नुवाकोट दुप्चेश्वर मेलाका तस्बिरहरु

कृष्ण थापा

दुप्चेश्वर (नुवाकोट) — धान्यपूर्णिमाको अवसरमा दुप्चेश्वर गाउँपालिका ६ मा रहेको दुप्चेश्वर महादेवमा मेला लागेको छ ।सिन्धुपाल्चोक, रसुवा, धादिङ, चित्तवन, काठमाडौं, भक्तपुरलगायत जिल्लाबाट भक्तजनको भीड लागेको छ । भीड नियन्त्रण गर्न नेपाल प्रहरी र म्यादी परिचालन गरिएको छ ।

धान्यपूर्णिमाको अवसरमा दुप्चेश्वर गाउँपालिका ६ मा रहेको दुप्चेश्वर महादेवमा मेला लागेको छ ।

सिन्धुपाल्चोक, रसुवा, धादिङ, चित्तवन, काठमाडौं, भक्तपुरलगायत जिल्लाबाट भक्तजनको भीड लागेको छ । भीड नियन्त्रण गर्न नेपाल प्रहरी र म्यादी परिचालन गरिएको छ । भीड भए पनि सुरक्षा अवस्था कडा र चुस्त रहेको खटिएका प्रहरी सही लेखनाथ आचार्यले बताए । यहाँ एकादशीदेखि मेला सुरु भएको हो ।

मेलामा हिन्दू र बौद्ध सम्प्रदायको मिश्रण देखिने दुप्चेश्वर क्षेत्र विकास समिति अध्यक्ष किशोर आचार्यले बताए । मेलालाई व्यवस्थित गर्न सीसीटीभी समेत जडान गरेर भक्तजनलाई सेवा दिइरहेको उनले बताए । आफूले चिताएको मनोकांक्षा पूरा हुने, सन्तान प्राप्ति हुने, बोल्न नसक्ने बालबालिका बोल्ने, वस्तुभाउ सप्रिने विश्वासले भक्तजनको ओइरो लाग्ने गरेको छ । त्यसैगरी धामी–झाँक्रीहरु विधिअनुसार महादेवबाट शक्ति सिद्ध गर्न ढ्याङ्ग्रो बजाई पूजा गरिरहेका छन् ।

सयौं वर्षअघि एक स्थानीय गोठालाको दूध दिने गाई हराएछ । खोज्ने क्रममा भीरको पहराबाट गाई कराछन् । लहरामा झुण्डेर माथि भीरको बीच थलीमा गाईको थुनबाट महादेवको शिलामाथि दूध दिएको दृश्य देखे । गोठालाले बाच्छो कराएर मर्न लाग्यो, तपाईलाई यही गाईको दूधसहित पूजा गर्न आउला भनेपछि गाई गोठमै देखा परिन् । भोलिपल्ट गोठालाले दूधसहित पूजा गरे । त्यतिबेलाबाट दुधेश्वरबाट दुप्चेश्वर महादेव उत्पत्ति भएर प्रशिद्धी पाएको किम्बदन्ती रहेको समिति अध्यक्ष आचार्यले बताए । दुप्चेश्वरथान शिखरबेंसी पारि पहरामा छ । यहाँसम्म सडक सञ्जालले पुगेको छ ।

तीर्थयात्रीहरुलाई खानको लागि अस्थायी छाप्रा पसलहरु तादी खोला किनार र वरिपरिका खेत गह्रामा खुलेका छन् । बासको लागि अस्थायी टहरा बनाइएको छ । स्थानीय समुदायले डोका, डाला, थुन्से, नाङ्लोलगायत वस्तु बिक्री गरिरहेका छन् । त्यसैगरी शिखरबेंसी प्रशिद्ध चामल, फलफूल किनबेच भइरहेको छ । मेलामा बाहिरका व्यापारीले भरिएपछि स्थानीय निराश देखिएका छन् । बालबालिका लागि रोटे पीङ लगायत मेलाको आकर्षण बनेको छ ।

प्रकाशित : मंसिर १७, २०७४ १८:४३
ADVERTISEMENT
प्रतिक्रिया
पठाउनुहोस्
ADVERTISEMENT

