बीपी प्रतिष्ठानका उपकरणले चिकित्सक हैरानीमा  

प्रदीप मेन्याङ्बो

धरान — बीपी कोइराला स्वास्थ्य विज्ञान प्रतिष्ठानले सुपर स्पेसियालिटी सेवा दिन थालेको दुइ वर्ष भयो । उपचार सेवाका लागि दैनिक ३ हजार बिरामी आउने र त्यो चाप थेग्न प्रतिष्ठानले एलसी र टेन्डरमार्फत आधुनिक उपकरणहरु भित्र्याउँदै आएको छ ।

तर, ती उपकरणहरु प्रतिष्ठानमा जडान हुनै नपाई थोत्रिएका मात्र छैनन्, करोडौं तिरेर ल्याएका अधिकांश उपकरणहरु काम नलाग्ने रहेको फेला पारिएको छ ।

Yamaha

यसअघि कान्तिपुरले डेन्टल चियर, अक्सिजन प्लान्ट र भेन्टिलेटर वारेन्टी र ग्यारेन्टी पिरियडमै उपयोगविहीन भएर प्रयोगविहीन भएको समाचार लेखेको थियो । एजेन्ट/एजेन्सीले सम्झौताअनुसार ‘इन्स्टल एन्ड डेमोस्ट्रेट’ र परीक्षण नगरी बीचैमा छाडेर जाने गरेकाले पूरा भुक्तानी भएका ती उपकरणहरु प्रयोगविहीन भएको प्रतिष्ठान उच्च स्रोतले जानकारी दिएको थियो । अरु महँगा उपकरहरु पनि त्यस्तै अवस्थामा रहेको बताइएको छ ।

पछिल्लो समयमा प्रतिष्ठानको हाडजोर्नी विभागका लागि आवश्यक सर्जिकल माइक्रोस्कोप उपकरणको हालत पनि त्यस्तै भएको छ । प्रतिष्ठानले डवल हेडेड सर्जिकल माइक्रोस्कोप उपलब्ध गराउने गरी टेन्डर आह्वान गर्दा बायोमेड इन्टरनेसनल कम्पनीले ६४ हजार युरो (८२ लाख ८ हजार रुपैयाँ)मा उपलब्ध गराउने सहमति भयो । तर, आयो सिंगल हेडेड माइक्रोस्कोप । सम्झौताअनुसारको उपकरण नल्याएकाले उक्त उपकरण प्रतिष्ठानको रुटिन अप्रेसन थिएटरमा थन्काएर राखेको एकसाता भएको छ । सम्झौता एउटा उपकरण अर्को ल्याइदिने एजेन्ट अरु कोही नभएर सुनसरी उद्योग वाणिज्य संघका पूर्वअध्यक्ष पवन अग्रवाल, उनका भाइ चेतन अग्रवाल र उनीहरुका अन्य दाजुभाइका पारिवारिक कम्पनी हो । उनीहरुका एक दर्जन बढी यस्ता कम्पनी छन् ।

प्रतिष्ठान स्रोतले भन्यो, ‘स्पाइनल सर्जरीको उपचार गर्न बिरामीले प्रतिष्ठान धाएको धाएकै छन्, तर उपकरणको नाममा सिंगल हेडेड माइक्रोस्कोप अलपत्र अवस्थामा छ । प्रतिष्ठानले उक्त उपकरण लिन मानेको छैन ।’ प्रतिष्ठानमा मुटुको पनि शल्यक्रिया हुने भएकाले दुइ वर्षअघि सर्जरी विभागको मागअनुसार कार्डियोथोरासिक सर्जरीका लागि ‘एक्टर्नल स’ आवश्यक भएको भन्दै टेन्डर आव्हान गरेको थियो । त्यो पनि बायोमेड इन्टरनेसनलले १२ लाख १२ हजार ३ सय ९९ रुपैयाँको एलसीमार्फत उक्त उपकरण प्रतिष्ठानमा आइपुग्दा प्रयोग नै गर्न नसकिने भएपछि अलपत्र अवस्थामा छ ।

यस्तै हाडजोर्नी विभागकै मागअनुसार सर्जरीका लागि चाहिने अर्थोस्कोपी सेटका लागि प्रतिष्ठानले टेन्डर आह्वान गर्‍यो । काठमाडौंको कमलादीको द मेडिकल सोलुसनले टेन्डर पारेर २०७३ असारमा उपलब्ध गराएको उपकरणको मूल्य ९३ लाख ९० हजार रुपैयाँ छ । तर, प्रतिष्ठानमा ‘कम्प्लिट सेट’ नआएकाले हाडजोर्नीको शल्यक्रिया प्रभावित भएपछि एजेन्टलाई बारम्बार ताकेता गरिएको थियो । उक्त उपकरण पनि अलपत्र छ ।

