अफरोड यात्रा [फोटोफिचर]

सुरज कुँवर

काठमाडौं — हिमालपारिको माथिल्लो मुस्ताङ पहिलोपटक घुम्न उक्लिनेले प्राय: दिमागमा मध्यपहाडी भूगोलको चित्र बनाउँछन् । तर, हामी अधिकांशले कल्पना गरेजस्तै चित्र माथिल्लो मुस्ताङको भूगोलसँग ठ्याक्कै मेल खाइहाल्दैन । सुनिएको र कल्पना गरिएभन्दा यो अनौठो छ । अदभुत र अलौकिक भएकाले धेरैले यो थलोलाई स्वर्गको टुक्रा उपमा दिन्छन् ।

कतैकतै पातलो बुट्यान, मरुभूमिजस्तै भूबनोट, पातलो मानव बस्ती, भेडा/चौंरीपालन, कृषि प्रणाली, जनजीवन ताजुबलाग्दो छ । मुस्ताङी राजाको ऐतिहासिक दरबार, एउटै लहरमा बसेका बस्ती, आतिथ्य, तिब्बती कला/संस्कृति, लो वंशको थातथलो यहाँका दुर्लभ गहना हुन् । जब पर्यटकीय आखाँले यो ठाउँ हेर्न थालिन्छ । तब हृदयमा अनौठो भाव उब्जिन्छ ।

यो थलो अहिले पनि नेपाल सरकारको ‘रेस्ट्रिक्टेड’ सूचीमा छ । अर्थात नेपालीबाहेक विदेशीहरूले यहाँ पुग्न साताको ५ सय डलर थप शुल्क तिर्नुपर्छ । तिब्बती शरणार्थीले चलाएको खम्पा विद्रोहपछि तत्कालीन नेपालको सरकारले विदेशीहरूलाई निर्बाध घुमफिरका लागि रोक लगाएको ५८ वर्ष पुगिसकेको छ ।

इम्याजिन नेपालले मनाङपछिको दोस्रो ‘अफरोड फोर ह्विल ड्राइभ’ यात्रा यहाँ गरेको थियो । एलियनलाई मुख्य पात्र बनाइएका अंग्रेजी सिनेमा देखिने एनिमेटेड स्थानजस्तै लाग्ने यो उपल्लो थलोमा कात्तिक अन्तिम साता काठमाडौंबाट दुई दर्जन गाडीमा हामी मुस्ताङको अन्तिम गाउ लोमान्थाङ पुग्यौं । हाम्रो समूहमा ८३ नेपाली थिए ।

‘सयम नहुने कर्पोरेटम्यान, धनाढ्य र स्वास्थ्य समस्याका कारण पदयात्रामा निस्किन नसक्नेहरूका लागि’ अफरोड अति ‘एडभेन्चर’ यात्रा हो । नेपालका प्राय: हिमाली भेग पछिल्ला वर्ष धमाधम सडक सञ्जालसँग जोडिँदै गएका छन् । यस्ता धुलाम्मे तथा हिउँद याममा मात्रै चल्ने रुटमा अहिले सहरी क्षेत्रबाट दुई/चारपांग्रे मोटरमा यात्रा (अफरोड ट्राभल) गर्ने प्रचलन बढेको छ । पर्यटन बोर्डका सीईओ दीपकराज जोशीका अनुसार, २/४ वर्षयता यो विधामा आन्तरिक र बाह्य पर्यटक 
ह्वात्तै बढेका छन् । नेपालीहरूले यसका लागि मलेसियालगायतका खाडी मुलुकमा जस्तो कृत्रिम अफरोड बनाउनु पर्दैन । उपल्लो मुस्ताङ, मनाङ, डोल्पालगायतका भूभाग हाम्रालागि अमूल्य प्राकृतिक वरदान हुन् ।

लोमान्थाङले यसको भरपूर फाइदा लिएजस्तो लाग्यो । किनकि यहाँ जोमसोमबाटै पदयात्रा गर्ने पर्यटक मात्रै देखिएनन्, काठमाडौं, पोखरा, बुटवललगायतका सहरबाटै अफरोड यात्रामा निस्किएकाहरू भेटिए । काठमाडौंबाट पोखरा हुँदै कालिगण्डकीको किनारैकिनारको सडक भएर जोमसोम, कागबेनी हुँदै करिब ५ सय किलोमिटरको यात्रापछि हामी नेपाल र तिब्बतको सिमाना कोरला नाकासम्मै पुग्यौं ।

