मिलेमतोमा डिजेल भारतमै बिक्री

एकसाता अघि भारतको वरौनी डिपोवाट विराटनगर डिपोका लागि २० हजार लिटर डिजल लोड भएको ना४ख ८७३३ नम्बरको ट्याङकरका चालक कृष्ण यादवले १६ हजार लिटर भारतमा विक्री गरी ४ हजार लिटरमात्र नेपाल भित्र्याएको खुलेको छ । उनले सुनसरीको एक पम्पमा यहाँको मूल्यमा खरिद गरी ट्याङकर भरेर निगमलाई बुझाएका थिए । उक्त ट्याङकरको डिजेल निगमले अनलोड गरिसकेको छ । तर आयल निगम विराटनगर डिपो प्रमुख भानुभक्त खनालले यसवारे आफु अनविज्ञ रहेको बताए । ‘मैलेपनि भर्खर थाहा पाएर अनुसन्धान सुरु गरेको छु,’ खनालले भने ‘यो घटना जघन्य हो, अनुसन्धानमा पुष्टि भए ट्याङकरलाई कारवाही हुन्छ ।’ उक्त ट्याङ्कर विराटनगरका पेट्रोलीयम व्यवसायी केदार रिजालको हो ।

४ हजार लिटर डिजल भएको ट्यांकर लिएर चालक यादव सुनसरी दुहवीको अभिषेक विराट पेट्रोल पम्पमा पुगेका थिए । १६ हजार लिटर डिजल पम्पले नदिएपछि इटहरीको कृष्ण इन्टरप्राइजेज पम्प गएर भरेका थिए । यो पम्प रिजालकै हो । नेपालमा भन्दा भारतमा पेट्रोलियम पदार्थको मूल्य बढी भएका बेला यस अघि पनि यस्तै हुने गर्छ । निगमका कर्मचारी, पेट्रोलियम ढुवानी व्यवसायी र पम्पवालाको मिलोमतोमा यस्तो हुने गरेको जानकारहरू वताउँछन् । तर डिपो प्रमुख खनालले इन्धन भारतमा विक्री गर्न र नेपालवाट भारततर्फ भइरहेको इन्धन तस्करीमा आफनो संलग्नता नरहेको दावी गरे । चालकले त्यस्तो बदमासी गर्नै नसक्ने पेट्रोलियम ढुवानी व्यवसायीका अध्यक्ष गुणराज निरौलाको दावी छ ।

बरौनी डिपोमा नेपालकालागि पेट्रोलिमय पदार्थ लोड भएको ट्यांकरमा सिल लगाइन्छ । तर त्यो सिल बजारमा खरिद गर्न पाइने भएकाले चालकलाई इन्धन जहाँ पनि बिक्री गर्न सहज भएको सम्बद्ध व्यवसायीको भनाई छ । त्यसैगरी भारतमा इन्धन लोड गरेपछि बनाइने चलान पुर्जीमा उल्लेख भएअनुसारको इन्धन आए नआएको चेक जाँच गर्ने निगमको वयन ब्रिज (काँटा) एक वर्षदेखि विग्रिएको छ । जव नेपालमा भन्दा भारतमा डिजेल पेट्रोलको मूल्य बढ्यो तव उक्त काँटा बिग्रिएको थियो । निगम स्रोतका अनुसार उक्त काटा निगमका कर्मचारीको मिलोमतोमा बिगारिएको हो । उक्त कांटा विग्रिको एक वर्ष बितिसक्दा पनि निगमले बनाउने प्रयास समेत गरेको छैन । स्रोतका अनुसार उक्त कांटा बनाउँदा वरौनी डिपोले वनाएको चलान पत्र अनुसारको पेट्रोलियम पदार्थको चेक जाँच हुने भएकाले कांटा मर्मतमा निगमले चासो नदिएको हो । तर डिपो प्रमुख खनालले पुरानो मेसिन भएकाले मर्मत सम्भव नभएकाले नयाँ मेसिन जडान गर्ने तयारी भइरहेको बताए ।

निगमका केन्द्रीय प्रवक्ता वीरेन्द्र गोइतले विराटनगर डिपोका लागि आयात भएको पेट्रोलियम पदार्थ भारतमै विक्री भएको आफूलाई जानकारी नभएको बताए । ‘यसवारे हामीलाई कुनै जानकारी छैन,’ उनले भने, ‘क्षेत्रीय डिपोको वयन ब्रिज (काँटा) बिग्रिएको पनि जानकारी छैन् ।’ मंगलवार आपूर्ति सचिव अनिल ठाकुरको टोली विराटनगर डिपो आएको छ । प्रवक्ता गोइतले नेपालमा आयात भएको इन्धन भारतमै बिक्री गरेको पुष्टि भए कारवाही उनले वताए । हाल मुलुकमा डिजेल दैनिक ४५ लाख लिटर, पेट्रोल १५ लाख लिटर र हवाई इन्धन ७ लाख लिटर दैनिक खपत भइरहेको छ । भारतसँग मूल्य अन्तर भएपछि पूर्वमा डिजल र पेट्रोलको खपत बढेको छ । पम्पको माग अनुसार निगमले पेट्रोलियम पदार्थ उपलब्ध गराएर तस्करीलाई प्राथामिकता दिएको निगम स्रोतको दाबी छ ।