पाठक पल्किने पुस्तकालय

सार्वजनिक पुस्तकालयहरू काठमाडौं केन्द्रित मात्र हुनु भएन । पोखरा, विराटनगर, भरतपुर, वीरगन्ज, जनकपुर, नेपालगन्ज, धरान, इटहरी, दाङ, भैरहवा, धनगढी लगायत अधिक जनचाप भएका ठाउँमा व्यवस्थित पुस्तकालय आवश्यक छ । पोखरा, महेन्द्रपुलस्थित सार्वजनिक पुस्तकालय साँघुरो छ । पाठकका लागि सुगम छैन । विदाको दिन बाहेक १२ बजेतिर पुस्तकालय खुल्ने गर्छ । आफूले चाहेको पत्रपत्रिका पढ्नुपरे तोकिएको न्यूनतम शुल्क तिरेर पढ्न पाइन्छ । काठमाडौंमा करिब ५५ करोडको लागतमा ६ तले र ३ तले २ वटा पुस्तकालय भवन आठ रोपनी क्षेत्रफलमा बन्ने सरकारी योजना सफल होस् । नेपाली कला, संस्कृति झल्किने र पाठक पनि पल्किने पुस्तकालय बनोस् । ५५ करोडमा ३० करोडजति खर्च गरेर बाँकी भ्रष्टाचार गर्न सिपालुहरूले पाचनक्रिया सबल बनाएर राखिसकेका होलान् ।
– शेषराज भट्टराई, फूलबारी–११, पोखरा, कास्की