चिनीमा युरिया मिसाउने कारबाहीमा
खोटाङ — चिनीमा युरिया मल मिसाएर बेचेको भेटिएपछि प्रशासनले दिक्तेल बजारस्थित एक पसल सिलबन्दी गरेको छ । सल्लेरीटोलस्थित जानकी जनरल सप्लायर्समा चिनी किन्न आएका एक ग्राहकले मल मिसाइएको गुनासो गरेपछि प्रशासनले छापा मारेको हो ।
सहायक प्रजिअ सन्तोष सुवेदीका अनुसार सप्लायर्सले युरिया मिसाएको गुनासो आएपछि अनुगमन गर्दा ना५ख ७१३० नम्बर ट्रकमा राखेर फाल्न तयार गरिएको साढे तीन बोरा र गोदाममा दुई बोरा चिनी फेला परेको छ । त्यसपछि गोदाम खनतलासी गर्दा थप दुई बोरा चिनी फेला परेको सुवेदीले सुनाए ।
ट्रकमा राखेर अन्यत्र लान तयार पारिएको चिनी र ट्रक दिक्तेलको रत्नपार्कस्थित सामुदायिक प्रहरीमा त्यसै दिन सिलबन्दी गरेर राखिएको सुवेदीले जनाए । त्यस्तै गोदाम र पसलमा पनि सिलबन्दी गरिएको छ ।
चिनीमा युरिया मिसावट गर्ने सप्लायर्सका सञ्चालक मुकेश्वर पाण्डे र ट्रक चालक उदयपुर गाइघाटका २७ वर्षीय सन्जीवकुमार चौधरीलाई बयान गरी दैनिक तारेखमा राखिएको उनले जानकारी दिए ।
