पुल नहुँदा सास्ती

विप्लव भट्टराई

इलाम — हिउँदमा टोलटोलमै मोटर पुगे पनि बर्खामा जिल्लाका कतिपय स्थानमा खोला तर्नै समस्या छ । कतै पक्की पुलको आवश्यकता छ भने कतै झोलुंगे पुल पनि नहुँदा जोखिम मोलेर खोला तर्नुपर्ने बाध्यता छ ।

सूर्योदय नगरपालिका ६ र रोङ गाउँपालिका ६ बीचको फामखोलामा पुल नहुँदा स्थानीयले सास्ती खेप्नुपरेको छ । बर्खामा खोला उर्लिएर आउने हुँदा जोखिम मोलेर स्थानीयले यात्रा गर्नुपर्ने बाध्यता छ । अस्थायी बाँसको पुल तरेर दिनहुँ दर्जनांै विद्यार्थी आउजाउ गर्छन् ।

यस्तै सूर्योदय नगरपालिका ५ र रोङ गाउँपालिका ६ को बीचमा रहेको सिद्धिखोलामा झोलुंगे पुल नहँुदा सर्वसाधारणको यात्रा जोखिमपूर्ण बनेको हो । खोला घटेका बेलामा मात्र वारपार गर्न सकिने भए पनि बर्खाको समय भने ती गाउँका बासिन्दाले जोखिम मोलेर खोला तर्नुको विकल्प छैन ।दुवै स्थानमा स्थानीयको पहलमा बर्सेनि फड्के निर्माण गर्ने गरिएको छ । पुल बनाउन टोलबाटै योजनाको छनोट गरे पनि अहिलेसम्म बन्न सकेको छैन । जिल्लाका धेरै स्थानमा अझै पनि पुलको अभावमा खोला तर्न कठिनाइ छ । सन्दकपुर गाउँपालिका ४ र ५ बीचको धुवाखोलामा पनि पुल नहुँदा उस्तै समस्या छ । बर्खामा उर्लेर आउने खोला तर्न अस्थायी पुलको साहारा आवश्यकता पर्ने स्थानीय बताउँछन् । वर्षौंअघि स्थानीयले बनाएको काठे पुल पनि मक्किएपछि थप जोखिम बढेको हो । जिल्लाका उत्तरी र पूर्वी क्षेत्र जोड्ने फिक्कल, नयाँबजार, प्याङ, जमुना, मावु र माइमझुवा हुँदै पुवामझुवाको बाघखोर जोड्ने रिङरोड यही स्थानबाट गए पनि पुलको अभावमा खोलाबाटै गाडी तार्नुपर्ने अवस्था छ । हिउँदमा खोला सानो भए पनि बर्खामा उर्लेर आउने भलबीच गाडी तार्नु पर्दा समस्या हुने गरेको चालक अर्पण गुरुङ बताउँछन् । ‘यहाँ वारपार गर्ने धेरै हुने र सवारी चाप पनि बढ्दै गएकाले पक्की पुलको आवश्यकता देखिन्छ,’ उनले भने ।

इनपा ८ को सिङफ्रिङ र माइजागमाईको सोयाङबीचको माइखोलामा पनि पुलको अभावमा जोखिम मोलेर फड्केबाटै खोला तर्नुपर्ने बाध्यता छ । खोला खोल्सी धेरै भएको माई नगरपालिकामा पनि उस्तै समस्या छ । नगरपालिकाका विभिन्न ६ स्थानमा नयाँ पुल बनाउन माग गरिएको प्राविधिक गोविन्द ढकालले जानकारी दिए । नगरपालिकाको २ वडा स्थित दुङदुङे, ६ नम्बर वडाको थिवा, मागु र रिखुवालगायत स्थानमा झोलुंगे पुलको आवश्यकता छ ।

