कालंगा जलविद्युत आयोजनामा तोडफोड, १५ करोडको क्षति (तस्बिरहरु)

वसन्तप्रताप सिंह

बझाङ — गत हप्ता सोमबार राति भएको युवती हत्याको घटनालाई लिएर आक्रोशित बुङ्गलका स्थानीयले निर्माणाधिन कालंगा जलविद्युत आयोजनाको विभिन्न स्थानमा तोडफोड गरेका छन् । तोडफोडबाट आयोजनामा १५ करोड बराबरको क्षति भएको आयोजना कार्यालयले जनाएको छ ।


प्रकाशित : असार २२, २०७६ १६:४३

स्थानीय महेन्द्र उच्च माध्यमिक विद्यालय र सुल्जन प्राथमिक विद्यालयका शिक्षक र विद्यार्थीहरूले शुक्रवार बिहानैदेखि आयोजनाका क्याम्प, गाडी तथा मेसिनहरुमा तोडफोड सुरु गरेका थिए । भिड नियन्त्रणमा लिनका लागि प्रहरीले पाँच सेल अश्रू ग्यास समेत प्रहार गरेको छ ।

उत्तेजक भिडले रनलेकमा रहेको मुख्य क्याप्प र कार्यालय, विराबगरमा रहेको निर्माण क्याम्पमा तोडफोड गरेर कार्यालय तथा बन्दोबस्तीका सामानहरुमा क्षति पुर्‍याएका छन् । यस्तै डोजर, टिपर र जिप समेत गरी १७ वटा सवारी साधन तोडफोड गरिएको आयोजनाका संस्थापक वीरेन्द्र मल्लले बताए । प्रशर्दनकारीहरुले प्रहरीको मोटरसाइकलमा समेत तोडफोड गरेका छन् ।

‘१५ करोड बराबरको क्षति छ’ मल्लले भने, ‘तोडफोड अझै चलिरहेको छ । हाम्रा मान्छेहरू त्यहाँबाट लखेटिएका छन् । अहिले पनि अवस्था सामान्य हुन सकेको छैन’ उनले हत्याको निहुँ बनाएर जलविद्युत आयोजनाको काममा अवरोध गर्न खोजेको बताए ।

सानी गाड, कालंगा र अपर कालंगा गरी तीनवटा खोलाको विभिन्न ठाउँमा एकै पटक निर्माणको काम भइरहेको यो आयोजनाको एक ठाउँमा भिड नियन्त्रण गरे अर्को ठाउँमा गएर तोडफोड गर्ने काम भैरहेकोले स्थिति नियन्त्रणमा लिन समस्या भएको र बढी क्षति भएको डीएसपी सूर्यबहादुर केसीको भनाई छ ।

गत हप्ता मङ्गलवार बिहान बुङ्गल नगरपालिका २ को खोचे भगाड भन्ने ठाउँको सडक किनारामा मृत अवस्थामा फेला परेकी बुङ्गल नगरपालिका २ की ललिता धामीको हत्याको विषयलाई लिएर आन्दोलन भएको हो । डडेलधुरा जिल्ला परशुराम नगरपालिकामा पर्ने जोगबुढाका माधव बोहराले हत्या स्वीकार गरी सकेका छन् । उनलाई प्रहरीले नियन्त्रणमा लिइसकेको छ । बोहरा कालंगा हाइड्रोमा एक्साभेटर अपरेटरको काम गर्दै आएका थिए ।

करिब ७५ मेगावाट क्षमताको यो जलविद्युत आयोजना निजी क्षेत्रको लगानीमा बन्दै गरेको देशकै पहिलो ठुलो आयोजना हो । तीन ठाउँमा एकै पटक संरचना निर्माण हुँदै गरेको यो आयोजनाको काम २०७७ साल असोजसम्म सकिने गरी थालिएको थियो । हाल सम्म आयोजनाको ७० प्रतिशत काम पुरा भैसकेको छ ।

प्रतिक्रिया
पठाउनुहोस्

कांग्रेस प्रमुख सचेतक बालकृष्ण खाँणको प्रश्न- सरकार लम्पसार परेको हो ?

कान्तिपुर संवाददाता

काठमाडौँ — नेपाली कांग्रेसका प्रमुख सचेतक बालकृष्ण खाँणले सरकारले लम्पसार परेको हो भन्दै प्रतिप्रश्न गरेका छन् । प्रतिनिधिसभा बैठकमा सोमबार विशेष समयमा बोल्दै नेता खाँणले सरकारले विषादीयुक्त तरकारीहरू भन्सारबाट आउन नदिने निर्णय गरेको केही दिनमै लम्पसार परेर फिर्ता गरेको आरोप लगाए ।

उनले सरकारले लम्पसारवादी नीतिलाई अगाडी बढाएको आरोप लगाए। भने,' शक्तिहरूको सामु सरकार निरीह र लम्पसार बनेको छ।'

संविधानमा खाद्य सुरक्षाको अधिकार उल्लेख भए अनुसार सरकारले अखाद्य वस्तुको नियन्त्रण गर्ने कदमलाई आफूहरुले समर्थन गरे पनि उक्त निर्णय केही दिनमै सरकार लम्पसार परेर फिर्ता लिएको नेता खाँणको भनाइ छ। उनले सरकारले नेपाली जनताको स्वास्थ्यमाथि खेलबाड गरेको र यसले गम्भीर स्वास्थ्य चिन्ह खडा गरेको बताए।

नेता खाँणले अखाद्य पदार्थहरु छ्याछ्याप्ती भएको भन्दै यस विषयमा सरकारको ध्यानाकर्षण गराए। उनले भने,'किन घुँडा टेकेर रोकेको कुरा खोल्नुभयो? सरकारले यसको जवाफ दिनुपर्छ। '

उनले संविधान प्रतिकल हुने गरी कुनै पनि विधेयक आफ्नो पार्टीले बन्न नदिने बताए। उनले सरकारले संविधान प्रतिकल अघि बढाएका विधेयकहरु फिर्ता गर्नुपर्ने नबताए।

यस्तै प्रमुख सचेतक खाँणले सरकारले सांसदका सदस्यहरूले बोलेका कुराहरूलाई गम्भीरतापूर्वक नलिएको बताए। सरकारले सदन र सभामुखको अवहेलना गरेको नेता खाँडको भनाइ छ।

उनले सभामुखले रुलिङ गरेको र सङ्घीय संसद्ले उठाएको विषयहरुमा सरकारलाई गम्भीर बन्न आग्रह गरे।

यस्तै नेता खाँणले सरकारले नागरिकको हत्या गरिरहेको आरोप लगाए। उनले सर्लाहीमा घटनामा सरकारले वैधानिक प्रक्रिया मिचेर मुठभेडको नाममा टाउकोमा गोली हानेर कुमार पौडेलको हत्या गरेको आरोप लगाए।

यस्तै बाँकेमा पनि प्रहरीले शान्तिपूर्ण रूपमा धर्नामा बसेकाहरुलाई टाउकोमा गोली ताकाताकी हत्या गरेको नेता खाँणले दाबी गरेका छन्। उनले यी घटनाहरुबारे गृहमन्त्रीले संसद्लाई जवाफ दिनुपर्ने बताए।

प्रकाशित : असार २२, २०७६ १५:४०
पूरा पढ्नुहोस्
प्रतिक्रिया
पठाउनुहोस्