राष्ट्रिय गौरवको वैकल्पिक मार्ग निर्माण तीव्र

डिल्लीराम खतिवडा

उदयपुर — वैकल्पिक मार्ग निर्माणको काम तीव्र गतिमा भइरहेको छ । अहिलेकै अवस्थामा निर्माण भइरहे लक्ष्यअनुसार नै काम सम्पन्न हुने निश्चित छ ।

राष्ट्रिय गौरवको योजना मानिएको वैकल्पिक मार्ग (धरान–चतरा हेटौंडा सडक योजना) ३ वर्षभित्र निर्माण गरिसक्ने लक्ष्य राखिएको हो । सडक विभागले सडक विस्तार हुने क्षेत्रको क्रमश: अवरोध हटाउँदै गएपछि कामले तीव्रता पाएको छ । जंगल क्षेत्रका रूख हटाउने र घरटहराका लागि मुआब्जा लगायतका काम अगाडि बढाएकाले दु्रतगतिले निर्माणले अगाडि बढिरहेको छ ।

चैत मसान्तसम्म भौतिक रूपमा ३५ प्रतिशतभन्दा बढी नै काम भइसकेको पूर्वी खण्ड निर्माण गर्न ठेक्का लिएको कम्पनी जेडआईईसी लामा एन्ड शर्मा जोइन्ट भेन्चरले जनाएको छ । ‘३५ प्रतिशतभन्दा बढी नै भौतिक निर्माणको काम भइसकेको छ,’ कम्पनीका प्रोजेक्ट मेनेजर निर्माण पोखरेलले भने, ‘सिन्धुलीतर्फको विद्युत् पोल हटाउनेबाहेक अन्य क्षेत्रमा रहेको अवरोध हटेको छ ।’ सिन्धुली क्षेत्रका विद्युत् पोल हटाउने काम नहुँदा रूख कटान पनि रोकिएको उनले बताए । धरान–चतरा–हेटौंडा सडक योजना दुई खण्डमा विभाजन गरेर काम भइरहेको छ । धरानदेखि सिन्धुलीको
भिमादसम्म पूर्वी खण्डमा पर्छ । पूर्व खण्डमा ४३ वटा पुलसहित सडक विस्तार भइरहेको छ । विस्तार भइरहेको सडकको चैत मसान्तसम्म पुलको ३० प्रतिशत र सडकतर्फ २६ दशमलव ५ प्रतिशतले आर्थिक प्रगति भएको सडक आयोजना पूर्व खण्ड कार्यालय गाईघाटले जनाएको छ ।

‘आर्थिक प्रगति पनि लक्ष्यअनुसार नै भएकाले सडक निर्माणले तीव्रता लिएको छ,’ आयोजना प्रमुख उमेशविन्दु श्रेष्ठले भने, ‘आर्थिक प्रगतिसँगै भौतिकसमेत भएकाले चुस्त दुरुस्त रूपमा काम अगाडि बढिरहेको छ ।’ सडक विस्तार हुने विशेष गरी सिन्धुली क्षेत्रमा मुआब्जा निर्धारण भइसकेकाले घरटहराका कारणले काम रोकिने समस्या समाधान भइसकेको उनले वताए । सिन्धुलीमा ५ सय २४ घरधुरीको २० करोड ६४ लाख रुपैयाँ मुआब्जा निर्धारण भई घरटहरा हटाउने काम भइरहेको आयोजना प्रमुख श्रेष्ठले बताए । ‘उदयपुरतर्फ पनि घरटहराको मूल्यांकन गरेर प्रमुख जिल्ला अधिकारीको अध्यक्षतामा भएको मुआब्जा निर्धारण समितिमा पेस गरिएको छ ’ प्रमुख श्रेष्ठले भने, ‘यसको पनि चाँडै टुंगो लाग्नेछ ।’ सडक विस्तार हुने क्षेत्रमा मुआब्जा निर्धारण भएपछि चाँडै उदयपुरमा पनि घरटहरा हटाउने काम हुने उनले बताए ।

सडक निर्माणको क्रममा सार्वजनिक निर्माणअन्तर्गत सुरुको १ अर्ब ५८ करोड र ६ महिनापछि १ अर्ब ५८ करोड रकम विनियोजन भएको छ । विनियोजित रकमबाट आर्थिक वर्ष ०७४/०७५ चैत मसान्तसम्म सकिएकाले चालु आर्थिक वर्षको बाँकी अवधिका लागि १ अर्ब ७० करोड सडकतर्फ रकम आवश्यक रहेको आयोजना प्रमुख श्रेष्ठले बताए । त्यसैगरी घरटहरा मुआब्जाका लागि २८ करोड रुपैयाँ आवश्यक पर्नेमा थप २३ करोड रुपैयाँ आर्थिक वर्षको चालु अवधिका लागि आवश्यक रहेको श्रेष्ठले बताए । आर्थिक र भौतिक प्रगतिसँगै सडक निर्माणमा गुणस्तरीय काम भइरहेको आयोजनाले दाबी गरेको छ । राष्ट्रिय गौरवको योजना भएकाले पनि गुणस्तरमा कुनै किसिमको सम्झौता नगरिएको सम्बद्ध अधिकारी बताउँछन् ।

Yamaha

Esewa Pasal

प्रकाशित : वैशाख २६, २०७५ ०९:४९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सरकारी जग्गा अतिक्रमण

ठोस निर्णय हुन नसक्दा अतिक्रमण रोक्न र हटाउन समस्या भयो 
डिल्लीराम खतिवडा

उदयपुर — त्रियुगा नगरपालिका १३ स्थित सरकारी स्वामित्वको विमानस्थलको १७ बिघा जग्गा अतिक्रमण भएको छ । २०३१ सालतिर विमानस्थल निर्माण गर्ने भनेर हवाई फिल्ड नामकरण गरिएको थियो ।

विमानस्थल निर्माण गर्ने भनेरै तत्कालीन समयमा जग्गा ‘हवाई मैदान’ कै नाममा दर्ता गरिएको हो । सरकारको स्वामित्वमा रहने गरी १६ बिघा १४ कठ्ठा १६ धुर जग्गामा हवाई मैदानका नाममा लालपुर्जा रहेको स्थानीयले बताए ।


पहिलेको हवाई मैदान थारूहट रंगशाला र मदन भण्डारी सभा गृह निर्माण हुनुका साथै बजार विस्तार समेत गरिएको छ । अहिले हवाई मैदानकै जग्गामा तरकारी बजार छ । दक्षिण पूर्व भागमा सभा गृह बन्दैछ । बाँकी भाग अतिक्रमण भइरहेको छ । अतिक्रमण क्षेत्रमा पहिले नै ४३ वटा पक्की घरसहितका विभिन्न संरचना बनेका छन् । अहिले करिब १७ वटा घर निर्माण भइरहेको त्रियुगा नगरपालिकाले जनाएको छ ।


जग्गा विमानस्थलको नाममा रहे पनि पटकपटक प्रयास गर्दा पनि विमानस्थल बनेन । नागरिक उड्डयान मन्त्रालयको प्राविधिक टोलीले प्राविधिक दृष्टिकोणले उक्त जग्गा उपयुक्त नभएको भनेपछि विमानस्थल बनाइएन । विमानस्थल नबन्ने निश्चित भएपछि भू–माफियाले जग्गा अतिक्रमण गरेर बिक्री वितरण गरेको सर्वसाधारणले बताए । विमानस्थल नबनेपछि अहिले तीव्र रूपमा जग्गाको अतिक्रमण भइरहेको छ । स्थानीय तहका जनप्रतिनिधिकै संरक्षणमा सर्वसाधारणले जग्गा अतिक्रमण गरिहेको स्थानीय नरमान राईले बताए । ‘नेपाल सरकारको नाममा रहेको जग्गा तीव्र रूपमा अतिक्रमण भइरहेको छ,’ नरमानले भने, ‘तर नगरपालिकाले यस विषयमा खासै चासो लिएको छैन ।’ नगरपालिकाका जनप्रतिनिधि नै जग्गा अतिक्रमण गर्ने भूमाफियासँग मिलेर रकम लिएकाले वास्ता नगरेको उनले बताए । सरकारी जग्गा अतिक्रमण गरिरहँदा नगरपालिका, स्थानीय प्रहरी प्रशासन मौन रहेको सर्वसाधारणले आरोप लगाएका छन् । नगरपालिका प्रमुख र वडा अध्यक्षलाई जानकारी दिँदा पनि बेवास्ता गरेको सर्वसाधारणले गुनासो गरेका छन् ।


सरकारी स्वामित्वमा रहेको हवाई मैदानको जग्गा अतिक्रण भएको नगरपालिकका प्रमुख प्रशासकीय अधिकृत तारानाथ लुइँटेलले बताए । ‘सार्वजनिक जग्गा अतिक्रमण भएको छ, अतिक्रमण गरेर पक्की संरचना समेत बनिसकेका छन् ।’ अतिक्रमण रोक्न प्रयास गरिए पनि राजनैतिक संरक्षणका कारण ढिलो भएको उनले बताए ।


नगरपालिकाले पहिले पनि अतिक्रमण भएको क्षेत्रबाट घरटहरा हटाउन सार्वजनिक सूचना जारी गरिसकेको प्रमुख प्रशासकीय अधिकृत लुइँटेलले बताए । ‘त्रियुगा नगरपालिकको कार्यपालिकमा समेत अतिक्रमण हटाउने एजेन्डा लगियो,’ अधिकृत लुइँटेलले भने, ‘तर त्यहाँ पनि ठोस निर्णय हुन नसक्दा अतिक्रमण रोक्न र हटाउन समस्या भयो ।’ तर चाँडै प्रक्रिया पूरा गरेर अतिक्रमण हटाउने काम गरिने उनले बताए ।


अतिक्रमण गरिएको क्षेत्रमा प्रमुख जिल्ला अधिकारी विष्णुबहादुर कार्की सहितले अनुगमन गरेर घर बनाउँदै गरेकालाई घर नबनाउन निर्देशन दिएको स्थानीयले बताए । अतिक्रमण हटाउने भन्दै प्रमुख जिल्ला अधिकारी कार्कीले घर नबनाउन र थप अतिक्रमण नगर्न भनेको अतिक्रमण क्षेत्रमा रहेका स्थानीले बताए ।

प्रकाशित : वैशाख १२, २०७५ १२:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT