महानगरमा विस्फोटः 'पक्राउ परेकाहरुको संलग्नता देखिएन'

विनोद भण्डारी

काठमाडौँ — विराटनगर महानगरपालिकाका प्रमुख भीमप्रसाद पराजुलीको कार्यकक्षअघि आइतबार दिउँसो भएको बम विस्फोट कसले गरेको प्रहरीले भन्ने अझै पुष्टि गर्न सकेको छैन ।

विस्फोटमा संलग्न भएको आशंकामा नियन्त्रणमा लिएका ८ जना घटनामा संलग्न नभएको प्रहरीले बताएको छ ।

Yamaha

विस्फोट कसले गराएको भन्ने पुष्टि हुन नसकेको मोरङका प्रहरी प्रमुख एसपी मनोज केसीले बताए । 'यसैले विस्फोट गराएको हो भन्ने स्थिती छैन’ उनले भने, 'घटनालगत्तै नियन्त्रणमा लिइएका ८ जना विस्फोटमा संलग्न नभएको पाइएको छ ।’ प्रहरीले उनीहरुको नाम भने सार्वजनिक गरेको छैन ।

तराई जनतान्त्रिक मुक्ति मोर्चा (क्रान्तिकारी)ले आइतबार विज्ञप्ती सार्वजनिक गर्दै बिस्फोटको जिम्मेवारी लिएको थियो । एसपी केसीले भने मोर्चा वा माओवादीको विप्लप समुह कसले विस्फोट गराएको हो भन्ने बारे अनुसन्धान भइरहेको बताए ।

कार्यालयको माथिल्लो तलामा रहेको प्रमुखको कार्यकक्ष अगाडीको सेवाग्राही बस्ने स्थानमा भएको विस्फोटले त्यहाँका फर्निचर, झ्यालका सिसा र आगनमा पार्किङ गरिएको प्रमुख चढने गाडीको सिसा क्षतिग्रस्त भएको थियो ।

महानगरले नगरको उचित सुरक्षा प्रबन्ध मिलाउन स्थानीय सुरक्षा संयन्त्रसमक्ष लिखित माग गरेको छ । प्रमुख पराजुलीका अनुसार प्रमुख र उपप्रमुखको व्याक्तिगत सुरक्षा मागपनि गरिएको छ ।

आइतबारको घटनापछि जिल्ला प्रहरी कार्यालयले सोमबारदेखि महानगरको कार्यालयमा सुरक्षा तैनाथ गरेको छ । यसअघि त्यहाँ प्रहरीको सुरक्षा नभएको महानगरले जनाएको छ ।

तर सुरक्षा निकायले महानगर प्रमुख पराजुलीको भनाईलाई खण्डन गर्दै सुरक्षा चुनौती बढको स्वीकारेको छ । एसपी केसी भन्छन्, 'बिस्फोटले महानगको सुरक्षा कमजोर भएको नभई थप चुनौती थपिएको मात्र हो ।’ महानगरसहित अन्य स्थानीय निकायमा सुरक्षा व्यवस्थामा थप कडाई गर्दै कभर क्षेत्रलाई फराकिलो बनाइएको केसीले बताए ।

सेवाग्राहीको बढी भीड हुने स्थानीय निकाय र अन्य कार्यालय तथा आर्थिक कारोबार बढी हुने स्थानमा सुरक्षाको निगरानी बढाउने तयारी गरिएको उल्लेख गर्दै केसीले भने, 'महानगर, नगर प्रमुख र उपप्रमुखलाई व्याक्तिगत सुरक्षा (पीएसओ) को व्यवस्था गर्न नीतिगत रुपमा स्पष्ट भएमात्र सम्भव हुन्छ ।’ मोरङमा एक महानगरपालिकासहित ८ नगरपालिका र ८ गाउँपालिका छन् ।

मोरङका केही नगरपालिका प्रमुख र उपप्रमुखले व्याक्तिगत सुरक्षाकालागि पीएसओ लिएको उल्लेख गर्दै उपप्रमुख इन्दिरा कार्कीले महानगरपालिकाका प्रमुख र उपप्रमुखले पीएसओ माग्दा सुरक्षा निकायलाई नीतिगत निर्देशन चाहिने आफैँमा अनौठो भएको बताइन् । 'सुरक्षा निकायको यो दोहोरो चरित्र हो । 'उनले भनिन्, 'नगर प्रमुखले सुरक्षा पाउने महानगर प्रमुख र उपप्रमुखले सुरक्षा नपाउने भन्ने पनि हुन्छ ।'

'अन्य नगरपालिकाका प्रमुख र उप्रमुखले आन्तरिक रुपमा व्याक्तिगत सुरक्षाको सुविधा लिएका होलान् ।ु एसपी केसीले भने, 'नीतिगत रुपमा प्रमुख र उपप्रमुखलाई पीएसओ उपलब्ध गराउन नीतिगत रुपमै प्रष्ट जरुरी छ ।'

यसैबीच, मोरङ कांग्रेसले महानगरपालिका कार्यालयमा भएको बिस्फोटको निन्दा गर्दै संलग्न पत्ता लगाएर कारबाही गर्न माग गरेको छ ।

प्रकाशित : श्रावण २८, २०७५ १८:४९
प्रतिक्रिया
पठाउनुहोस्
ADVERTISEMENT
ADVERTISEMENT

हेर्दाहेदै धूवाँको मुस्लो

महानगर कार्यालयमा विस्फोट
विनोद भण्डारी

विराटनगर — विराटनगर महानगरपालिकाका प्रमुख भीमप्रसाद पराजुलीको कार्यकक्षअघि सेवाग्राही बस्ने स्थानमा आइतबार दिउँसो बम विस्फोट भएको छ । विस्फोटबाट फर्निचर, झयालका सिसा र भवनका भित्तामा क्षति पुगेको छ ।

पहिलो तलामा भएको विस्फोटको असरले आँगनमा पार्किङ गरिएको पराजुली चढ्ने को१झ ४९४ नम्बर गाडीको सिसा फुटेको छ । विस्फोटमा संलग्न रहेको आशंकामा प्रहरीले ८ जनालाई नियन्त्रणमा लिएको छ । महानगरपालिकाका कर्मचारी सामान्यत: दिउँसो २ बजे खाजा खान बाहिर निस्कन्छन् । त्यही समय पारेर विस्फोट गराइएको थियो । विस्फोट भएको स्थान कर्मचारी र सेवाग्राही ओहोरदोहोर गर्ने मुख्य क्षेत्र हो ।

विस्फोटका समयमा पराजुलीको कार्यकक्षमा वडा १४ को बाल माविको छेउमा स्वास्थ्य चौकी निर्माण गर्न जग्गादाता उपेन्द्रप्रसाद यादवले अढाई कठ्ठा जमिन नि:शुल्क हस्तान्तरण गर्दै थिए । वडाध्यक्ष बलदेव यादवका अनुसार हस्तान्तरण गरी प्रमुख पराजुलीसहित सबै बाहिर निस्कन खोज्दाखोज्दै ठूलो आवाज आएको थियो । त्यसबेला उपप्रमुख इन्दिरा कार्की पराजुलीको कार्यकक्षमा प्रवेश गर्दै थिइन् । ‘धूवाँले कपाल सबै सेतो भएको थियो, आवाजले एउटा कानको जाली नै फुटेजस्तो भयो । भित्तामा ठोक्किएर घुँडामा सामान्य चोट लाग्यो,’ विस्फोटको धूवाँले छोपिएपछि आत्तिएकी कार्कीले भनिन्, ‘धन्न बाँचियो ।’

अचानक ठूलो आवाज आउँदा कार्यालयको विद्युत् सर्ट भएर इन्भर्टर र वातानुकलन उपकरण (एसी) विस्फोट भएको अनुमान गरिएको नगर प्रमुख पराजुलीले बताए । भन्छन्, ‘पछि बारुदको गन्ध र धूवाँको मुस्लो आएपछि बम विस्फोट भएको थाहा भयो ।’घटनाको भत्र्सना गर्दै पराजुलीले संविधान र वर्तमान राज्य संरचना नमान्नेहरूले विस्फोट गराएको हुन सक्ने बताए । आफूलाई कसैबाट पनि धम्की नआएको उल्लेख गर्दै उनले जनताका प्रतिनिधि बसेर जनताकै काम गर्नेलाई लक्षित गरी विस्फोट गराउनु निन्दनीय भएको बताए । उनले कमजोर सुरक्षाका कारण दिउँसै महानगर कार्यालयको मुख्य क्षेत्रमा विस्फोट भएको दाबीसमेत गरे ।

विस्फोट कसले र किन गराएको भन्ने पुष्टि हुन नसकेको मोरङका प्रहरी प्रमुख एसपी मनोज केसीले बताए । विस्फोटमा संलग्न भएको आशंकामा सोधपुछका लागि ८ जनालाई नियन्त्रणमा लिएको जानकारी दिँदै उनीहरूको नाम भने सार्वजनिक गर्न नमिल्ने बताए । तालिम प्राप्त कुकुरबाट समेत घटनास्थलको निरीक्षण गराइएको छ ।


घटनास्थलमा टिनका टुक्रा भेटिएकाले टिनको डब्बामा विस्फोटक पदार्थ राखेर विस्फोट गराएको आशंका केसीको छ । उनका अनुसार महानगरको सीसीटीभी फुटेजको पनि अध्ययन भइरहेको छ ।

गोइतको दाबी
यसैबीच, महानगरमा भएको विस्फोटको आफूहरूले गरेको दाबी तराई जनतान्त्रिक मुक्ति मोर्चा (क्रान्तिकारी) ले गरेको छ । प्रदेश २ स्थित जिल्लाका कान्तिपुर संवाददाताहरूलाई विज्ञप्ति प्रेषित गर्दै अध्यक्ष जयकृष्ण गोइतले यस्तो दाबी गरेका हुन् । ‘प्रदेश नम्बर १ को राजधानी, मोरङ जिल्ला सदरमुकाम विराटनगर महानगरपालिकाको कार्यालयमा हामी २ जिल्ला सप्तरी, सिरहामा मात्र सीमित छैनौं भन्ने जानकारी दिन प्रेसर कुकर बम विस्फोट गराएका छौं,’ विज्ञप्तिमा भनिएको छ ।

प्रकाशित : श्रावण २८, २०७५ ०९:४७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्