[तस्बिरमा हेर्नुहोस्] रौतहट र धनुषामा मनोनयन दर्ता

पवन यादव, हेमन्त श्रेष्ठ, दिपेन्द्र बडुवाल

रौतहट, धनुषा — स्थानीय तह तेस्रो चरणको निर्वाचन प्रक्रियाअन्तर्गत प्रदेश नं. २ मा बुधबार उल्लासमय मनोनयन दर्ता भएको निर्वाचन कार्यालयले बताएको छ । यहाँको गरुडा, चन्द्रनिगाहपुर, गौर, वृन्दावन, मौलापुरलगायत १६ वटा नगरपालिका तथा २ वटा गाउँपालिकामा उम्मेदवारहरुले मनोनयन दर्ता गराए । मनोनयन दर्ता गराउन उनीहरु बाजागाजासहित निर्वाचन अधिकृतको कार्यालयसम्म पुगेका थिए ।

पार्टीको झन्डा, ब्यानरसहित उनीहरु जुलुस लिएर तोकिएको निर्वाचन अधिकृतको कार्यालयमा पुगेका थिए । मनोनयन दर्ता गराउने क्रममा समर्थकले आआफ्नो उम्मेदवारको जित सुनिश्चित भएको भन्दै नाराबाजी गरेका थिए । जिल्लाको मुख्य सहर चन्द्रनिगाहपुरमा माओवादी केन्द्र र कांग्रेसका उम्मेदवारले भव्य जुलुसका साथ निर्वाचन अधिकृतको कार्यालयसम्म पुगेका थिए । त्यस्तै गरुडामा नेपाली कांग्रेस, माओवादी केन्द्र, राजपा, संघीय समाजवादी फोरमका उम्मेदवारले जुलुसका साथ उम्मेदवारी दर्ता गराउन पुगेका थिए ।



सदरमुकामस्थित गौर नगरपालिकामा एमाले, राजपा, संघीय समाजवादी फोरमका उम्मेदवारले जुलुसका साथ उम्मेदवारी दर्ता गराए । जिल्लाभरि शान्तिपूर्ण रुपले उम्मेदवारी दर्ता भएको मुख्य निर्वाचन अधिकृतको कार्यालयले जनाएको छ । सुरक्षाकर्मीको पनि बाक्लो उपस्थिति थियो ।
जिल्लाको १६ नगरपालिका र २ गाउँपालिका गरी १८ वटा स्थानीय तहमा १८ जना प्रमुख तथा उपप्रमुख निर्वाचित हुनेछन् । त्यस्तै एक सय ५७ वटा वडामा अध्यक्ष, ६ सय २८ जना वडा सदस्य गरी जिल्लाभरिमा स्थानीय तहमा ८ सय २१ जना पदाधिकारी निर्वाचित हुने जिल्ला निर्वाचन कार्यालयले जनाएको छ ।

निर्वाचनको लागि जिल्लाभरिमा २ सय ७७ मतदान स्थल, ४ सय ३४ मतदान केन्द्र तोकिएका छन् । यस पटकको स्थानीय तहको निर्वाचनमा १ लाख ७५ हजार ६४ जना पुरुष र १ ला ४५ हजार ९ सय ५४ जना महिला गरी ३ लाख २१ हजार २८ जना कुल मतदान गर्ने छन् ।

धनुषाको दृश्य

प्रकाशित : भाद्र २१, २०७४ १८:३४
प्रतिक्रिया
पठाउनुहोस्

क्यान्सर लागेपछि जीवनको महत्व बुझें : मनिषा

प्रशान्त माली

ललितपुर — अभिनेत्री मनिषा कोइरालाले आत्मबल बढाउन सके क्यान्सर लागे पनि रोगलाई जित्न सकिने बताएकी छन् ।

पाँच वर्षअघि डिम्बासयको क्यान्सरको अन्तिम चरण (चौथो चरण)मा पुगेर पनि क्यान्सरलाई जित्न सकेकी अभिनेत्री कोइरालाले भनिन्, ‘क्यान्सर लाग्यो भनेर हरेस खान हुँदैन ।’ नेसनल हस्पिटल एन्ड क्यान्सर रिसर्च सेन्टर जावलाखेल तथा क्यान्सर केयर नेपालको संयुक्त आयोजनामा मंगलबार ललितपुरमा आयोजित डिम्वासय क्यान्सरबारे जनचेतनामूलक अन्तर्क्रियामा अभिनेत्री कोइरालाले सन्तुलित आहार, सरल र सुखी जीवनशैली, नियमित योगाभ्यास र सकारात्मक सोचले क्यान्सर लागेका बिरामीको आयु बढाउने बताइन् ।

क्यान्सर रोगको नामै सुन्दा डर लाग्ने, जटिल रोग, यसको पीडा, त्यसपछिका भोगाईले बिरामीलाई स्वाभाविकरुपमा चिन्तित बनाउने बताउँदै उनले भनिन्, ‘यसमा परिवार र समाजले पनि हौसला र सहयोग गर्नु जरुरी छ ।’हिन्दी फिल्म खेल्ने तयारीमा रहेकी कोइराला अहिले विभिन्न ठाउँमा गएर क्यान्सरबारे जनचेतना फैलाउँदै आएकी छन् । उनी संयुक्त राष्ट्रसंघीय खाद्य, जनसंख्या तथा कृषि कार्यक्रम युएनएफपिएको सद्‌भावना दूत पनि हुन् ।

अन्तर्क्रियामा पूर्वस्वास्थ्यमन्त्री गगन थापाले क्यान्सर महँगो रोग भएकोले यसको उपचारमा आर्थिक भार धेरै लाग्ने बताए । त्यसैले आफ्नो कार्याकालयमा आफूले स्वास्थ्य विमाको नीतिका साथै सरल र सुलभ औषधि उपचारको नीति अघि सारेको उनले बताए ।

क्यान्सर केयर नेपालकी कार्यकारी सदस्य एवं वीर अस्पतालको अंकोलोजी विभागकी क्यान्सर विशेषज्ञ डा.सन्ध्या चापागाईंले डिम्वाशय र डिम्वनलीको क्यान्सरका कारण विश्वमा मर्ने महिलाहरुको संख्या पाँचौ नम्बरमा भए तापनि नेपालमा भने चौथो नम्बरमा रहेको बताइन् । ‘यस्ता रोगीलाई क्यान्सर लागेको पहिलोचरणमै उपचार गर्नसके ९० प्रतिशत र चौथो चरणमा पुगेको बेलामा उपचार गरे १७ प्रतिशतमात्रै बाँच्छन्,’उनले भनिन् ।

नेसनल हस्पिटल एन्ड क्यान्सर रिसर्च सेन्टर जावलाखेल तथा क्यान्सर केयर नेपालका कार्यकारी अध्यक्ष एवं क्यान्सर रोग विशेषज्ञ डा. मदनकुमार पियाले महिलाहरुको डिम्वाशयको क्यान्सरका विरामी दिनप्रतिदिन बढीरहेको हुनाले महिलाहरुलाई सहभागी गराई यसबारे जनचेतना फैलाउन कार्यक्रम आयोजना गरेको बताए ।

प्रकाशित : भाद्र २१, २०७४ १८:३४
पूरा पढ्नुहोस्
प्रतिक्रिया
पठाउनुहोस्