ज्यादती घटाउनुपर्छ
काठमाडौँ — जब दसैं लाग्छ, पशुपन्क्षीमाथि अन्याय सुरु हुन्छ । गाडीका छतमा, डिकीमा राखेर भोकतिर्खामा दानापानी बिना मरणासन्न हुनेगरी यिनीहरूको ओसार–पसार गरिन्छ । पशु अधिकारवादीहरू पनि यो मामिलामा त्यति जागरुक भएको पाइन्न ।
अनेक दु:खकष्ट र पीडा दिएर टाढा–टाढाबाट ढुवानी गरिने र देवीदेवताका नाममा बलि दिइने पीडाप्रति मान्छे संवेदनशील नदेखिएको पाउँदा अनौठो लाग्छ । यो पृथ्वी सबै प्राणीको साझा घर हो । निर्दोष प्राणीहरूप्रति विवेकशील भनिएका मान्छेहरूले अलिकति सोच्नैपर्छ । सदियौंदेखि चलिआएको हाम्रा रीतिरिवाजहरू तत्काल परिवर्तन गर्न नसकिए पनि पशुपन्क्षीमाथि हुुने यस्ता प्रकारका ज्यादती न्युनीकरण गर्दै लाने र मानिसलाई बढी मांसाहारी नबन्नका लागि प्रेरित गर्ने दिन ल्याउन ढिला नगरौं ।
– कृष्ण कुम्पुरे, आदमटार, धादिङ