जिल्लामा डेढ सय झोलुंगे पुल बनेका छन् । निर्माणका क्रममा अहिले १० वटा छन् । स्थानीय तह गठनअघि तत्कालीन जिल्ला विकास समितिमार्फत पुल बन्दै आएकोमा अहिले सम्बन्धित गाउँपालिका र नगरपालिकाले पुल निर्माणको काम अघि बढाउँदै आएका छन् । ट्ेरल ब्रिज सपोर्ट युनिटमार्फत पुल निर्माण गर्दा स्थानीय तहले ६ प्रतिशत रकम निकाल्नुपर्ने व्यवस्था छ ।

प्रकाशित : जेष्ठ २९, २०७५ ०९:४१
प्रतिक्रिया
पठाउनुहोस्

भ्रष्टलाई कारबाही गर्न सेवाग्राहीको माग

कान्तिपुर संवाददाता

सुनसरी — बराहक्षेत्र नगरपालिकामा आयोजित सार्वजनिक सुनुवाइमा आइतबार स्थानीय सेवाग्राहीले भ्रष्ट कर्मचारीलाई नगरले कारबाही गर्नुपर्ने सुझाव दिएका छन् ।

उनीहरूले सेवाग्राहीको कामप्रति ढिलासुस्ती गर्ने र आर्थिक अनियमितता गर्ने कर्मचारीलाई नगरप्रमुख र उपप्रमुखले कारबाही गरेको हेर्न चाहेको बताएका थिए । कारबाही गर्न सुझाव दिए पनि ती कर्मचारीको नाम भने खुलाइएको थिएन ।

सेवाग्राहीले नगरका अधिकांश बजार क्षेत्र वर्षा लागेपछि डुबान हुने गरेकाले भौतिक संरचना निर्माण गर्दा ख्याल गर्नुपर्ने सुझाव पनि दिए । उनीहरूले नगरमा प्राविधिक कर्मचारीहरू कम भएकाले सुलभ तरिकाले सेवा लिन नसकेको र नगरबाट प्रवाह हुने सूचनामा जनताको सहज पहुँचका लागि हरेक तीन महिनामा स्वत: स्फूर्त सूचना प्रवाह गर्न सञ्चारकर्मीले नगरलाई सुझाए ।

सार्वजनिक सुनुवाइमा स्थानीय बुद्धिजीवीहरूले कृषि आधुनिकीकरणका लागि ठोस कार्यक्रम र योजनासहित औद्योगिक क्षेत्र स्थापना गर्न राय तथा सुझाव दिए । जवाफमा नगर प्रमुख निलम खनालले अहिलेसम्म कर्मचारीले भ्रष्टाचार गरेको, जनताको काममा गैरजिम्मेवार भएको कही कतैबाट गुनासो नआएको स्पष्ट पारे । उनले भने, ‘यदि कर्मचारीले भ्रष्टाचार गरेको पाइए प्रमाणसहित आउनुस्, आयोग निर्माण गरी विभागीय कारबाही गर्ने वा कानुनअनुसार आवश्यक कारबाही गरिने छ ।’ बराहक्षेत्र नगरपालिकाले वार्षिक रूपमा आफ्ना काम कारबाहीप्रति पारदर्शीता र सुसूचित गर्दै जनताका गुनासा सुन्न आयोजना गरिएको सुनुवाइमा नगर प्रमुख खनालले जन गुनासोलाई नगरको सम्पत्तिका रुपमा हेरेको बताए ।
सार्वजनिक सुनुवाइमा महिलाको क्षेत्रबाट गुनासो, रायसुझाव नआएपछि नगर उपप्रमुख कमला मगरले नगरका कामप्रति महिलाको बुझाइ कम भएको हो कि भन्ने शंका व्यक्त गरिन् । उनले आफू नगरको न्यायिक समितिको संयोजकसमेत रहेकाले नगरको न्याय प्रणालीका विषयमा स्थानीयले चासो राख्नुपर्ने बताइन् ।

प्रकाशित : जेष्ठ २९, २०७५ ०९:४०
पूरा पढ्नुहोस्
प्रतिक्रिया
पठाउनुहोस्