प्रतिष्ठान स्रोतका अनुसार तीन वर्षअघि बायोमेडबाटै टेन्डरमार्फत १० वटा भेन्टिलेटर मगाइएको थियो । सघन उपचार कक्षमा सिकिस्त बिरामी उपाचारका लागि आवश्यक ती भेन्टिलेटरमध्ये ३ वटा मात्र प्रयोगमा छ । बाँकी ७ वटा कामै नलाग्ने अवस्थामा छन् । सघन उपचार कक्षमा प्रयोग हुने एउटै भेन्टिलेटर ७० लाखदेखि करोडभन्दा बढी पर्छ ।

काडमाडौंको सिन्धु सर्जिकल कम्पनीले ल्याएको सातवटा भेन्टिलेटर पनि प्रयोगमा ल्याउन नसकेको प्रतिष्ठान स्रोतले जनाएको छ । बायोमेडले ल्याएको र सिन्धु सर्जिकलले ल्याएको भेन्टिलेटर कोविडियन कम्पनीले निर्माण गरेका हुन् ।

प्रतिष्ठानमा करोडौंका उपकरण अलपत्र परे पनि ती उपकरणका अग्रीम भुक्तानी भइसकेको छ । तर, प्रतिष्ठानले ती सबै उपकरण हालसम्म बुझेको छैन । प्रतिष्ठान स्रोतले भन्यो, ‘ती सबै उपकरणहरु सम्झौताअनुसार नभएको, प्रयोगमा ल्याउन नसकेकाले आफूहरुले नबुझेको हो ।’

त्यस्ता मेडिकल डेन्टल उपकरणको गुणस्तरीयता हेर्नका लागि विभागीय प्रमुख र प्रतिष्ठानको बायोमेडिकल प्रविधि विशेषज्ञ इन्जिनियरले स्वीकृति दिएको हुनु पर्छ ।

यसअघि प्रतिष्ठानको दन्तचिकित्सा महाविद्यालयमा प्रतिडेण्टल चियर २ लाख ७० हजार रुपैयाँ पर्ने ८ थान डेन्टल चियर डेन्टमार्टले टेन्डर पारेर ल्याएको तर नयामै काम नगरेपछि डम्प भएको समाचार कान्तिपुरमा प्रकाशित भएपछि प्रतिष्ठानलाई थाहै नदिई डेन्टमार्टले इन्जिनियर पठाएर सामान्य मर्मत सम्भार गरिदिएको थियो । डेन्टलका एक चिकित्सकले भने, ‘सामान्य मर्मत गरेको हामीलाई थाहा भएन । अझै विश्वस्त छैनौं ।’ उनका अनुसार दन्तचिकित्सा महाविद्यालयका डेन्टल चियरहरुमध्ये ९० प्रतिशत काम नलाग्ने अवस्थामा छन् । टेन्डर गरेर ल्याएको नयाँ उपकरण पनि इन्स्टलेसन नै नगरी एजेन्टले बेवास्ता गर्दा बिरामी राखेर उपचार गर्न पनि नसकेर चिकित्सकहरु हैरान भएका छन् ।

स्पाइनल सर्जरीका लागि प्रतिष्ठानले मगाएको सर्जिकल माइक्रोस्कोप प्रयोगविहीन भएको छ । तस्बिर : प्रदीप/कान्तिपुर

Esewa Pasal

प्रकाशित : फाल्गुन २९, २०७४ १७:२३
प्रतिक्रिया
पठाउनुहोस्
ADVERTISEMENT
ADVERTISEMENT

आक्रमणमा परी ९ भारतीय सीआरबी जवानको मृत्यु

एजेन्सी

नयाँदिल्ली — भारतको छत्तिसगढ राज्यमा मंगलबार बिहान नक्सलवादीहरुको अक्रमणमा परी कम्तीमा ९ जना जना सीआरबी जवानको मृत्यु भएको छ ।

मंगलबार मध्यान्न १२ बजे भएको उक्त आक्रमणमा १० जना सीआरबी जवान घाइते भएको भारतीय सञ्चारमाध्यमहरुले जनाएका छन्।

छत्तिसगढको सुकमा जिल्लामा उक्त हमला भएको थियो।

भारतीय गृहमन्त्री राजनाथ सिंहले घटनाप्रति आफू दुखित भएको जनाउदै आक्रमणमा परी शहिद भएका सिआरबी जवानको परिवारमा समवेदना प्रकट गरेका छन्।

सुकमा जिल्लामा मंगलबार विहान साढे ८ बजे नक्सवादी र सीआरबी जवनाहरुबीच दोहोरो भिडन्त भएको थियो।

१२ बजे नक्सलवादीहरुले बिछ्याएको माइनमा परी जवानहरुको मृत्यु भएको थियो।


प्रकाशित : फाल्गुन २९, २०७४ १७:००
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT