छठमय तराई–मधेस (फोटोफिचर)

नदी पोखरीमात्र होइन छठी मातालाई केरा, मूला, अदुवा, नरिवल, पान, सुपारी, नाङ्लो, ढकी, चंगेरी, माटोको हात्ती किनमेलका लागि आउनेको भीडले हाटबजार भरिएका छन् । छठमा माटोको सामाग्रीले अत्यधिक बजार पाउँछ ।

सूर्यदेवको आरधना, उपसना र पूजाको यो पर्वमा केरा, उखु, नरिवल लगायतका फलफूल, बासद्वारा निर्मित नाङ्लो, ढकी, चंगेरी आवश्यक पर्छ । त्यसैगरी, माटोबाट निर्मित पाला, हात्ती, घैलालगायत सामग्री र महिलाले लगाउने वस्त्र, गरगहना चाहिन्छ । पर्वमा यी सामग्रीको खरीद बिक्रीले राम्रो कारोबार पाउँछ । छठ पर्वमा अर्घका रुपमा ठेकुवा, भुसुवा चढाइन्छ ।

सूर्यको उपासना गरी मनाइने छठ पर्व अन्तरगत आज दोस्रो दिन खरना मनाइदैँछ । आजकै दिन गाईको गोबरले लिपपोत गरी अरबा चामलको पिठोबाट तयार पारिएको झोलले भूमि सुशोभित गरी ब्रतालुहरु दिनभर उपवास बस्छन् ।

आजै बेलुकीपख चन्द्रमाको दर्शन गरिसकेपछि माटोको नयाँ चुल्हो र माटोकै नयाँ भाडामा सख्खर, दुध र गम्हरीको चामलको खिर पकाइन्छ ।

यो पर्वको पहिलो दिन नुहाएर चोखो भई खाने, दोस्रो खरना, तेस्रो दिन अस्ताउँदो र चौथो दिन उदाउँदो सूर्यलाई अर्घदिएपछि विधिवतरुपमा समापन हुन्छ । छठ पर्वमा व्रत गरे दु:ख र दरिद्रताबाट मुक्ति पाइने जनविश्वास छ ।