असुरक्षित आकाश

हवाई यातायातमा हेलिकप्टरलाई बढी सुरक्षित यातायात मानिन्छ, तर त्यही हेलिकप्टर दुर्घटनाको संख्या हामीकहाँ बढ्दै गइरहेको छ । हाम्रो आकाश दिन–प्रतिदिन असुरक्षित बन्दै गइरहेको हामी सबैलाई थाहा छ । तर सरकारी स्तरमा भने कहीं कतैबाट हाम्रो आकाशलाई कसरी सुरक्षित बनाउने भन्नेतर्फ बहससमेत प्रारम्भ गरिएको छैन । यसरी हामी कहिलेसम्म असुरक्षित हवाइयात्रा गरिरहने हो ? यसले हाम्रो पर्यटकीय क्षेत्रमा समेत नराम्रो असर परिरहेको छ । पछिल्लो समय बिग्रँदो सडक सञ्जाल पहिरोका कारण हवाई यातायाततर्फ आम नागरिक आकर्षित भइरहेको अवस्थामा हवाई दुर्घटना बढ्दै जाने हो भने यसले नकारात्मक असर पार्छ । अत: सरकारले बढ्दो हवाई दुर्घटनाका कारण के–के हुन् ? किन, कसको लापरबाहीले दुर्घटना बढिरहेका छन् ? पहिचान गरी दुर्घटना कम गर्नतर्फ अग्रसर हुनुपर्छ । कहीं कोही दोषी देखिएमा कारबाही गर्नुपर्छ । अन्यथा भोलि नेपालको हवाई यातायात विदेशीले मात्र नभएर स्वयम् नेपालीले पनि वर्जित गर्नुपर्ने दिन नआउला भन्न सकिन्न । त्यो अवस्था सिर्जना भएमा हामीले खोजेको समृद्धि कहाँ पुग्ला ?
– रामकृष्ण बराल,जोरपाटी–२, काठमाडौं