आपराधिक घटना लगातार, कारबाही शून्य

दुई जनाको वीभत्स हत्या
विनोद भण्डारी

विराटनगर — सातायता महानगरमा शृंखलाबद्ध आपराधिक घटना भइरहेका छन् । प्रहरीले घटनामा संलग्नलाई नियन्त्रणमा लिन सकेको छैन । महानगर र लेटाङ नगरमा गरी सातामा चारवटा आपराधिक घटना भए । दुई जनाको वीभत्स हत्या भयो ।

महानगर प्रमुख भीमप्रसाद पराजुलीको कार्यकक्ष अगाडि शक्तिशाली बम विष्फोट भयो । लगत्तै लेटाङको श्री माध्यमिक विद्यालयको खानी पानीको ट्यांकीमा विष हाल्दा २७ बालबालिका बिरामी परे । गत शुक्रबार ग्रामथान ३ सिद्राहामा विराटनगर १३ की २२ वर्षीया शिखा घिमिरेको हत्या उनकै प्रेमी दिनेश भट्टराईले गरे ।


Yamaha

त्यसलगत्तै शनिबार राति महानगर २ भृकुटी चौकको न्यु विक्की हार्डवेयर पसलमा सुरक्षार्थ खटिएका टंकप्रसाद भट्टराईको वीभत्स हत्या भयो ।


यी घटनामध्ये प्रहरीले एउटा हत्यामा संलग्नलाई नियन्त्रणमा लिएको छ । बाँकी तीनवटा घटनामा संलग्नको नजिक प्रहरी पुग्न सकेको छैन । शिखा हत्यामा संलग्न दिनेशलाई प्रहरीले नियन्त्रणमा लिएको छ । मोरङ प्रहरीका प्रबक्ता डिएसपी निशान थापाले भने ‘बाँकी तिनवटै घटनाका वारेमा सोधपुछ र अनुसन्धान भइरहेको छ ।’


विद्यालयको खानेपानी ट्याङकीमा विष हालेको घटनाको छानबिन गर्न डीएसपी थापाकै संयोजकत्वमा समिति गठन भएको थियो । समितिले घटनामा संलग्न कसैलाई पनि नियन्त्रणमा लिन सकेको छैन । छानबिन र सोधपुछ कार्य निरन्तर भइरहेको थापाले बताए । महानगरको कार्यालयमा बम विष्फोट भएको साता वित्यो । तर प्रहरीले विष्फोट कसले गरेको भन्ने पत्ता लगाउन सकेको छैन । घटनालगत्तै प्रहरीले ८ जनालाई नियन्त्रणमा लिएको थियो । तर घटनामा उनीहरूको संलग्नता नरहेको प्रहरीले निष्कर्ष निकाल्यो ।


यो घटनाको पनि अनुसन्धान भइरहेको प्रवक्ता थापाको भनाइ छ । महानगर कार्यालयमा जडान गरिएका सिसी टिभी फुटेजमा विष्फोटको घटना रेकर्ड नभएका कारण अपराधीसम्म पुग्न नसकिएको प्रहरीको भनाइ छ । त्यस्तै शनिबार राती न्यु विक्की हार्डवेयरका सुरक्षा गार्ड भट्टराईको वीभत्स हत्या प्रकरणका दोषीलाई पनि प्रहरीले पक्राउ गर्न सकेको छैन ।


हार्डवेयरका मालिक निरवकुमार अग्रवालसहित शंकास्पद केहीलाई नियन्त्रणमा लिएर सोधपुछ र अनुसन्धान प्रहरीले गरे पनि निचोडमा पुग्न नसकेको प्रवक्ता थापाको भनाइ छ । उनका अनुसार हार्डवेयरमा रहेको सिसी टिभी फुटेजमा शनिबार राति नौ बजेसम्ममा केही मानिस हार्डवेयरमा छिर्दै गरेको देखिए पनि त्यसपछिको फुटेज रेकर्ड नभएकाले अनुसन्धानमा समस्या भएको हो । ‘आइतबार बिहान १० बजे घटना सार्वजनिक हुँदा सिसी टिभीको क्यामेरा फुटेको र विद्युत् लाइन विच्छेद गरिएको अवस्थामा थियो,’ थापाले भने, ‘सबै आपराधिक घटनामा संलग्न चाँडै प्रहरी नियन्त्रणमा पर्छन् तर तत्काल प्राविधिक समस्याका कारण प्रहरी अपराधीनजिक पुग्न नसकेको हो ।’


प्रकाशित : भाद्र ६, २०७५ १२:०७
प्रतिक्रिया
पठाउनुहोस्
ADVERTISEMENT
ADVERTISEMENT

महानगरमा विस्फोटः 'पक्राउ परेकाहरुको संलग्नता देखिएन'

विनोद भण्डारी

काठमाडौँ — विराटनगर महानगरपालिकाका प्रमुख भीमप्रसाद पराजुलीको कार्यकक्षअघि आइतबार दिउँसो भएको बम विस्फोट कसले गरेको प्रहरीले भन्ने अझै पुष्टि गर्न सकेको छैन ।

