तरकारीको माला लगाएर सरकारको विरोध [तस्बिरहरु]

कान्तिपुर संवाददाता

काठमाडौँ — भारतबाट आयातित तरकारी तथा फलफूलमा हुँदै आएको विषादी परीक्षण सरकारले स्थगन गरेको विरोधमा नेपाल विद्यार्थी संघ (नेविसंघ) ले आन्दोलन थालेको छ । जनतालाई विषादीयुक्त आयातित तरकारी र फलफूल खान बाध्य पारिएको भन्दै नेविसंघले आइतबार काठमाडौंमा सरकारविरुद्ध प्रदर्शन गरेको हो ।


प्रकाशित : असार २२, २०७६ १३:३४

नेविसंघ सम्बद्ध विद्यार्थीहरुले प्रदर्शनीमार्गस्थित वाल्मीकि क्याम्पस अगाडि प्रदर्शन गरे । प्रदर्शनमा सहभागीले गोलभेँडा, लौका, बोडी गलामा झुन्ड्याएका थिए भने विभिन्न नारा लेखिएका प्लेकार्ड, व्यानर बोकेका थिए । सरकारले प्रयोगशाला अभाव देखाउँदै विषादी परीक्षण कार्य थालनी भएको दुई सातामै बन्द गराएको छ । सरकारको निर्णयपछि विभिन्न क्षेत्रबाट आलोचना भइरहेको छ ।

प्रतिक्रिया
पठाउनुहोस्

चीनमा म्यानपावर र कामदार युवतीबीच वार्ता

लक्ष्मी लम्साल

बेइजिङ — चीनको उत्तरपूर्वी ल्याउनिङ प्रान्तको ताङतोन सहरस्थित गार्मेन्ट कारखानामा अलपत्र परेका भनिएका ४४ नेपाली युवतीहरूको अवस्था बुझ्नका लागि सम्बन्धित म्यानपावर कम्पनी चीन आइपुगेको छ। शनिबार राति उत्तर कोरियाको सीमावर्ती सहर तानतोङ पुगेको काठमाडौं गौशाला, पिंगलास्थानमा रहेको कम्पास रिक्रुटमेन्ट म्यानपावरका २ जना प्रतिनिधि विवाद मिलाउनका लागि गार्मेन्ट कारखाना पुगेका हुन्।

गत मे १२ तारिखदेखि एक महिना काम गरेका युवतीहरू अहिले काम छोडेर गार्मेन्टकै परिसरमा बसिरहेका छन्। भनेअनुसार काम नभएको, तोकेअनुसारको तलब नभएको र सम्झौताभन्दा बढी काम लगाइएको भन्दै उनीहरू आन्दोलित भएका हुन्। एक महिनाको तलव पाएपछि उनीहरूले तलब कम भएको थाहा पाएका थिए भने कपडा प्याकिङको सट्टा मेशिन चलाउनुपर्ने, ८ घण्टा भनेपनि ११ घण्टासम्म काम गर्नुपरेको भन्दै उद्धारका लागि बेइजिङस्थित नेपाली राजदूतावास र म्यानपावरलाई गुहारिरहेका थिए।

आइतबारको वार्तामा उनीहरू अधिकांशले मेशिन चलाउनुपर्ने कामका लागि अदक्ष भएको भन्दै नेपाल फर्किने अडान लिएका छन्। वार्ताका लागि आएका म्यानपावर कम्पनीका प्रतिनिधि गिरिराज घिमिरे र राम कार्कीले आन्दोलित कामदारहरूलाई कारखानामै व्यवस्थापन गर्ने गरी वार्ता अघि बढाएका छन्। एक कामदार युवतीले कान्तिपुरलाई बताएअनुसार कम्पनी प्रतिनिधिले सकेसम्म मिलाएर राख्न खोजेका छन्। उनले भनिन्, ‘म्यानपावर कम्पनीका प्रतिनिधिनिहरूले सकेसम्म मिलाएर राख्न खोजिरहेका छन्। तर उनीहरूले कसरी मिलाउँछन् भन्ने कुरा वार्ता सकिएपछि मात्रै भन्न सकिन्छ।’

अलपत्र पारिएका भनिएका कतिपय युवतीहरू भने दुःखजिलो गरेर भएपनि काममा यथावत् रहने मनस्थितिमा पुगेका छन्। घरपरिवारबाट छुटिएर कामका लागि परदेश हिँडेका उनीहरू यत्तिकै घर नफर्किने बरू रोजगारदाताहरूले उचित व्यवस्थापन गरिदिएमा काम गर्ने पक्षमा देखिएका छन्।

बेइजिङस्थित नेपाली दूतावासले पनि सम्झौतामा तोकिएबमोजिम सेवा सुविधा दिनुपर्ने बताएको छ। सम्झौता विपरीत भएमा कामदार युवतीको मागबमोजिम स्वदेश फर्काइनुपर्ने पनि दूतावासले स्पष्ट पारेको छ।

आफूहरूलाई कामको प्रकृतिबारे झुक्याएर पठाइएको भन्दैआएका कामदार युवतीहरूले मेशिन चलाउने काम गर्न नजान्दा झन् समस्या परेको बताएका छन्। उनीहरू सो काममा अदक्ष भएपछि गार्मेन्ट मालिक र उनीहरूबीचमा झन् असमझदारी बढेको छ। त्यसमाथि चिनियाँ खानपान शैली र भाषिक कठिनाइका कारण चिनियाँ कम्पनीसँग व्यवहार गर्न असजिलो भएको पनि युवतीहरूको गुनासो छ।

प्रकाशित : असार २२, २०७६ १३:३२
पूरा पढ्नुहोस्
प्रतिक्रिया
पठाउनुहोस्