बेनीदेखि सुरु हुने अक्करे भीरको कच्ची सडक रेखा जब कागबेनीपारिबाट माथि उजाड डाँडामा उक्लियो मलाई भने झनै डर लाग्यो । एकाएक मन झस्काउने, अक्कर, खोच, पठार हुँदै उक्लिएको सडकमा धेरैपटक मुटु उफ्रेर बन्द होलाजस्तो आभास भयो । हाम्रो टिमको एउटा गाडी पल्टियो । धन्न मानवीय क्षति भएन । 

२७ सय मिटर उचाइको जोमसोमदेखि माथि ३८ सय मिटरको लोमान्थाङ र ४८ सय मिटर उचाइको कोरला नाका पुग्दा ‘हाई अल्टिच्युट सिकनेस’ (लेक लाग्ने) समस्याले प्राय:लाई सताउँछ । यो समस्याले हाम्रै यात्रामा दुई जना प्रभावित बने । एक जनालाई हेलिकप्टरबाट काठमाडौं र अर्का एक अफरोड मोटर चालकलाई मध्यरातमा चिकित्सकसहित जोमसोम ओराल्नुपर्‍यो ।

आफैं मोटर हाँकेर तेस्रो दिन माथिल्लो मुस्ताङ पुगेका कलाकार प्रशान्त ताम्राकार लामोन्थाङमा भन्दै थिए, ‘यो बाटो भनेको वान मिस्टेक गेम ओभर’ हो । त्यसैले फोर ह्विल ड्राइभका लागि यो रुटमा आउनेले आत्मालाई स्टेरिङ र ब्रेकसँग कनेक्सन गरेर मात्रै ड्राइभ गर्नुपर्ने उनको सुझाव थियो । यात्रामा साथै रहेकी नेपाल सुन्दरी सदीक्षा श्रेष्ठ पोखरामा आइपुगेपछि खुसी हुँदै भन्दै थिइन्, ‘काठमाडौंमा रहेकी मेरी आमा आत्तिनुहोला भनेर बाटोको कुनै पनि फोटो सोसल मिडियामा अपलोड नै गरिन् । यति हुँदाहुँदै पनि यो अफरोड एडभेन्चर धेरै कोणबाट स्मरणीय रह्यो ।’ आन्तरिक पर्यटन प्रवद्र्धन गर्ने मुख्य उद्देश्य रहेको यो यात्रामा हामीसँग मोटर बिग्रिहाले बनाउने प्राविधिक, उपचार गर्ने चिकित्सक औषधि पनि साथै थिए । अप्ठयारो बाटोमा बेलाबेला उब्जिएको डरभित्र पैदा भएको बेग्लै खाले रमाइलो भने ज्यादै स्मरणीय रहयो । किनकि यो चारपांग्रे अफरोड यात्रा थियो ।

 

प्रकाशित : मंसिर ९, २०७४ १२:१२
ADVERTISEMENT
ADVERTISEMENT
प्रतिक्रिया
पठाउनुहोस्

प्रमुख निर्वाचन आयुक्त अनुगमनका लागि डोल्पा

कान्तिपुर संवाददाता

डोल्पा(दुनै) — निर्वाचनको मतदानका लागि १ दिन मात्र बाँकी रहेको बेला निर्वाचन आयोग नेपालका प्रमुख आयुक्त निर्वाचन अनुगमनका लागि डोल्पा पुगेका छन् ।

निर्वाचनको तयारीको अनुगमन गर्न नेपाली सेनाको सानो हेलिकप्टरबाट प्रमुख निर्वाचन आयुक्त अयोधिप्रसाद यादव आयोगका सहसचिव सुशील कोइरालासहित डोल्पा पुगेका छन् । बिहान साढे १० बजे हेलिकप्टरबाट डोल्पाको सदरमुकाम दुनै पुगेका यादव नेपालकै गहिरो ताल फोक्सुण्डो अवलोकनका लागि हेलिबाट दुनै ओर्लेको ५ मिनटमै पुन: उडान भरेर फोक्सुण्डो तालतर्फ लागेका छन् ।

फोक्सुण्डो ताल अवलोकन गरी फर्केपछि दुनैमा अन्तर्क्रिया गर्ने भनिएको छ । दुनैमै बिहानको खाना खाएलगत्तै फर्कने कार्यक्रम रहेको जिल्ला निर्वाचन कार्यालय डोल्पाले जनाएको छ ।

प्रकाशित : मंसिर ९, २०७४ ११:३३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT