बीपी प्रतिष्ठान: डाक्टर आवासमा बाहिरिया

प्रदीप मेन्याङ्बो

धरान — बीपी कोइराला स्वास्थ्य विज्ञान प्रतिष्ठानको आवासगृह पहुँचका आधारमा बाहिरका व्यक्तिले ओगट्दा त्यहाँ कार्यरत चिकित्सक, नर्स र कर्मचारी मर्कामा छन् । उनीहरू होटल र गेस्टहाउसमा बस्न बाध्य छन् ।


प्रतिष्ठानको कुनै विभागको कर्मचारी नै नभए पनि सुशील झा र सुमित साहलगायत सात जनाभन्दा बढी व्यक्ति लामो समयदेखि प्रतिष्ठानको आवासगृहमा बसिरहेका छन्।

Yamaha


यसैगरी शर्मा एन्ड रसुवा जेभीको केज कन्सल्टेन्सी र औषधि उपकरण उपलव्ध गराउने कम्पनीका प्रतिनिधि पनि प्रतिष्ठानकै आवासमा छन्। प्रतिष्ठान आवासीय स्वास्थ्य शैक्षिक संस्था भएकाले त्यहाँ कार्यरत चिकित्सक र नर्सहरूका लागि आवास बनाइएको हो । तर, कर्मचारीको संख्याअनुसार यसै पनि अपुग रहेका भौतिक संरचना बाहिरका व्यक्तिले ओगट्दाा उनीहरू होटल र प्रतिष्ठानकै गेस्टहाउसमा खुम्चन बाध्य छन् ।


खानेपानी, विद्युत्, टेलिफोन, इन्टरनेट र सुरक्षा गार्डसहितको सुविधायुक्त आवासमा बसिरहेका झा श्यामसुन्दर कन्सल्टेन्सीका प्रतिनिधि हुन् । साह प्रतिष्ठान हाताभित्र नाफा कमाउने उद्देश्यले हालै स्थापित किड जी स्कुलका सञ्चालकमध्ये एक हुन् । किडजी भारतको जी ग्रुपअन्तर्गतको मानिन्छ ।


आवासीय क्षेत्रमा प्रतिष्ठानमा कार्यरत प्रोफेसर, एडिसनल प्रोफेसर, एसोसिएट प्रोफेसर, एसिस्टेन्ट प्रोफेसर, नर्सिङ स्टाफ, प्रशासन कर्मचारीका लागि फ्ल्याट सिस्टमका घर तथा भवन निर्माण गरिएका छन् । ती घर तथा भवनमा आवासीय चिकित्सक र नर्स तथा कर्मचारी मात्र बस्न पाउने प्रावधान भए पनि झा र साहले नि:शुल्क उपभोग गरिरहेका छन् ।


प्रतिष्ठानमा हाउस अफिसरसहित करिब ३ सय ५० चिकित्सक, ५ सय ५० नर्स, ७ सय ५० हाराहारी सामान्य प्रशासनका कर्मचारी र ५० बढी प्राविधिक कार्यरत छन् । प्रतिष्ठानका अस्पताल निर्देशक प्राडा गौरिशंकर साहले झा र साहले आवास सुविधा पाएको विषयमा भने, ‘कसरी उनीहरूले त्यो सुविधा पाए म पनि छक्कै परेको छु । यहाँ कार्डियो थोरासिक सर्जन, पेडियाट्रिक सर्जन, न्युरो सर्जनदेखि सिनियर रेजिडेन्ट चिकित्सक, नर्सहरूले बस्ने ठाउँ नपाएर विजोग छ ।’


प्रतिष्ठानका सामान्य प्रशासन विभागका प्रमुख दीपक शाक्यले भने प्रतिष्ठानको भौतिक संरचना निर्माण गर्ने विभिन्न ठेकेदार कम्पनी र मेडिकल उपकरण उपलव्ध गराउने विभिन्न कम्पनीका प्रतिनिधिलाई बस्ने सुविधा दिने पहिलेको नियम र प्रावधानअनुसार बस्न दिइएको बताए । उनले भने, ‘पहिलेको नियमअनुसार बस्न दिएको हो । हालै यो नियममा केही परिवर्तन गरिएको छ । अवदेखि प्रतिष्ठानका आवासमा बाहिरका व्यक्तिलाई बस्न नदिने निर्णय भएको छ ।’ उनले प्रतिष्ठानमा करारदेखि माथिका सबै कर्मचारीले बस्न पाउने प्रावधान भए पनि भवन अभावले धेरैले पाउन नसकेको बताए ।

प्रकाशित : वैशाख ३, २०७५ १०:०८
प्रतिक्रिया
पठाउनुहोस्

विमानस्थल स्तरोन्नति गरिने

कान्तिपुर संवाददाता

ताप्लेजुङ — कालोपत्रे भएर पनि बाह्रै महिना सञ्चालनमा आउन नसकेको सुकेटार विमानस्थल स्तरोन्नति गरिने भएको छ । विमानस्थलका दुवै तर्फबाट जहाज अवतरण गर्ने बनाउन लागिएको हो ।

यसका लागि विमानस्थलपूर्वतर्फको ढिस्को फाल्ने तयारी गरिएको छ । नागरिक उड्डयन प्राधिकरणका सिभिल इन्जिनियर पुष्प न्यौपानेले सोमबार प्रारम्भिक सर्भे गरेका छन् ।


प्राविधिकका अनुसार पूर्वतर्फको ढिस्को भत्काएर धावनमार्ग थप पाँच सय मिटर कालोपत्रे गरे दुवैतिरबाट जहाज अवतरण गर्न सकिन्छ । ‘अहिले हेर्दा टु वे अप्रोच गर्न सकिने सम्भावना देखिएको छ,’ न्यौपानेले भने, ‘कति माटो फाल्नुपर्छ, कती समय लाग्छ भन्नेचाँही डिटेल सर्भेपछि थाहा हुन्छ ।’ मन्दिर क्षेत्र रहेको भागमा ‘स्लोभ’ मिलाउनुपर्ने र पूर्वतर्फ धावनमार्ग बढाउनुपर्ने उनले बताए । मन्दिरतर्फको जग्गा प्राधिकरणकै नाममा रहे पनि पूर्वतर्फ भने निजी जग्गा छ । अहिले धावनमार्गको ७ सय ५० मिटर कालोपत्रे गरिएको छ । पाँच सय मिटर बढी धावनमार्ग कालोपत्रे गर्न बाँकी छ ।


विमानस्थल निर्माणदेखि नै उडान भर्दै आएको नेपाल वायुसेवा निगमका चालकले पूर्वतर्फको ढिस्को फालेर पाँच सय मिटर बढाए दुवै तर्फबाट अवतरण गर्न सकिने सुझाव दिँदै आएका छन् । सामान्य समस्या पर्दा भित्ताको ढिस्कोमा ठोकिन सक्ने भएकाले पूर्वतर्फबाट अवतरण भएको छैन । धावनमार्ग नपुग्ने भएकाले १९ सिट क्षमताको जहाजले काठमाडौंबाट १२ जना र ताप्लेजुङवाट १५ जना यात्रु मात्र बोक्दै आएको छ ।


जहाज बस्न नसके अवतरण प्रयास र फर्कनेसमेत फ्युल बोक्नुपर्ने भएकाले काठमाडौंबाट धेरै यात्रु ल्याउन नसकिएको निगमले जनाएको छ । निजी विमानको समस्या पनि उस्तै छ । पश्चिम दिशाबाट मात्रै गर्दा सामान्य कुहिरो लाग्दा पनि जहाज अवतरणमा समस्या हुने गरेको छ । पूर्वतर्फबाट अवतरण गर्न पाए समस्या नहुने विमान चालकले बताउने गरेका छन ।


तमोर, कावेली नदीवाट उठ्ने कुहिरो विमानस्थलको दक्षिणतर्फको क्षेत्रमा जम्मा हुने गरेको छ । अवतरण हुने क्षेमा कुहिरोले ढाकिरहदा पूर्व तर्फको भाग भने खुला हुने विमानस्थल कर्मचारी बताउँछन् । जहाज नचल्दा यहाँका यात्रुले तीन दिन लगाएर काठमाडौं पुग्नुपर्छ ।

प्रकाशित : वैशाख ३, २०७५ १०:०८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT