मलाई अन्याय भो

कान्तिपुर संवाददाता

काठमाडौँ — कान्तिपुरमा प्रकाशित ‘पहुँचवालाका आफन्त नियम विपरीत सरुवा’ शीर्षक समाचारमा मेरो पनि नाम जोडिएको पाइयो  ।

म समायोजनमा रौतहटको गरुढा नगरपालिकामा खटिएको यथार्थ हो र अपायक भयो भनी सङ्घीय मामिला तथा सामान्य प्रशासन मन्त्रालयमा नियम बमोजिम गुनासो दर्ता गरेको पनि हुँ । आजका मितिसम्म समायोजनका सम्बन्धमा मेरो कतै काज वा सरुवा भएको छैन । मैले नियम अनुसार गुनासो दर्ता गर्दा र रिक्त भएको स्थानीय तहमा समान तहमा समायोजनको माग राख्दा शिक्षा सचिवको समेत नाम जोडेर समाचार प्रकाशन गर्नु भ्रामक र तथ्यहीन हो । शिक्षा, विज्ञान तथा प्रविधि सचिवको भाइ भएकैले मैले चित्त नबुझेका कुरा सम्बन्धित मन्त्रालयमा राख्न नपाउने भन्ने हुँदैन होला ।


सङ्घीय मामिला तथा सामान्य प्रशासन मन्त्रालयमा विधिपूर्वक गुनासो राखेको कुरालाई शिक्षा सचिवसँग जोड्नु कहाँसम्मको जायज कुरा हो ? परिवारको सदस्य भएकै नाताले मैले विधिपूर्वक गुनासो र समाधानको उपाय सुझाउनु के मेरो गल्ती काम हो र ? आफ्नो समायोजनका सम्बन्धमा दायर गरेको रिटमा सम्मानित सर्वोच्च अदालतबाट हाललाई यथास्थानमै रहनु भन्ने आदेश भएकाले रमाना नलिएको र जिल्ला आयोजना कार्यान्वयन इकाइ (शिक्षा), स्याङजामा रहेको ब्यहोरा जानकारी गराउँछु ।
– बाबुराम बराल, उपसचिव, काठमाडौं

प्रकाशित : वैशाख ९, २०७६ ०८:५७
प्रतिक्रिया
पठाउनुहोस्
ADVERTISEMENT
ADVERTISEMENT

डी प्लस ल्याउने विद्यार्थी होइनन् ?

कान्तिपुर संवाददाता

काठमाडौँ — पोखरा विश्वविद्यालय (पोवि) ले डी प्लस ल्याउनेलाई भर्ना नलिने भनेर विद्यार्थीको भविष्यमाथि खेलवाड गर्ने सुर कसेछ  ।

कुनै पनि श्वविद्यालयमाथि सरकार हुन्छ कि हुन्न ? हुन्छ भने सरकारको एउटा नियम, विश्वविद्यालयको अर्को नियम हुन्छ र ? डी प्लसवालालाई भर्ना नलिने हो भने पोविले पहिले नै सूचना जारी गर्न किन सकेन ? पोविले परीक्षा नियन्त्रण कार्यालयलाई परिपत्र गरेर रोक लगाउन भनेको छ । डी प्लस आएका विद्यार्थीलाई पोवि सम्बद्ध कलेजहरूले यसअघि भर्ना लिइसकेका छन् । अहिले आएर उसले ‘डी प्लस आउनेको रजिष्ट्रेसन फार्म नगर्नु, नटेरे कलेजको सम्बन्धन खारेजसमेत गर्न सकिन्छ’ भनेको छ । यस्तो गैरजिम्मेवार बन्न मिल्छ, विश्वविद्यालय ?


डी प्लसलाई भर्ना लिएर शिक्षाको यस्तो दुर्गति भएको होइन, प्राध्यापकहरूको गैरजिम्मेवारीका कारण यस्तो भएको हो । प्राध्यापकहरू पढाउनभन्दा बढी राजनीतिमा ब्यस्त छन्, अनि शिक्षा कमजोर नभए के हुन्छ ? पोविमै धेरै कमी–कमजोरी छन् । ऊ पहिले तिनलाई सुधार्न लाग्नुपर्ने हो । आफ्ना कमजोरी नसच्याउने, अरुलाई दोष लगाएर समस्याबाट पन्छिने गर्नु त भएन ! वर्षेनि हजारौं विद्यार्थी विदेशिने गरेका छन् ।

विश्वविद्यालयहरूको ध्यान यतातिर पो जानुपर्ने हो ! हरेक शैक्षिक सत्रपिच्छे नयाँ–नयाँ नियम लाद््नाले फाइदा कसलाई हुन्छ ? यस्तो परिपाटीले विद्यार्थीहरू विदेशिने क्रम झन् बढ्दै जाँदैन ?
– पुरुषोत्तम घिमिरे, जोरपाटी, काठमाडौं

प्रकाशित : वैशाख ९, २०७६ ०८:५७
पूरा पढ्नुहोस्
प्रतिक्रिया
पठाउनुहोस्
ADVERTISEMENT