यस्तो देखियो एनआरएनए अस्ट्रेलियाको चुनाव (तस्बिरहरु)

नारायण खड्का

अस्ट्रेलिया — प्रवासी नेपालीहरूको सङ्गठन एनआरएन अस्ट्रेलियाको चुनाव सम्पन्न भएको छ । हरेक दुई वर्षमा हुने यस निर्वाचनले अर्को कार्यकालका लागि नयाँ नेतृत्व छनौट गर्नेछ ।

प्रकाशित : असार २१, २०७६ १५:३३

अस्ट्रेलियाको ६ वटा राज्य तथा दुईवटा टेरिटोरीमा एकै पटक आज आयोजना भएको निर्वाचन विद्युतीय प्रणालीबाट गरिएको थियो । निर्वाचनमा करिब ४ सय उम्मेदवारले नेतृत्वका लागि दाबेदारी प्रस्तुत गरेका थिए ।

११ हजार मतदाता रहेको यस निर्वाचनमा करिब ७५ प्रतिशत मत खसेको निर्वाचन आयोगले जनाएको छ । निर्वाचनमा एनआरएन अस्ट्रेलियाको नेतृत्व लिनका लागि समावेशी समूहबाट दिनेश पोखरेल र प्रगतिशील समूहबाट केशव कँडेल चुनावी मैदानमा उत्रिएका थिए ।

शनिबार सबै स्थानमा भएको निर्वाचनमा मतदानस्थलमा आउन नसक्ने केही मतदातालाई अनलाइन मतदानको समेत व्यवस्था गरिएको थियो । ८० बढी देशमा आफ्नो शाखा स्थापना गरिसकेको एनआरएनको सबैभन्दा धेरै सदस्य रहेको देश भएकाले समेत अस्ट्रेलियाको मतदानलाई चासोका साथ हेर्ने गरिएको छ । आज आयोजना गरिएको मतदानले नेपालमा हुने संसदीय निर्वाचनको झलक दिएको थियो ।

प्रतिक्रिया
पठाउनुहोस्

लिबियामा युद्धविराम गर्न राष्ट्रसंघको आग्रह

एएफपी

त्रिपोली — संयुक्त राष्ट्रसंघीय सुरक्षा परिषद्ले लिबियामा तत्काल युद्व विराम गर्न आग्रह गरेको छ । तीन महिनामै एक हजार भन्दा बढीको मृत्यु भएको जनाउदै सुरक्षा परिषद्ले युद्ध विराम गर्न शुक्रबार आह्वान गरेको हो । 

राजधानी त्रिपोलीनजिकै रहेको ताजौरामा गत मंगलबार भएको आक्रमणको घटनाप्रति पनि परिषद्ले निन्दा गरेको छ । सो आक्रमणमा परी मृत्यु हुनेको संख्या ५३ भन्दा बढी पुगेको विश्व स्वास्थ्य संगठन (डब्लूएचओ) ले जनाएको छ । ती मध्ये ६ जना बालबालिका रहेका छन् ।

घटनामा परी घाइते हुनेहरुको संख्या १३० रहेको पनि डब्लूएचओका अधिकारीहरुले शुक्रबार जानकारी दिएका छन् । त्यसैगरी अन्तर्राष्ट्रिय आप्रवासन संगठनका प्रवक्ता जोएल मिल्मानले घटनामा परी विभिन्न १७ देशका नागरिक मारिएको बताए ।

राजधानी त्रिपोलीको पूर्वी तजौरामा रहेको आप्रवासीहरु बस्ने ठाउँमा भएको हवाई आक्रमणलाई विभिन्न देश र अन्तर्राष्ट्रिय संघ संगठनहरुले विरोध जनाएका थिए । युरोप जानका लागि लिबियालाई बाटो बनाएकाहरु बसेको ठाउँमा आक्रमण भएको हो ।

लिबियामा पछिल्लो तीन महिनामा भएका विभिन्न आक्रमणका घटनामा परी पाँच सय भन्दा बढी घाइते भएका पनि डब्लूएचओले जनाएको छ । त्यसैगरी आक्रमणमा परेका वा त्यसबाट त्रसित भएका झण्डै एक लाख स्थानीय बासिन्दा आफ्नो घर छोडेर विस्थापित भएका छन् ।

प्रकाशित : असार २१, २०७६ १५:०८
पूरा पढ्नुहोस्
प्रतिक्रिया
पठाउनुहोस्