रसुवागढीमा बिजोग [फोटोफिचर]

शब्द/तस्बिर : बलराम घिमिरे

रसुवा — चीन जोड्ने एकमात्र रसुवागढी नाकामा महिनादेखि यातायात ठप्प छ । नाका नजिकैको पहिरो, घट्टेखोलाको पुललाई बाढीले पुर्‍याएको क्षति र गोसाइँकुण्ड गाउँपालिका ५ को खोपाङ भीरको पहिरोले यातायात अवरुद्ध भएको हो । बाढीबाट क्षति पुगेको पुल मर्मतमा ढिलाइले साउन १२ देखि नाकामा यातायातका साधन चलेका छैनन् ।


प्रकाशित : भाद्र १३, २०७५ १८:२७
यातायात ठप्प भएपछि तीज, दसैं, तिहारजस्ता चाडपर्वका लागि नेपाल ल्याउन लागिएका अर्बौं मूल्यका स्याउ, लसुनलगायत सामान चीनको केरुङमा थन्किएका छन् । ती सामान कुहिन थालेको व्यवसायी टपिन्द्र तिमिल्सिनाले बताए । उनका करिब १ हजार २ सय कन्टेनरबराबरको सामान केरुङमा थन्किएका छन् । यसबाट व्यवसायीले करोडौंको घाटा व्यहोर्नुपर्ने अवस्था छ ।

Yamaha

यातायात रोकिएपछि दैनिक करोडौं राजस्व असुल हुने रसुवा भन्सार सुनासान छ । महिना दिनदेखि भन्सारमा राजस्व नउठेको प्रमुख भन्सार अधिकृत गोपाल कोइरालाले बताए । स्याउलगायत कुहिने सामग्री व्यवसायीले भरिया लगाएरै राजधानी ल्याउने पनि गरेका छन् । स्याउ कुहिन थालेपछि मान्छेलाई बोकाएर ल्याउन परेको स्वर्णीम इम्पोर्ट एक्स्पोर्ट प्रालिका प्रोपाइटर सारदा पराजुलीले बताए । करिब ७ सयमा बिक्री हुने १ कार्टुन स्याउ अहिले काठमाडौंमा २ सय ५० मा बिक्री गर्नु परेको उनले दुखेसो पोखे । अर्कोतिर केरुङको गोदाममा राखिएका र कन्टेनरमा लोड गरिएका सामान असुरक्षित हुने गरेको व्यवसायी शैलेश पौडेल बताउँछन् । उनले भने, ‘लोड गरिएका कन्टेनरका सामान चोरी हुन थालेको छ ।’ केरुङमा रहेको ४ कन्टेनरबाट सामान चोरी भएको उनले बताए । अन्तर्राष्ट्रिय नाका जोड्ने सडक मर्मतमा सडक विभागले चासो नदिएको व्यापारीहरुको गुनासो छ ।

यातायात अवरुद्ध हुँदा एकातिर व्यापारीले लाखौं घाटा व्यहोरिरहेका छन् अर्कातर्फ सरकारको राजस्व संकलन प्रभावित भएको छ । जिल्लाको उत्तरी भेगका स्थानीय बासिन्दा, चिनियाँ पर्यटक र मानसरोवर जाने तीर्थयात्रीहरू समेत मर्कामा परेका गोसाइँकुण्ड गाउँपालिका २ का वडाध्यक्ष दावादार्जे तामाङले बताए । रसुवागढी नाका हुँदै चीनको कैलाश मानसरोवर जाने भारतीय तीर्थयात्रीहरू महँगो शुल्क तिरेर हेलिकप्टर चार्टर्ड गर्न बाध्य छन् । डिभिजन सडक कार्यालय नुवाकोटले पनि सडक खुलाउन आलटाल गरेको तामाङको आरोप छ । नाका बन्द भएपछि स्थानीय होटलसमेत खाली भएका छन् । घट्टेखोलामा होटल सञ्चालन गर्ने छेटेन शेर्पाले भने, 'चीनको कैलाश मानसरोवर जाने ५ ग्रुप भारतीय तीर्थयात्रीहरूले होटल बुकिङ पनि क्यान्सिल गरे ।' उनका अनुसार चिनियाँ पर्यटक आउनै छाडेका छन् ।

डिभिजन सडक कार्यालय नुवाकोटका प्रमुख निरज शाक्यले भने गोसाइँकुण्ड गाउँपालिकाको घट्टे खोला पुल मर्मत सकिएको बताए । उनले शुक्रबारदेखि पुलबाट यातायात सञ्चालन गर्ने तयारी भइरहेको बताए । सडक खुलाउन नेपाली सेनाको मध्य पृतनाअन्तर्गतको कालीप्रसाद गण र मैलु स्याफ्रुबेंसी सडक निर्माण कार्यदलको प्राविधिक टोली खटिहरेको छ । सडक मर्मतमा विभिन्न टोलीका गरी तीन दर्जन जनशक्ति खटिएका छन् । पहिरो पन्छाउन स्काभेटर र लोडर प्रयोग गरिएको छ ।

ADVERTISEMENT
प्रतिक्रिया
पठाउनुहोस्
ADVERTISEMENT

गोसाइँकुण्डमा भक्तजनको घुइँचो [फोटोफिचर]

शब्द/तस्बिर : बलराम घिमिरे

रसुवा — जनैपूर्णिमाका दिन धार्मिक तीर्थस्थल गोसाइँकुण्डमा सयौं भक्तजनहरुले स्नान गरेका छन् । भाद्र १ गतेबाट १० गतेसम्म गोसाइँकुण्डमा मेला लागेको थियो । यसवर्ष ८ देखि ९ हजार भक्तजनहरुले कुण्डमा स्नान गरेको गोसाइँकुण्ड क्षेत्र विकास समिति अध्यक्ष सञ्जीव डिएमले बताए ।

मेला भर्न जिल्लाका स्थानीय तथा नुवाकोट, गोरखा, सिन्धुपाल्चोक, धादिङ, काभ्रे, चितवन, मकवानपुर, सिन्धुली काठमाडौं उपत्यकालगायत देशैभरका हिन्दु तथा बौद्ध धर्मालम्बीहरु गोसाइँकुण्ड पुगेका थिए । कुण्डमा स्नान गर्दा आफूले चित्ताएको पूरा हुने र पितृ तर्ने विश्वासले आफू गोसाइँकुण्डमा स्नान गर्न आएको मकवानपुरका अमृतप्रसाद बोलखेले बताए । उनले भने, 'गोसाइँकुण्ड त पुन्यभूमि रहेछ ।'

जनैपुर्णिमाका दिन सबै देवी देवताहरुको गोसाइँकुण्डमा जमघट हुने भएकाले उक्त दिन कुण्डमा पूजा तथा स्नान गर्दा मनमा आनन्द हुने भक्तजनहरुमा विश्वास छ । भक्तजनहरुले कुण्डमा स्नान गरेपछि जनै फेर्ने र रक्षाबन्धन समेत गरेका थिए । बौद्धधर्मका भक्तजनहरु भने झाँक्रीसहित नच्दै कुण्डको परिक्रमा गर्दछन् । गोसाइँकुण्ड जीवनमा एक पटक पुग्नै पर्ने प्रसिद्ध धार्मिक तीर्थस्थल मानिन्छ । यो स्वदेश तथा विदेशमा समेत प्रसिद्ध छ । गोसाइँकुण्डमा प्रत्येक वर्ष जनैपूर्णिमामा विशेष मेला लाग्ने गर्दछ । पौराणिक कथनअनुसार परापुर्व कालमा देवता र दानव मिलेर समुन्द्र मन्थन गर्दा उत्पन्न कालकुट विष सेवन गरेका भगवान शिवले विषको डाह शान्त पार्न हिमालय खण्डको काखमा आई आफ्नो हातमा भएको त्रिशूलले भित्तामा हिर्काउँदा भिताबाट गंगाजल अर्थात् त्रिशूल धारा उत्पतिपछि धाराको पानी जम्मा भई गोसाइँकुण्ड बनेको भन्ने किम्बदन्ती पाइन्छ ।

रसुवा जिल्लाको गोसाइँकुण्ड गाउँपालिका ५ रहेको प्रसिद्ध तीर्थस्थल लाङटाङ राष्ट्रिय निकुञ्जभित्र पर्दछ । यो गोसाइँकुण्ड समुन्द्र सतहदेखि ४ हजार ३ सय ८० मिटरको उचाईमा छ । यसको लम्बाई ६ सय मिटर छ भने चौडाई ३ सय ७० मिटर रहेको छ । नेपालका चार धाममध्ये एक धामको रुपमा परिचित गोसाइँकुण्डमा प्रत्येक वर्ष गंगादसहरा र जनैपूर्णिमा गरी वर्षको २ पटक विशेष मेला लाग्ने गर्दछ । जैविक विविधताले भरिपूर्ण गोसाइँकुण्डलगायत वरपरका अन्य कुण्डहरुलाई २०६४ साल असोज ६ गते रामसार साईटमा सूचीकृत गरिएको छ । गोसाइँकुण्ड वरिपरि भैरवकुण्ड, आमाकुण्ड, सूर्यकुण्ड, सरस्वतीकुण्ड, रक्तकुण्ड, चन्द्रकुण्ड, दूधकुण्डलगायत करिब १०८ वटा कुण्ड रहेको अनुमान छ । यस क्षेत्रमा १४ प्रजातिका लालीगुराँस, लोपोन्मुख वन्यजन्तु, विभिन्न प्रजातिका वनस्पति, चराहरु रहेका छन् ।

कुण्ड नजिकै अमरसिंह गुफा, अमरसिंहको चिहान रहेको छ । घट्टेखोला, देउराली, डिम्सा, चन्दनवारी, चोलाङपाटी, लौरीबिना, बुद्धडाँडा र गणेश गौंडाजस्ता ठाउँहरुबाट मनोरम दृश्यहरु अवलोकन सकिन्छ । यस वर्षको मेलामा नेपाली सेनाको कालिजंग गण, नेपाल रेडक्रस सोसाइटी नेपाल रसुवा शाखा, हिमालय उदार संघ, सक्षम नेपाल तथा जिल्ला स्वास्थ्य कार्यालय विभिन्न स्थानमा स्वास्थ्य राखेका थिए । कुण्डमा भक्तजनबाट हुने फोहर संकलन गर्न हरित युवा पर्यटन विकास समाज, नेपाल स्काउ, स्यामेवाङफेल माविका रेडक्रस जुनियर सर्कललगायत विभिन्न सामाजिक संस्था सक्रिय रहेका थिए ।


प्रकाशित : भाद्र १०, २०७५ १८:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT