डोजर आतंक
काठमाडौँ — अन्धाधुन्द र अव्यवस्थित तरिकाबाट बनाइएका पहाडी सडक पछिल्लो समय अकाल मृत्युको कारण बन्दै गएको यथार्थबाट हामी कोही अनभिज्ञ छैनौं । देशैभर मनसुन सक्रिय भएपछि यस्ता अव्यवस्थित सडक मृत्युभूमि सरह बनेका छन्, दुर्घटना बढ्दो क्रममा छ ।
विनापूर्व योजना, वातावरणीय प्रभाव मूल्यांकनसमेत नगरी सडक बनाउने नाममा सुन्दर पहाडी सौन्दर्यमाथि धावा बोल्ने, डोजर आतंक फैलाउने कार्यले दुर्घटनाका साथै वनस्पति, जंगली जनावर एवं मानव बस्तीमाथि समेत जोखिम बढाएको छ । सरकार भने मुलुकको अस्मिता र मानवीय मृत्युप्रति संवेदनहीन बनेर यस्तो अवाञ्छित गतिविधिलाई विकास भन्दै धुले र हिले सडकमा नाचगान गरिरहेको छ । चाहे सांसद क्षेत्र विकासको नाममा होस् या स्थानीय तहमा विनियोजित बजेट नै किन नहोस्, अधिकांश रकम डोजर धस्नमा प्रयोग भएको पाइन्छ । स्थानीय तहमा २ घन्टा डोजर चलाएर मिलेमतोमा १४–१५ घन्टा काम गरेको बिल बनाउने र रकम हडप्ने गुनासो पनि सुनिन थालेको छ ।
मानवीय क्षति न्युन गर्दै प्रदेशलाई अनुपम स्वरुप दिने दायित्व अब प्रदेश सरकारको नै हो । यतिबेला भूपरिवेष्टित र पहाडी मुलुक भएको नाताले स्वीट्जरल्यान्ड जस्तो उत्तम नमुना हाम्रालागि अर्को हुन सक्दैन । त्यहाँको मोडल अवलम्बन गर्नसके हाम्रो मुलुकले छिटो काँचुली फेर्ने निश्चित छ । तसर्थ अरु क्षेत्रको बजेट कटौती गरेर भए पनि सातै प्रदेशका मुख्यमन्त्री, योजनाकार लगायतका जिम्मेवार पदाधिकारीले अहिलेको डोजर आतंकबाट मुक्ति र पर्यायवरण विनाशबाट निम्तिने खतराबाट बचाउन पहल गर्नु आवश्यक छ ।
– डा. भुवनेश्वर शर्मा
चन्द्रागिरि–२, काठमाडौं