पहिरोले विद्यालय जोखिममा
ओखलढुंगा — लिखु गाउँपालिका ३ स्थित भीमसेनस्थान माध्यमिक विद्यालय पहिरोको जोखिममा परेको छ । जोखिमले विद्यालयको पठनपाठन प्रभावित भएको छ ।
विद्यालय भवनको आडमै पहिरो बगेपछि कक्षाकोठामा पढाउन नसकिएको विद्यालयले जनाएको छ । पहिरो जानुको खास कारण भने केही महिना अघिमात्र खनिएको सडक हो । करिब ८ महिनाअघि खनिएको सडककै कारण करिब २० मिटर अग्लो डिल भत्किँदा विद्यालय जोखिममा परेको हो ।
विद्यालयमा हाल २ सय १३ विद्यार्थी पढ्छन् । पहिरोले गर्दा विद्यालयको दुई ब्लकका चार कक्षाकोठामा विद्यार्थी राखेर पढाउन नसकिने अवस्था सिर्जना भएको प्रधानाध्यापक श्रीराम श्रेष्ठले बताए । हाल पहिरो झरेको ठाउँमा थप क्षति नहोस् भनेर पालले छोपिएको उनले बताए ।
भूकम्पले क्षतिग्रस्त विद्यालयको जोखिममा परेको भवनहरू गत वर्षमात्र १४ लाख लगानीमा निर्माण गरिएको थियो । अब क्षतिग्रस्त विद्यालय कसले निर्माण गर्ने भन्ने अन्योल बढेको छ ।
प्रकाशित : भाद्र १०, २०७५ ०९:०७
