‘प्रदेशको नाम तोक्न केन्द्रले हस्तक्षेप गर्न मिल्दैन’

उनले प्रदेश १ का ९३ सांसद नाम र राजधानी तोक्ने विषयमा अन्तिम निर्णय गर्न सक्षम रहेको समेत दाबी गरे ।

६ दिन अघि पूर्वप्रधानमन्त्री तथा नेकपाका अध्यक्ष पुष्पकमल दाहालले एक कार्यक्रममा प्रदेश १ को नाम किराँत रहने बताएका थिए ।

दाहालको उक्त भनाईप्रति आपत्ति जनाउँदै मन्त्री कार्कीले प्रदेशको नामाकरणको विषयमा केन्द्रीय स्तरबाट हस्तक्षेप हुन नहुने टिप्पणी गरे ।

‘प्रदेश १ को नाम के राख्दा उचित हुन्छ भन्ने निर्णय गर्न ९३ सांसद सक्षम छन्’ उनले भने,‘अहिले आएर यो विषयमा केन्द्रले हस्तक्षेप गर्न मिल्दैन । त्यस्तो गर्नु थियो भने पहिला नै गर्नुपथ्र्यो ।’

शनिबार गृहनगर झापाको गौरादहमा सञ्चारकर्मीसँग कुराकानी गर्दै मन्त्री कार्कीले प्रदेशको नाम र स्थायी राजधानीको विषय प्रदेशको बर्खे अधिवेशनबाट टुंगो लागाउने बताएका छन् ।

उनले नामाकरण र राजधानी तोक्ने विषयमा केही ढिलाई भएपनि अब, ढिलाई नगर्ने बताए । नाम र राजधानीका विषयमा विभिन्न पक्षबाट प्रस्तावहरु आउने क्रम जारी छन् ।

ती प्रस्तावमाथि छलफलहरु पनि चलिरहेका छन् । उनले अहिले चर्चामा रहेकै नामहरुमध्येबाट एउटा नाममाथि निर्णय हुन सक्ने बताए । उनले प्रदेश नामका लागि सगरमाथा, मेची, कोशी, विराट, किरात, सप्तकोशीलगायतका नामहरु प्रस्तावका रुपमा आएको बताए ।

‘हामी प्रदेश नामाकरणको विषयमा करिब करिब अन्तिम अवस्थामा आईपुगेका छौं । साउनमै टुंगो लगाउने हाम्रो तयारी थियो । तर, सकिएन । अब बर्खे अधिवेशनले नाम र राजधानीको विषय टुंगो लगाउछ’ उनले भने ।