लाखौंका उपकरण उपयोगविहीन

कान्तिपुर संवाददाता

सुनसरी — वीपी कोइराला स्वास्थ्य विज्ञान प्रतिष्ठान र मेडिकल उपकरण आपूर्तिकर्ता बायोमेड इन्टरनेसनल काठमाडौंबीचको विवादले एक वर्षअघि खरिद गरेको ७४ लाख रुपैयाँभन्दा बढी पर्ने उपकरण उपयोगविहीन बनेको छ ।

विवादले सर्जिकल माइक्रोस्कोप नामको उपकरण प्रतिष्ठानको भण्डारमा थन्क्याइएको छ ।

उक्त सर्जिकल माइक्रोस्कोप एचएस एलेग्रा ५०० हो । सिंगल हेडेड सर्जिकल माइक्रोस्कोपलाई बढीमा ५५ लाख मात्र पर्ने जनाइएको छ । तर आपूर्तिकर्ता बायोमेडले सोही उपकरणलाई ‘डबल हेडेड’ भनेर दाबी गरेको छ । बायोमेड चेतन अग्रवाल र उनका दाजुभाइको कम्पनी हो ।

Yamaha

उनीहरूका दर्जन बढी कम्पनी छन् । प्रतिष्ठानभित्र १२ वर्षसम्म औषधि बिक्री कक्ष खोलेर बसेका अग्रवालका कम्पनीमध्ये गर्गले यसअघि आपूर्ति गरेको ३ लाख प्रतिगोटा पर्ने आठ डेन्टल चियर काम नलाग्ने अवस्था पुगेका थिए ।

स्पाइनल र स्नायुसँग जोडिएको हाडजोर्नीको सर्जरी गर्दा प्रयोग हुने उक्त आधुनिक उपकरण माइक्रोस्कोप डबल हेडेड हो कि सिंगल हेडेड हो भन्नेमा प्रस्ट नहुँदा उपयोगविहीन हुन पुगेको छ । प्रतिष्ठानको हाडजोर्नी विभागले सर्जिकल माइक्रोस्कोप माग गरेपछि टेन्डर आहवान गरी प्रतिष्ठानले ०७४ असार २७ मा बायोमेडसँग उपकरण आपूर्तिका लागि सम्झौता गरेको थियो ।

प्रतिष्ठानको बायोमेडिकल इन्जिनियर, हाडजोर्नी विभागका प्रमुख, इन्चार्ज र अन्य प्राविधिकले बायोमेडले आपूर्ति गरेको उक्त उपकरण डबल हेडेड नभएर सिंगल हेडेड भएको उल्लेख गर्दै अस्पताल निर्देशकलाई पटकपटक पत्राचार गरे । अस्पताल निर्देशक डा.गौरिशंकर साहले बायोमेडलाई पत्र लेख्दै टेन्डर आहवान गर्दा उल्लेख गरिएको स्पेसिफिकेसन अनुसारको डबल हेडेड माइक्रोस्कोप आपूर्ति गर्नुपर्ने, त्यसो नभएर हाल स्टोरमा उपयोगविहीन भएर थन्काइएको सिंगल हेडेड उपकरण फिर्ता लैजान अनुरोध समेत गरेका थिए । प्रतिष्ठानका तर्फबाट अस्पताल निर्देशक साहले बायोमेडलाई ०७५ साउन १६ को मितिमा पत्र लेखेर सचेत गराएका छन् ।

बायोमेडले ०७५ साउन २९ मा लेखेको जवाफमा भनेको छ, ‘प्रतिष्ठानले माग गरेबमोजिमको सम्पूर्ण स्पेसिफिकेसन यस कम्पनीले पेस गरेको प्रस्तावमा दुरुस्त मिल्छ । सर्जिकल माइक्रोस्कोपका सम्बन्धमा स्पस्ट हुनका लागि स्पेसिफिकेसनको कागजात समेत विगतमा पेस गरेका थियौं ।’ प्रतिष्ठानका बायोमेडिकल इन्जिनियरदेखि मूल्यांकन समिति र हाडजोर्नी विभागका चिकित्सक, दुई जना रुटिङ ओटिले समेत उक्त माइक्रोस्कोप सिंगल हेडेड भएको बताएका छन् ।

प्रतिष्ठानका उपकुलपति डा. राजकुमार रौनियारले भने, ‘प्रतिष्ठानको मूल्यांकन समिति, बायोमेडिकल इन्जिनियर र चिकित्सकलाई नै झुक्याउने प्रयास भएको देखियो ।’

प्रकाशित : भाद्र २३, २०७५ ०९:१८
ADVERTISEMENT
प्रतिक्रिया
पठाउनुहोस्
ADVERTISEMENT

मनकामना धाममा खानेपानी अभाव

अरुण नदीको धमिलो पानी पिउन बाध्य
दर खुवाउन गएका प्रतिनिधिलाई वृद्धवृद्धाले समस्याको चाङ देखाए
कान्तिपुर संवाददाता

संखुवासभा — मनकामना धामको वृद्धाश्रममा बस्दै आएकी गायत्रीनन्द गिरीले तीजको दर खुवाउन पुगेका स्थानीय तहका प्रमुख, नेता र आयोजकलाई पिउने पानी र सञ्चार समस्या भएको गुनासो राखिन् ।

शुद्ध पिउने पानी नहुँदा अरुण नदीको धमिलो पानीले काम चलाइरहेको उनले बताइन् । सृजनशील सामुदायिक विकास केन्द्र खाँदबारीले आयोजना गरेको तीजको दर खुवाउने कार्यक्रममा अधिकांश वृद्धवृद्धाले समस्याका चाङ राखे ।

धमिलो पानीको समस्या राखे लगत्तै उनले टेलिफोन सेवा पनि नभएको बताइन् । ‘सञ्चारको सुविधा नहुँदा बिरामी पर्दा फोन सम्पर्क गर्न समस्या छ,’ उनले भनिन्, ‘चिनजानकालाई फोन गरेर औषधि मगाउन गाह्रो भयो, त्यसको पनि केही व्यवस्थापन गरिदिनुपर्छ ।’

उनले बिजुलीको व्यवस्था भए पनि टेलिभिजन नहुँदा मुलुकमा के भइरहेको छ भन्ने कुराको जानकारी नभएको समस्या पनि राखिन् । ‘मुलुकमा कानुन परिवर्तनदेखि धेरै कुरा भएको गफ गरेको सुन्छौं तर वास्तविकता केहो भन्ने हामीलाई पत्तो छैन,’ उनले भनिन् ।

वृद्धाश्रममा ४० बढी वृद्धवृद्धा बस्दै आएका छन् । चर्को घाममा दिन कटाउनु परेको पनि उनले गुनासो सुनाइन् । जिल्ला समन्वय समितिका प्रमुख सुमन शाक्यले मनकामना गुरुयोजना निर्माण गरेर समस्या समाधान गर्ने बताए ।

‘हामीलाई यहाँको समस्याका बारेमा पूर्ण जानकारी छ,’ उनले भने, ‘योपटक खाँदबारी नगरपालिकामार्फत बजेट आएको छ, त्यो बजेटले केही व्यवस्थापन हुनेछ ।’ नगरमा मनकामनाको विकासका लागि ५० लाख आएको पनि उनले बताए । यी बृद्धवृद्धालाई खाना र आवासको व्यवस्थापनका लागि अमेरिकामा बस्दै आएका संखुवासभावासी जुटिरहेको उनले सुनाए ।

कांग्रेस सभापति दीपनकुमार श्रेष्ठ सबै मिलेर मनकामना धामको विकासमा लाग्नुपर्ने बताउँछन् । परिवार छाडेर बस्दै आएका वृद्धवृद्धाका लागि केही गर्न नसकेकोमा दु:खेसो राख्दै उनले अब मनकामनालाई धार्मिक पर्यटकको हिसाले प्रचार गर्नु पर्नेमा जोड दिए । खाँदबारीका दिनेश श्रेष्ठले टेलिभिजन र सञ्चारका लागि टेलिफोनको यवस्था गरिदिने आश्वासन दिएका छन् ।

प्रकाशित : भाद्र २३, २०७५ ०९:१७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT