इन्जिनियरिङका दुई विद्यार्थीमाथि छुरा प्रहार
सुनसरी — सुनसरीको धरानस्थित पूर्वाञ्चल इन्जिनियरिङ क्याम्पसमा अध्ययनरत दुई विद्यार्थीमाथि सोमबार राति छुरा प्रहार भएको छ ।
पूर्वाञ्चल इन्जिनियरिङ क्याम्पस धरानमा चौथो वर्षमा अध्यनरत बाग्लुङका सुजन खड्का र काभ्रे धुलिखेल बस्ने प्रदिप सापकोटा माथि ३ जनाको समुहले छुरी प्रहार गरी मोबाइल समेत लुटेका छन् । सुजन खड्का अखिल क्रान्तिकारीका पुर्व ईकाई उपाध्यक्ष रहेको बुझिएको छ ।
प्रहरीका अनुसार राति ८ बजे साथीबाट नोटकपी लिएर डेरातर्फ आउदै गरेको बेला खड्का र सापकोटामाथि छुरी प्रहार र लुटपाट भएको हो । खड्काको हात, छातीमा र सापकोटाको छातीमा चोट लागेको छ ।
घाइते दुवैको वीपी कोइराला स्वास्थ्य विज्ञान प्रतिष्ठानमा उपचार भइरहेको इलाका प्रहरी कार्यालय धरानका डीएसपी रामेश्वर पौडेले बताए ।
घटनामा संलग्न रहेको आरोपमा मंगलबार विहान प्रहरीले विज्ञान लिम्बुलाई पक्राउ गरेको छ । अन्य दुई जना कुम्बे लिम्बु र विकेन लिम्बु फरार छन् । प्रहरीले उनीहरुलाई ज्यान मार्ने उद्योग अन्तर्गत कारवाही गर्ने जनाएको छ ।
प्रकाशित : वैशाख ११, २०७५ ०९:२७
