विमानस्थल निर्माणमा खेलबाड
काठमाडौँ — २७ वर्ष अघिदेखि निजगढमा अर्को अन्तर्राष्ट्रिय विमानस्थल बनाउने विषय उठान भए पनि ठोस काम हुन सकेको छैन । यसै विषयमा शुक्रबारको ‘जंगल जोगाउने कि विकास गर्ने ?’ खबर पढेपछि यो विषयमा थप विश्लेषण जरुरी देखियो ।
एकातिर विज्ञको मतैक्यता देखिंदैन भने अर्कोतिर यसको निक्र्यौल गर्न पूर्व प्रधानमन्त्री माधवकुमार नेपाल नेतृत्वको संसदीय उपसमिति निजगढको स्थलगत भ्रमणमा जान लागेको सन्दर्भले नेताहरू पनि अझैसम्म अन्योलग्रस्त रहेको पाइन्छ । विमानस्थल निर्माण क्रममा १६४१.१ हेक्टर वन क्षेत्रमा ५० प्रजातिका २४ लाख ५० हजार रूख कटान गर्न संस्कृति, पर्यटन तथा नागरिक उड्डयन मन्त्रालय अग्रसर रहेको सन्दर्भ युक्तिसंगत देखिंदैन । हचुवाको भरमा गरिएको वातावरणीय प्रभाव मूल्यांकन (ईआईए) एवं वर्षायाममा पसाहा र लालबकैया खोलाको बाढीले दु:ख दिने विषयले अरू चासो बढाएको छ । यी समस्याबाहेक अनगिन्ती प्रश्न छन् : पहिलेदेखि डाँका–आतंकले ग्रस्त निजगढ क्षेत्र भारतीय सीमासमेत नजिक भएको हिसाबले जहाज र विमानस्थल राष्ट्रिय, अन्तर्राष्ट्रिय आतंकवादीको निसाना नबन्ला भन्न सकिन्न । जंगल नजिक नभएको त्रिभुवन विमानस्थलमा चिल, गिद्द विमानमा ठोकिएर समस्या बढेको बेला चारैतिरबाट होटल र जंगलले घेरिएको निजगढ विमानस्थलको चरा–आतंक कसले रोक्ने ? वन सम्पदाबाहेक जंगली पशुपंक्षी, जैविक विविधताको विनाश, वातावरणीय ह्रास, मरुभूमीकरण, पानीको हाहाकार पर्ने सन्दर्भको लेखाजोखा खोइ ?
–भुवनेश्वर शर्मा, चन्द्रागिरी–२, काठमाडौं