विस्फोटमा संलग्न भएको आशंकामा नियन्त्रणमा लिएका ८ जना घटनामा संलग्न नभएको प्रहरीले बताएको छ ।

विस्फोट कसले गराएको भन्ने पुष्टि हुन नसकेको मोरङका प्रहरी प्रमुख एसपी मनोज केसीले बताए । 'यसैले विस्फोट गराएको हो भन्ने स्थिती छैन’ उनले भने, 'घटनालगत्तै नियन्त्रणमा लिइएका ८ जना विस्फोटमा संलग्न नभएको पाइएको छ ।’ प्रहरीले उनीहरुको नाम भने सार्वजनिक गरेको छैन ।

तराई जनतान्त्रिक मुक्ति मोर्चा (क्रान्तिकारी)ले आइतबार विज्ञप्ती सार्वजनिक गर्दै बिस्फोटको जिम्मेवारी लिएको थियो । एसपी केसीले भने मोर्चा वा माओवादीको विप्लप समुह कसले विस्फोट गराएको हो भन्ने बारे अनुसन्धान भइरहेको बताए ।

कार्यालयको माथिल्लो तलामा रहेको प्रमुखको कार्यकक्ष अगाडीको सेवाग्राही बस्ने स्थानमा भएको विस्फोटले त्यहाँका फर्निचर, झ्यालका सिसा र आगनमा पार्किङ गरिएको प्रमुख चढने गाडीको सिसा क्षतिग्रस्त भएको थियो ।

महानगरले नगरको उचित सुरक्षा प्रबन्ध मिलाउन स्थानीय सुरक्षा संयन्त्रसमक्ष लिखित माग गरेको छ । प्रमुख पराजुलीका अनुसार प्रमुख र उपप्रमुखको व्याक्तिगत सुरक्षा मागपनि गरिएको छ ।

आइतबारको घटनापछि जिल्ला प्रहरी कार्यालयले सोमबारदेखि महानगरको कार्यालयमा सुरक्षा तैनाथ गरेको छ । यसअघि त्यहाँ प्रहरीको सुरक्षा नभएको महानगरले जनाएको छ ।

तर सुरक्षा निकायले महानगर प्रमुख पराजुलीको भनाईलाई खण्डन गर्दै सुरक्षा चुनौती बढको स्वीकारेको छ । एसपी केसी भन्छन्, 'बिस्फोटले महानगको सुरक्षा कमजोर भएको नभई थप चुनौती थपिएको मात्र हो ।’ महानगरसहित अन्य स्थानीय निकायमा सुरक्षा व्यवस्थामा थप कडाई गर्दै कभर क्षेत्रलाई फराकिलो बनाइएको केसीले बताए ।

सेवाग्राहीको बढी भीड हुने स्थानीय निकाय र अन्य कार्यालय तथा आर्थिक कारोबार बढी हुने स्थानमा सुरक्षाको निगरानी बढाउने तयारी गरिएको उल्लेख गर्दै केसीले भने, 'महानगर, नगर प्रमुख र उपप्रमुखलाई व्याक्तिगत सुरक्षा (पीएसओ) को व्यवस्था गर्न नीतिगत रुपमा स्पष्ट भएमात्र सम्भव हुन्छ ।’ मोरङमा एक महानगरपालिकासहित ८ नगरपालिका र ८ गाउँपालिका छन् ।

मोरङका केही नगरपालिका प्रमुख र उपप्रमुखले व्याक्तिगत सुरक्षाकालागि पीएसओ लिएको उल्लेख गर्दै उपप्रमुख इन्दिरा कार्कीले महानगरपालिकाका प्रमुख र उपप्रमुखले पीएसओ माग्दा सुरक्षा निकायलाई नीतिगत निर्देशन चाहिने आफैँमा अनौठो भएको बताइन् । 'सुरक्षा निकायको यो दोहोरो चरित्र हो । 'उनले भनिन्, 'नगर प्रमुखले सुरक्षा पाउने महानगर प्रमुख र उपप्रमुखले सुरक्षा नपाउने भन्ने पनि हुन्छ ।'

'अन्य नगरपालिकाका प्रमुख र उप्रमुखले आन्तरिक रुपमा व्याक्तिगत सुरक्षाको सुविधा लिएका होलान् ।ु एसपी केसीले भने, 'नीतिगत रुपमा प्रमुख र उपप्रमुखलाई पीएसओ उपलब्ध गराउन नीतिगत रुपमै प्रष्ट जरुरी छ ।'

यसैबीच, मोरङ कांग्रेसले महानगरपालिका कार्यालयमा भएको बिस्फोटको निन्दा गर्दै संलग्न पत्ता लगाएर कारबाही गर्न माग गरेको छ ।

प्रकाशित : श्रावण २८, २०७५ १८:४९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT