प्रधानमन्त्रीदेखि प्रधानन्यायाधीशसम्म पढेको स्कुल

रमेशचन्द्र अधिकारी

धनकुटा — एउटै जिल्लाबाट उपल्लो पदमा पुग्ने व्यक्तिको संख्या औंलामा गन्न सकिएला । तर एकै विद्यालयमा पढेका धेरै व्यक्ति उपल्लो पदमा पुगेको संयोग भने रोचक हो ।

धनकुटा ५, तल्लोकोप्चेमा रहेको गोकुण्डेश्वर बालमन्दिर माध्यमिक विद्यालय ।तस्बिर : रमेशचन्द्र । कान्तिपुर

यहाँको एउटा विद्यालयमा पढेका व्यक्ति प्रधानमन्त्री, प्रधानन्यायाधीशदेखि शैक्षिक, भाषा, संस्कृति, कला साहित्य, स्वास्थ्य, प्रशासनिक क्षेत्रको उच्च ओहोदामा पुगेका छन् । कुरो धनकुटा नगरपालिका ५, तल्लोकोप्चेमा रहेको गोकुण्डेश्वर बालमन्दिर माध्यमिक विद्यालय (तत्कालीन गोकुण्डेश्वर हाईस्कुल) को हो ।

यो स्कुलमा पढेकामध्ये सबैभन्दा सर्वोच्च पदमा पुग्ने व्यक्ति पूर्वप्रधानमन्त्री सूर्यबहादुर थापा हुन् । थापा उक्त विद्यालयका पूर्वछात्र हुन् । मुलुकमा पाँचपटक प्रधानमन्त्री भएका थापा जीवित रहुन्जेल उक्त विद्यालयमा नियमित जाने गर्थे । १९८९ सालमा स्थापना भएको विद्यालयमा ७ कक्षामा थापाले अध्ययन गरेको प्रधानाध्यापक दामोदर मिश्रले बताए ।

पूर्वप्रधानमन्त्रीदेखि वर्तमान अवस्थासम्म पनि शैक्षिक, प्रशासनिक, राजनीतिक लगायत क्षेत्रमा उक्त विद्यालयका छात्रछात्रा रहेको पाउँदा गर्वको महसुुुस हुने प्रधानाध्यापक मिश्र बताउँछन् । ‘यहाँ पढेका सूर्यबहादुर थापादेखि पछिल्लो पुस्तासम्म तीन दर्जनभन्दा बढी व्यक्तिले मुलुकका उच्च पद सम्हालिसकेका छन्’, उनले भने । पूर्व प्रधानन्यायाधीश ओमभक्त श्रेष्ठ पनि त्यहीं अध्ययन गरेका थिए । आँखाका पहिलो विशेषज्ञ डा. रामप्रसाद पोखरेलले २००९ सालमा अध्ययन गरेका थिए ।

पूर्वविद्यार्थी रहेका त्रिभुवन विश्वविद्यालयका पूर्वउपकुलपति डा. माधवप्रसाद शर्माले सोही विद्यालयबाटै वि.सं.२०१४ सालमा प्रवेशिका परीक्षा उत्तीर्ण गरेका हुन् । संस्कृतिविद् तुलसी दिवस, पूर्वसचिव गोविन्ददास मास्के, साहित्यकार डा.दयाराम सम्भव, नाट्यकर्मी अशेष मल्ल, प्राडा तीर्थप्रसाद मिश्र, पूर्वसचिव तथा अञ्चलाधीश रामनारायण श्रेष्ठ, तत्कालीन दूरसञ्चार संस्थानका महाप्रबन्धक रघुवरलाल श्रेष्ठ, पाइलट क्याप्टेन माधवलाल सिंह, साहित्यकार खगेन्द्रकुमार प्रधानाङ्ग लगायत पूर्वविद्यार्थी नै हुन् ।

यही लहरमा पछिल्लो छिमलका पूर्वमन्त्री डा. दुर्गा पोखरेल, वातावरणविद् नरेन्द्र पोखरेल, कलाकार उपेन्द्र दु:खी, शिक्षाविद्हरू उपेन्द्र पोखरेल, जीवलाल श्रेष्ठ, नारायण जोशी, वरिष्ठ अधिवक्ता नगेन्द्रभक्त श्रेष्ठ, प्राडा. शम्भु खतिवडा, कृष्णप्रसाद वस्ती, साहित्यकार ईशदिप श्रेष्ठ, राजेन्द्र श्रेष्ठ, पूर्वसांसद पदमबहादुर बस्नेत लगायत छन् ।

वि.सं.१९८९ मा तत्कालीन उत्साही युवाहरू पं. छविलाल पोखरेल, गजेन्द्रबहादुर प्रधानाङ्ग, लीलानाथ शर्मा, पूर्णलाल लप्टन, गणेशकुमार कर्माचार्य, पहलमान श्रेष्ठ, गुणराज जोशी लगायतको पहलमा विद्यालय स्थापना गरिएको थियो । यस्तै गजराम योगी, मोतीलाल श्रेष्ठ, रामभगत थेच्मी, भुवनेश्वर बौद्धाचार्य, लक्ष्मी श्रेष्ठ लगायतको योगदान पनि उल्लेखनीय थियो । विद्यालयलाई २००४ सालमा तत्कालीन राणा शासनको सरकारले सरकारी मान्यता दिएको पूर्वप्रधानाध्यापक मोहनकृष्ण श्रेष्ठले बताए । विद्यालयमा २००७ सालदेखि प्रवेशिका परीक्षा सुरु भएको थियो । २०२८ मा नयाँ शिक्षा सुरु भएपछि त्यसको एक वर्षपछि नजिकको बालमन्दिरको माथिल्लो तह समेत समावेशपछि हालको नाम कायम गरिएको थियो ।

Yamaha

प्रकाशित : भाद्र ३, २०७५ ०९:४९
ADVERTISEMENT
प्रतिक्रिया
पठाउनुहोस्
ADVERTISEMENT

नेकपामा नेतृत्व होडबाजी

कान्तिपुर संवाददाता

ओखलढुंगा — पहिले कांग्रेसको किल्ला भनेर जिल्ला चिनिन्थ्यो । तर गत सालको प्रदेश र प्रतिनिधिसभाको निर्वाचनमा तत्कालीन बाम गठबन्धनले ‘क्लिन स्वीप’ गर्‍यो । केन्द्रमा पार्टी एकता भएसँगै जिल्लामा पार्टी कार्यालय एकै ठाउँ राखियो ।

तीन महिनाभित्र जिल्लाहरूको पार्टी एकता गर्ने केन्द्रको निर्णयअनुसार अहिले छलफल तातिएको छ । छलफलका लागि प्रदेश, जिल्ला सबै तहका नेताहरू सम्मिलित कार्यदल काठमाडौंमै व्यस्त छन् । कतिकति प्रतिशत पदाधिकारी भागबन्डा गर्ने विषयमा खासै विवाद देखिएको छैन । तर नेतृत्व (अध्यक्ष) पदका आकांक्षी धेरै देखिएका छन् ।

जिल्ला अध्यक्षका दाबेदारमा चार जना नेताहरूको नाम चर्चामा छ । त्यसमध्ये माओवादी केन्द्रका तर्फबाट एक जनाको मात्र नाम छ, उनी हुन् बाबुराम गौतम । माओवादी केन्द्रका जिल्ला अध्यक्ष भइसकेका उनी पार्टीका तत्कालीन पोलिटब्युरो सदस्य थिए । अध्यक्ष जुनसुकै हालतमा गौतमलाई दिनुपर्ने जिल्लादेखि केन्द्रसम्म माओवादी पक्षको अडान छ ।

एमालेका तर्फबाट तीन जनाको नाम चर्चामा छ । ती हुन्, नानीबाबु बुढाथोकी, नेत्र भट्टराई र हर्कबोल राई । नानीबाबु बुढाथोकी एमालेका केन्द्रीय परिषद् सदस्य हुन् । उनी २०७० सालको दोस्रो संविधानसभा निर्वाचनमा क्षेत्र नं. २ बाट टिकट लिई पराजित भएका थिए । नेत्र भट्टराई जिल्ला उपाध्यक्ष हुन् ।

उनी जिल्लाको पुराना र अवसरबाट वञ्चित भएका त्यागी नेताका रूपमा चिनिन्छन् । हर्कबोल राई २०७० को संविधानसभामा समानुपातिकतर्फका सांसद थिए ।

जिल्लामा प्रतिनिधिसभा र प्रदेशसभा १ मा एमालेले टिकट पाएयता माओवादी केन्द्रले पार्टी एकताका बेला अध्यक्ष आफूहरूलाई दिनुपर्ने अडान राखेका थिए । उनीहरू तल्लो तहदेखि माथिल्लो तहसम्म बाबुराम गौतमकै नाममा सहमत भएका कारण विवाद देखिएको छैन । ‘मलाई लाग्छ अब दुईचार दिनभित्र एकता टुंगिन्छ । यो सहमतीय आधारमै हुन्छ । तत्काललाई मैले नेतृत्व गर्ने भन्ने प्रसंग छ ।’ गौतमले भने, ‘अधिवेशनपछि कार्यकर्ताले आफ्नो नेता चुनिहाल्नुहुन्छ त्यसमा विवाद छैन ।’ जिल्ला एकता कार्यदलमा माओवादीका तर्फबाट गौतम र प्रदेशसभा ‘ख’ का सांसद मोहनकुमार खड्का छन् । एमाले तर्फबाट प्रतिनिधिसभा सदस्य यज्ञराज सुनुवार र मोहनकुमार श्रेष्ठ छन् ।

‘दाबी गर्नु स्वाभाविक हो । तर एकतामा विवाद ठूलो हुँदैन ।’ जिल्ला एकता कार्यदलका सदस्य यज्ञराज सुनुवारले भने, ‘प्रदेशसँगको समन्वयमै हामी यसलाई टुंगो लगाउँछौं ।’ अर्का सदस्य मोहन खड्काले समेत केही दिनभित्र एकताले अन्तिम रूप लिने बताए ।

प्रकाशित : भाद्र ३, २०७५ ०९:४७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT