चुनावको उल्लास [फोटोफिचर]

मनोज पौडेल, हरिहरसिंह राठौर

कपिलवस्तु, धादिङ — मतगणनास्थल बाहिर फूलमाला र अबिर खरिद गर्नेको उत्तिकै भीड छ । समर्थकहरु डिजे बजाउँदै खुसीयाली साटासाट गरिरहेका छन् । बाटोभरि अबीर र फूलमाला भरिएको छ । बजारभरि चुनावकै चर्चा परिचर्चा छ ।

सदरमुकाम तौलिहवामा निक्कै उल्लासको वातावरण छ । कतिपय उम्मेदवार चुनावमा विजयीसँगै विजयी जुलुस निकालेका छन् । कतिपय मतदाता भने आफ्नो उम्मेदवारको मत कति आयो भनेर टिपिरहेका छन् । मतगणना पनि भइरहेको छ ।

धादिङ

यसैत एमालेको गढ मानिने धादिङ, झनै वाम गठवन्धनले २ वटै निर्वाचन क्षेत्रका सबै सीटमा विजय हासिल गरेपछि सदरमुकाम राताम्मे बन्यो । मतगणना गर्दा देखि नै अग्रता लिएको वाम गठवन्धनले सबै पदमा जितेको खबर पाएपछि गाउँगाउँबाट झरेका कार्यकर्ताहरुले सदरमुकाम राताम्मे बने । बाजागाजा, हातमा झन्डा, राता टिसर्टले निकालेका विजय जुलुस र मोटरसाइकलको हर्नले सदरमुकाम बजार गुन्जायमान बनाइए । जुलुसमा लगातार ३२ वर्षदेखि धादिङको वाम राजनीतिमा एकछत्र राज गरी पाँचौं पटक विजय भएका नेकपा एमालेका पोलिटव्युरो सदस्य राजेन्द्रप्रसाद पाण्डे, भूमि त्रिपाठी, वामगठवन्धनमा माओवादी केन्द्रका विजयी मजदुरका नेताहरु शालिकराम जमकटेल र जगत सिंखडा समेत कार्यकर्ताले घेरिएका थिए ।

प्रकाशित : मंसिर २४, २०७४ १३:३५
ADVERTISEMENT
प्रतिक्रिया
पठाउनुहोस्

गाली पनि भोट पनि तिनैलाई

सामाजिक सञ्जालमा मात्र होइन, जताततै भेटिन्छन् नेतालाई गाली गर्नेहरु
कान्तिपुर संवाददाता

काठमाडौं — सामान्यत आम मानिसको आक्रोश दल र तिनका पनि ठूला नेतासंगै देखिन्छन् । सामाजिक सञ्जालमा देखा पर्ने आक्रोश मात्र होइन, जो कोहीसंग सोध्ने हो भने पनि ठूला नेताका बारेमा राम्रो प्रतिक्रिया हम्मेसी आउँदैन । तर, तिनै शीर्ष नेताहरु चुनावमा जित्छन्, त्यो पनि भारी मतान्तरमा ।

धेरै गाली पाउने मध्येका एक हुन्, नेपाली कांग्रेसका सभापति तथा प्रधानमन्त्री शेरबहादुर देउवा । उनको देश विगारे भन्ने त छँदैछ, उनको कार्यशैली, ब्यावहार र बोलीको खिसी ट्यूरी गर्ने संख्या ठूलो छ । तर, उनले गृह जिल्ला डढेल्धुराबाट भारी मतान्तरमा चुनाव जितेका छन् । उनले आफ्न प्रतिद्वन्द्वी बाम गठबन्धनका तर्फबाट उम्मेदवार बनेका खगराज भट्टलाई करिव ७ हजारको मतान्तरमा पराजित गरे । देउवाले
२८०४४ र भट्टले २१११५ मत पाए । उनले निरन्तर चुनाव जितिरहेकै छन् ।

यस्तै गाली व्यहोर्ने मध्येमै पर्छन्, एमाले अध्यक्ष केपी ओली । उनको प्रधानमन्त्री कालमा उनको भनाई र बोलीलाई नउडाउने कमै थिए । भाषणमा प्रशस्त उखान–टुक्का प्रयोग गर्नले उखाने नेत भन्नेहरुको पनि कम छैन । उनलाई पनि धेरैले काम नगर्ने ठूला कुरा गर्ने नेता भेनेर गाली गरिरहकै भेटिन्छन्, सामाजिक सञ्जालमा मात्र होइन, सडकमै पनि । तर, ओलीले देउवाले भन्दा पनि धेरै मतान्तरमा चुनाव जित्न लागि रहेका छन् । प्रतिद्वन्द्वी डा. खगेन्द्र अधिकारीले २५९७० मत ल्याउँदै गर्दा उनले ४९६५५मत ल्याइसकेका छन् ।

माओवादी केन्द्रका अध्यक्ष पुष्पकमल दाहाल पनि कम गाली पाउने नेताहरुमा पर्दैनन् । कतिलाई उनले विगतमा गरेको सशस्त्र संघर्षका कारण, कतिले संविधान निर्माणमा क्रममा उनले खेलेको भूमिकाका कारण, कतिले सरकार बनाउन र गिराउन 'मुसा' प्रबृत्ति देखाएको मन परेन र गाली गर्छन् । सामाजिक सञ्जालमा पनि उनीमाथि खनिनेहरुको संख्या बाक्लै देखिन्छ । तर, मतदानका बेला त्यो देखिएन । चितवन– ३ मा निर्वाचन लडेका उनले पनि चार हजार भन्दा बढी मतले निक्कै बलिया मानिएका राप्रपाका विक्रम पाण्डेलाई उछिनिरहेका छन् । पाण्डेले १२१३५ मत ल्याउँदा दाहालले १६४९६ मत ल्याएका छन् ।

अव मधेसवादी दलकै नेताहरुको कुरा गरौं । संघीय समाजवादी फोरमका अध्यक्ष उपेन्द्र यादवले सप्तरी–२ बाट वाम गठबन्धनका उमेशकुमार यादवलाई १० हजार मतान्तरले जितेका छन् । वाम गठबन्धनका उमेश कुमार यादवले ११५८० मत ल्याउँदा उपेन्द्र यादवले २१६२० मत ल्याए । त्यसैगरी राजपाका अध्यक्ष मण्डलका राजेन्द्र महत्तोले धनुषा–४ मा कांग्रेसका नेता विमलेन्द्र निधिलाई पराजित गरेका छन् । महतोले ३०७४२ मत ल्याउँदा निधि २७८२८ मत ल्याए ।

राजपाका अन्य नेताहरु पनि जितको संघारमा छन् । महोत्तरीबाट महन्त ठाकुर र शरतसिं भण्डारी जितको संघारमै पुगेका छन् । गोरखाबाट नयाँ शक्ति पार्टीका संयोजक बाबुराम भट्टराईले माओवादी केन्द्रका नेता नारायणकाजी श्रेष्ठ पराजित गरेका छन् । काठमाडौं –१ बाट कांग्रेस नेता प्रकाशमान श्रेष्ठ, २ बाट एमाले नेता माधवकुमार नेपाल पनि यसरी एकतिर गाली पाउने अर्कोतिर भोट पाउने नेतामा परेका छन् ।

प्रकाशित : मंसिर २४, २०७४ १३:१५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT