगतको चु्नावी अनुभव बट्ुलेका भने अहिले नै सक्रिय नदेखिए पनि युवा पुस्ताबीच तानातानको फाइदा उठाएर टिकट हात लाउने दाउमा छन् ।

कतिपयले सामाजिक सञ्जालमार्फत उम्मेदवारी दिने घोषणा गरिसकेका छन् । मत आफ्नो पक्षमा रहेको देखाउन कतिपय युवा नेताले सामाजिक सञ्जालमार्फत कार्यकर्तालाई सक्रिय पार्दै लगेका समेत छन् । टिकटका लागि पार्टीभित्र गुटबन्दीसमेत बढदै गएको छ ।

कांग्रेस डोटीले आइतबारबाट आकांक्षीको नाम संकलन र उनीहरूको धारणा बुझ्न तथा चुनावी रणनीति बनाउन बैठक थालेको छ । ‘उहाँहरूले आकांक्षा राख्नु स्वाभाविक हो,’ कांग्रेस जिल्ला सभापति प्रदीप देउवाले भने, ‘त्यसका लागि आइतबारबाट पार्टीको बैठक थालेका छौं, लगत्तै कमिटी बनाएर गाउँ तथा नगरपालिका तहमा कार्यकर्ता, शुभेच्छुक तथा भ्रातृ संगठनको राय संकलन गरेर चैत पहिलो साताभित्रै टिकट बाँड्ने योजना छ ।’

एमाले जिल्ला अध्यक्ष चक्र मल्लले पार्टी स्थायी कमिटीको पोलिसीअनुसार टिकट वितरण गरिने बताए । ‘विभिन्न रूपबाट आफ्नो चाहना राख्ने साथीहरू धेरै हुनुहुन्छ, उहाँहरू अहिले आफ्नै किसिमले रणनीति बनाएर गाउँ जानुभएको छ,’ मल्लले भने, ‘जिल्लाबाटै टिकट बाँड्ने कि केन्द्रले भन्ने पोलिसी आइनसकेकाले अहिले नै केही भन्न नसकिने बताए ।’ राष्ट्रिय जनमोर्चाका जिल्ला सचिव केशवनाथ योगीले ४–५ दिनभित्रै टिकटको टुंगो लगाउने तयारीमा रहेको जानकारी दिए ।

दुई नगरपालिका र ७ गाउँपालिका रहेको डोटीमा पुनर्संरचनासँगै स्थानीय तहको निर्वाचनमा विगतभन्दा मतदाताको भोट बैंक फरक स्थिति रहेकाले नेताहरू पार्टीभित्र र बाहिरका प्रतिस्पर्धीलाई हेरेर चुनावी रणनीति बनाउन गाउँ पसेका छन् । सबैभन्दा बढी कसरत दिपायल सिलगढी नगरपालिका र शिखर नगरपालिकामा देखिएको छ । आकांक्षा राख्नेमा नयाँ अनुहारका युवा बढी छन् । दुवै नगरपालिकामा कांग्रेस र एमालेका नेताले आकांक्षा देखाए पनि अन्य पार्टी मैदानमा देखिएका छैनन् ।

६६ मतदान केन्द्र
डोल्पा (कास)– स्थानीय तह निर्वाचनका लागि डोल्पामा ६६ मतदान केन्द्र कायम गरिएको छ । जिल्ला निर्वाचन कार्यालयका अनुसार मतदान केन्द्र सिफारिस समिति बैठकले ४६ मतदान स्थल र ६६ मतदान केन्द्र निर्धारण गरेको हो । जिल्ला निर्वाचन अधिकारी रामबहादुर बुढाका अनुसार यसअघि ४७ मतदान स्थल थिए । पहाडाको साइलाबाडा र छलका साविक मतदान केन्द्रलाई गाभेर एउटै बनाइएको उनले जनाए । दुवै गाउँ एउटै वडामा परपछि मतदान स्थल गाभ्नु परेको उनको भनाइ छ । कार्यालयका अनुसार फोटोसहितको मतदाता नामावली अद्यावधिक गरेर निर्वाचन आयोगमा पठाइएको छ । १६ हजार ७ सय ४४ मतदाता नामावली संकलन तथा अद्यावधिक गरी पठाइएको कार्यालयले जनाएको छ । डोल्पामा २ नगरपालिका र ६ गाउँपालिका छन् ।

प्रकाशित : चैत्र ७, २०७३ १०:२३
प्रतिक्रिया
पठाउनुहोस्

भगवान् भरोसामा सर्वसाधारणको दैनिकी

हरेक पटक साँघु तर्दा ‘भगवान् मलाई बचाऊ’ भन्नुको विकल्प छैन
हरि गौतम

रुकुम — सिस्ने गाउँपालिका ३, की ३५ वर्षीया देउसरा खड्काका हरेक वर्षको ७ महिना भगवान् भरोसामा कट्छन् । घाँस–दाउराका लागि दैनिक सानीभेरी वारपार गर्नुपर्ने उनी नदीमाथि बनाइएको साँघु (काठेपुल) तर्दा भगवान् पुकार्ने गर्छिन् । सोही ठाउँकी ४५ वर्षीया कमला खड्काले पनि कम्तीमा दिनको दुई पटक उक्त साँघु तर्नैपर्छ ।

हरेक पटक साँघु तर्दा ‘भगवान् मलाई बचाऊ’ भन्नुको विकल्प नरहेको उनले बताइन् । सानो काठमाथि डोरीले कसेर बनाइएको साँघुको केही भर छैन, कति बेला को नदीमा खस्ने हो या कति बेला साँघु नै भाँच्चिने हो । ‘जति पटक साँघु तर्छौं उति पटक भगवान् बचाइदेऊ भन्नुपर्छ,’ देउसराले भनिन्, ‘यही भनेकै भरमा कति दिनसम्म साँघु तर्दा भगवान्ले हाम्रो पुकारा सुनिदिने हुन् ।’

कमला र देउसरा मात्रै होइन, सोही गाउँपालिका पोखरासहित पाङ्गा, ढाँका, दादिङ, नाथीगार, रुकुमकोटलगायत क्षेत्रका सर्वसाधारण तथा जनता मावि पढ्ने विद्यार्थीले हरेक मंसिर–जेठ महिनासम्म ठूलो जोखिमका सिस्ने गाउँपालिका ४ बाट वडा ७ पुग्न सानीभेरी वारपार गर्न बाध्य छन् ।

त्यस क्षेत्रका सर्वसाधारणले यो समस्या भोग्न थालेको अहिले मात्रै होइन । स्थानीय ६२ वर्षीय हर्कवीर खड्काले आफूले थाहा पाउनु पहिल्यैदेखि साँघुको जोखिम मोलेर सानीभेरी वारपार गर्दै आएको बताए । उनका अनुसार वर्षौंदेखि त्यस ठाउँमा पुल बन्न सकेको छैन । ‘हाम्रा बाजे बराजुदेखि नै साँघुको सहायतामा नदी वारपार गर्दै आएका छन्,’ खड्काले भने, ‘यो ठाउँमा अहिलेसम्म साँघुको विकल्प केही आउन सकेको छैन ।’ हर्कवीरले पनि ५ वर्षको उमेरदेखि नै उक्त साँघुबाट वारपार गर्दै आएका छन् ।

आफ्ना बाजेले पहिल्यैदेखि साँघुकै सहायतामा नदी तर्ने गरेको बताएको पनि उनले सुनाए । केपी शर्मा ओली प्रधानमन्त्री हुँदा ल्याएको तुइन विस्थापित गर्ने योजनामा पनि आफ्नो ठाउँ नसमेटिँदा दु:ख लागेको हर्कवीरको भनाइ छ । ‘तुइन विस्थापित गर्ने योजनाले तुइनभन्दा अप्ठ्यारो साँघुलाई सदाका लागि बिदा गर्दिन्छ कि भन्ने आस थियो भएन,’ खडकाले गुनासो पोखे ।

जनता माविका प्रधानाध्यापक कलु खड्का उक्त ठाउँ आसपासमा पुल नहुँदा सर्वसाधारणले ठूलो जोखिम मोलेर दैनिकी चलाउन बाध्य भएको बताउँछन् । उनका अनुसार दैनिक ३ सयभन्दा बढी सर्वसाधारण र ५० भन्दा बढी विद्यार्थीले उक्त साँघु प्रयोग गर्दै आएका छन् । पक्की पुल नहुँदा नाथीगाड, घरेलीलगायत ठाउँका अरू धेरै विद्यार्थी टाढाका स्कुल पढ्न जान बाध्य छन् । उनका अनुसार पोखरामा रहेको तातोपानी नुहाउन आउने–जाने पनि यही साँघु तर्ने गर्छन् ।

अन्य ठाउँमा पुल परेको र बनेको खबर सुन्न पाउँदा खुसी लागे पनि आफूहरू भने पुल तर्ने सपना मात्रै साँचेर बस्नुपर्दा खिन्न लागेका सर्वसाधारण बताउँछन् । हरेक मंसिरमा पोखरावासीले बनाउने उक्त साँघु हरेक असारमा सानीभेरीमा आउने बाढीले बगाउँछ र ५ महिना वार–पार गर्न नपाउने बाध्यता पनि कायमै छ ।

अनुमानित ५ हजार रुपैयाँ लागतमा साँघु बन्छ । र, त्यसको आयु पनि मंसिरदेखि जेठसम्म जम्माजम्मी ७ महिना मात्रै हुन्छ । असारमा आउने सानीभेरीको बाढीले साँघु बगाएर लैजान्छ । पुल नबनेकै कारण उक्त साँघुबाट बर्सेनि नदीमा खसेर सर्वसाधारणको ज्यान जाने गरेको छ । स्थानीय डिलबहादुर केसीले अहिलेसम्म धेरैले साँघुबाट खसेर अकालमै ज्यान गएको बताए । २०६० सालमा नेपाली सेनाका केही जवान सोही साँघुबाट खस्दा हराएको हतियार खोज्न एक दिनभर लागेको थियो भने उनीहरू बल्ल–बल्ल नदीबाट निस्कन सकेका थिए । सानीभेरी तर्न बर्खामा कि अमलाचौर कि बोजेरी पुग्नुपर्ने बाध्यता स्थानीयमा छ ।

प्रकाशित : चैत्र ७, २०७३ १०:२३
पूरा पढ्नुहोस्
प्रतिक्रिया
पठाउनुहोस्