दुर्व्यसनीलाई नाकाबाटै फर्काइँदै
विराटनगर — भारतीय सीमावर्ती सहर जोगबनीबाट लागूऔषध ल्याउने समूहलाई प्रहरीले नाकाबाट फर्काउन थालेको छ । पूर्वका विभिन्न सहरका युवा सीमापारि गएर लागूऔषध सेवन गर्ने र अधिकांशले बोकेर समेत ल्याउने क्रम बढेपछि प्रहरीले यसो गर्न थालेको हो ।
इलाका प्रहरी रानीका निरीक्षक सन्तोष निरौलाका अनुसार प्रहरीले दैनिक सरदर ५ जनालाई पक्राउ गर्दै आएको छ । तर केही दिनयता भने प्रहरीले सीमावारिको सुगर मिल गेटबाटै उनीहरूलाई पारि जान नदिई फर्काउन थालेको छ । पारिको टिकुलिया बस्ती यताबाट जाने दुव्र्यसनीले भरिएको हुन्छ । निरौलाका अनुसार ले त्यो बस्तीमा प्रवेश गर्ने नाकाबाटै अभिलेख राखेर दुव्र्यसनीलाई फर्काउन थालिएको छ ।
पारि जान खोज्नेलाई नाकामै रोकेर नाम, थर, ठेगाना र अभिभावकको सम्पर्क नम्बर लिएर फर्काउन थालिएको हो । असारभित्र यसरी २ सयभन्दा बढीलाई पारि जान नदिई फर्काइएको प्रहरीले जनाएको छ । सीमावर्ती भारतीय बजार जोगबनीमा दर्जनभन्दा बढी औषधि पसलका नियमित ग्राहक नेपालबाट जाने लागूऔषधका दुव्र्यसनी हुने गरेका छन् ।
पूर्वका धरान, विराटनगर, इटहरी, दमकलगायत स्थानबाट लागूऔषध सेवन गर्न र ओसारेर बिक्री गर्ने क्रम बढेपछि प्रहरीले विशेष निगरानी गर्न थालेको जनाएको छ ।
प्रकाशित : श्रावण ६, २०७५ ०९:२८