ढँटुवाहरूको रजगज

कान्तिपुर संवाददाता

आखिर ढाँटेको कुरा र टालेको लुगा उस्तै न हो  । ढाँटेको कुरा न त सधैंका लागि ढाँटिन्छ, टालेको लुगाले न लाज छोपिन्छ  ।

प्रधानमन्त्रीको बोली पनि त्यस्तै सावित भयो । तरकारी र फलफूलमा विषादी परीक्षणसम्बन्धी पत्र आएको आफूलाई थाहा नभएको भनी प्रधानमन्त्री केपी शर्मा ओलीले राष्ट्रलाई ढाँटेको काठमाडौंस्थित भारतीय दूतावासले परराष्ट्र मन्त्रालयलाई लेखेको पत्र सार्वजनिक
भएपछि स्पष्ट भयो।
– सुजन देवकोटा, पालुङटार–४, गोरखा

प्रधानमन्त्री केपी शर्मा ओलीप्रति गएको चुनावको दिनसम्म
जनताको अपार विश्वास थियो । सत्ता सम्हालेको १७ महिनाको कामकारबाही, जनभावना विपरीतका विधेयक र असत्य वाणीले उनको विश्वसनीयता खस्केको छ । पछिल्लो कडी हो– भारतीय दूतावासले नेपाल सरकारलाई लेखेको पत्र । परराष्ट्र मन्त्रालयलाई सम्बोधन गरी करिब आधा दर्जन सरकारी निकायलाई बोधार्थ दिइएको पत्र र त्यसैको आधारमा मन्त्रिपरिषदले निर्णय फिर्ता लिइसक्दा पनि कसले पत्र लेख्यो ? कसले पढ्यो ? भन्ने ढँटुवा कुरा गर्नु लाजमर्दो हो । कार्यकारीको निकम्मापन हो । राष्ट्रलाई नै ढाँट्नेलाई कतिसम्म सर्वोच्च कार्यकारी पदमा व्यहोरिरहनुपर्ने हो ? यही अभिशप्त समयमा हामी बाँचेका छौं ।


अब नेपाल–भारतले आआफ्नो देशभित्र विषादी परीक्षण गरेको रिपोर्टलाई दुबै देशले मान्यता दिन्छौं भनी सम्झौता गरेमा दुबैको समान हैसियत पनि कायम हुन्छ र विषादीयुक्त तरकारी र फलफूलबाट उपभोक्ताको स्वास्थ्य पनि बिग्रन पाउँदैन।
– गोपाल देवकोटा, गोकर्णेश्वर–८, जोरपाटी, काठमाडौं

काठमाडौंस्थित भारतीय दूतावासबाट पत्र आएको धरि थाहा नपाएको बहाना गरी जनतालाई ढाँटेर विष खुवाउन उद्यतहरूलाई के भन्ने ? को प्रति वफादार छन्, यिनीहरू ? शासकको विदेशीसंँग झुक्ने, आफ्ना जनतालाई भुक्ने रवैया उदाङ्गिएको छ । सरकारी प्रवक्ताले पत्र आउनु सामान्य भने पनि पत्रपछि मन्त्रिपरिषदले जुन निर्णय गर्‍यो, त्यो किमार्थ सामान्य होइन । कुनै पनि देशका राजदूतले आफ्नो देश र नागरिकको हितका लागि काम गर्छन् । भारतीय राजदूतको पत्र पनि उनको देशका किसान र व्यापारीका हितका लागि लेखेको हो । तर त्यो पत्रमा उल्लेखित विषयमा दोहोरो संवादसमेत गर्न नसक्ने हाम्रा मन्त्री र सचिवले जस्तोसुकै तर्क दिए पनि क्षम्य हुँदैन ।
– ध्रुवप्रसाद आचार्य, गोठाटार, काठमाडौं

प्रकाशित : असार २६, २०७६ ०९:२८
प्रतिक्रिया
पठाउनुहोस्

एप्सबाटै ट्याक्सी

सीमा तामाङ

काठमाडौँ — ट्याक्सी व्यवसायीले मोबाइल एप्समार्फत यात्रुलाई सेवा दिने तयारी थालेका छन् । यसका लागि उपत्यका ट्याक्सी व्यवसाय तथा चालक सेवा समाजले ‘इजी ट्याक्सी नेपाल’ नामको एप्स विकास गरेको छ ।

अहिले परीक्षणमा रहेको एप्समार्फत युरोप, अमेरिकामा प्रचलित उबर सेवामा झैं अनलाइनबाटै ट्याक्सी बोलाउन सकिने बताइएको छ ।

करिब ५ हजार स्वरोजगार ट्याक्सी चालक रहेको समाजको उक्त मोबाइल एप्समा पहिलो चरणमा ३ हजार ५ सयभन्दा बढी ट्याक्सी आबद्ध भइसकेका छन् । अन्य ट्याक्सी तथा चालक बिस्तारै जोडिँदै जाने समाजका अध्यक्ष सानु पुर्वाछाने मगरले बताए ।

‘एप्समार्फत यात्रुले दिउँसो र राति दुवै समयमा सेवा प्राप्त गर्न सक्नेछन्,’ उनले भने, ‘एप्समा आबद्ध चालकको ५ लाख रुपैयाँको दुर्घटना बिमा गरिनेछ ।’ एप्समार्फत सेवा लिने यात्रुले वेबसाइट वा एप्समार्फत केवाईसी फर्म भरे ५ लाख रुपैयाँको दुर्घटना बिमा गरिने बताइएको छ ।

अन्य देशले सञ्चालन गरिसकेको एप्स नेपालमा पहिलो पटक सञ्चालनमा ल्याउन लागिएको हो । सरकारलेतोकेकै भाडादर कायम गरिएको अध्यक्ष मगरले बताए ।

उपत्यकामा मात्र सञ्चालन गरिने यो सेवा लिन यात्रुहरूले उक्त एप्स डाउनलोड गरी दर्ता गर्नुपर्नेछ । यसका लागि कस्टमर ‘लग इन’मा थिचेर आफ्नो नाम र नम्बर लेख्नुपर्ने हुन्छ । यात्रुले ‘लग इन’ गरेपछि त्यसमा देखिने ‘रियल टाइम म्याप’मा आफू बसेको स्थानदेखि जाने गन्तव्य छनोट गर्नुपर्ने सफ्टवेयर कम्पनी इजी एस्युरेन्सका प्रबन्धक सन्जित पौडेलले बताए ।

यात्रुले एप्समा गरेको अनुरोधका आधारमा नजिकै रहेका ट्याक्सी चालकले त्यसलाई स्वीकार गर्नेछन् । उनीहरूले उल्लिखित यात्रुको मोबाइल नम्बरमा फोन गरी सेवा दिनेछन् । यात्रुले अहिले नगदमै र पछि डिजिटल वालेटमार्फत पनि भाडा भुक्तानी गर्न सक्ने पौडेलले बताए ।

एन्ड्रोइडको प्लेस्टोरबाट डाउनलोड गरेर सेवा लिन सकिने यो एप्स चाँडै आइफोनको एप स्टोरबाट पनि डाउनलोड गर्न सकिनेछ । यात्रु ठगिने र भाडामा भएका बेथिति हटाउन समाजले एप्स सञ्चालनको तयारी गरेको पौडेलको भनाइ छ । ‘एप्समार्फत यात्रु ठगिने कार्य न्यून हुन्छ,’ उनले भने, ‘डिजिटल भन्नेबित्तिकै महँगो भनिन्छ तर एप्स सरकारी दरमै कायम छ ।’

एप्सबाट गरिएको अनुरोधपछि ट्याक्सीले ५ मिनेटभित्र यात्रु भएकै स्थानमा पुगेर सेवा दिने उनले बताए । उनका अनुसार ट्याक्सी चालकलाई ५ लाखको दुर्घटना बिमा, परिचयपत्र, ड्रेस दिने व्यवस्था गरिएको छ ।

प्रकाशित : असार २६, २०७६ ०९:२५
पूरा पढ्नुहोस्
प्रतिक्रिया
पठाउनुहोस्