भाइरलको प्रकोपबाट एक महिनामा १२ को मृत्यु

औषधिसहित स्वास्थ्यकर्मी परिचालन, प्रभावित क्षेत्रमा औषधि अभाव
राजबहादुर शाही

मुगु — जिल्लाभर भाइरल ज्वरोको प्रकोप बढ्दै गएको छ । भाइरल ज्वरोका कारण एक महिनाको अबधिमा १२ जनाको मृत्यु भएको जिल्ला जनस्वास्थ्य कार्यालयले जनाएको छ । छायाँनाथ नगरपालिका, खत्याड र सोरु गाउँपालिकाका केही बस्तीमा कडा भाइरल ज्वरो फैलिएको छ । घरघरै बिरामी थला परेका छन् ।

भाइरल ज्वरोबाटै यो साता रिघा गाउँका ६५ बर्षीय बिउरासर पाण्डे, ४४ बर्षीय बिष्णु जैसी र ७५ बर्षीय ऋषिसन्न उपाध्याय र सुकाढिक गाउँकी ५५ बर्षीय पूर्वा कार्कीको मृत्यु भएको छ । कार्तिक दोस्रो सातादेखि अन्तिमसम्म सेरी साटबाड गाउँका ५९ बर्षीय सिहबहादुर बुढा, खमाले कवाकी ४२ बर्षीय मागी रोकाया, पैखुगाउँका ५६ बर्षीय धनसिंह थापा र ६५ बर्षीय दलसुर थापाको मृत्यु भएको थियो । मंसिर पहिलो साता छायाँनाथ रारा नगरपालिकास्थित श्रीनगर गाउँकी ६५ बर्षीया कलादेबि मल्ल, इमा गाउँका ७५ बर्षीय बउदे खडा, ढुम गाउँकी ७२ बर्षीय लालशोभा बुढा र जउमति सेजुवालको मृत्यु भएको जिल्ला जनस्वास्थ्य कार्यालयले पुष्टि गरेको छ । कार्यालयका अनुसार सोरु गाउँपालिकाको नार्थपु जडेपानी गाउँका ६२ बर्षीय छत्तबहादुर मल्ल, फोतु लिब्रु गाउँकी ७० बर्षीय फुल्ती बुढा र ६० बर्षीय हरिनी दमाईको भाइरल ज्वरोले ज्यान गएको हो ।

जिल्लाभरी ज्वरोका कारण १२ जनाको मृत्यु भएको कार्यालयका एचए बलीबहादुर बुढाले बताए । मृत्यु हुनेहरुमा अधिकाश दमका रोगी भएको उनको भनाई छ । करिव डेढ सय घरधुरी रहेको रिघा गाउँमा भाइरल ज्वरो फैलिंदा गाउँका अधिकांश बिरामी छन् । बिरामीलाई स्यहारसुसार गर्ने समेत मान्छे नभएको रिघा गाउँकी कुसुमकली उपाध्यायले बताइन् । औषधि नपाउँदा ज्यान बचाउन मुश्किल भएको उनको भनाई छ ।

नगरपालिकाको करिव तीन सय घरधुरी रहेको भामबाडा गाउँमा पनि अधिकांश घरमा बिरामी छन् । कडा ज्वरो आउने, टाउको दुख्ने, घाँटी पाक्ने, पेट दुख्ने, रिगंटा लाग्ने, बान्ता आउने, खाना खान मन नलाग्ने जस्ता लक्षण बिरामीमा देखिने गरेका छन् । अधिकांशको उपचार अभावमा ज्यान गएको हो । भाइरल ज्वरो फैलिएका क्षेत्रमा स्वास्थ्य केन्द्र भएपनि औषधि नभएको स्वास्थ्यकर्मीको भनाइ छ । भाइरल ज्वरोले सबैभन्दा बृद्धबृद्धालाई असर गरेको कार्यालयले जनाएको छ ।

भाइरल ज्वरो नियन्त्रणका लागि जिल्ला अस्पतालबाट अहेव ज्ञानसिह बुढासहितको स्वास्थ्यकर्मीको टोली औषधिसहित प्रभावित क्षेत्रमा खटिएको निमित्त प्रमुख जिल्ला अधिकारी मोहन केसीले जानकारी दिए । मौसम परिर्वतनसंगैको चिसो, फोहर वातावरण, दुषित खाना र पानीका कारण भाइरल ज्वरो फैलिएको चिकित्सकको भनाई छ । जिल्लामा महामारी नियन्त्रणका लागि निकासा भएको दुई लाख रकमको औषधि खरिद गरि प्रभावित क्षेत्रमा पठाइएको निमित्त जिल्ला स्वास्थ्य अधिकृत धनप्रसाद शर्माले बताए ।

प्रकाशित : मंसिर १७, २०७४ १८:१८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT