भुटानी शरणार्थीकाे बेलडाँगी–१ शिविर खाली

शरणार्थी तेस्रो मुलुक पुनर्वास तथा बाँकी रहेकालाई अन्यत्र स्थानन्तरण गरिएपछि दमक नगरपालिका–२ को उक्त शिविर खाली भएको शिविरका पूर्वसचिव सञ्चहाङ सुब्बाले बताए । खाली गर्ने क्रममा थोरै संख्यामा त्यहाँ बस्दै आएका शरणार्थीलाई बेलडाँगी–२ र ३ मा घर निर्माण गरी सारिएको पूर्वसचिव सुब्बाले बताए । बेलडाँगीमा तीन वटा शिविर खडा गरेर शरणार्थीलाई राखिएको थियो ।

भत्काउन बाँकी केही पुराना छाप्रा र शरणार्थी रेखदेख कार्यालयको कंक्रिट घर बाहेक अन्य सबै घर भत्काएर उक्त क्षेत्रबाट हटाइसकिएको छ । शरणार्थी शिविर स्थापनापछि बेलडाँगीमा १ मा २५ हजार र स्थानन्तरणको समयमा ७ सय ७४ जना रहेको शिविर व्यवस्थापन समितिले जानकारी दिएको छ ।

सन् २००७ देखि शुरु भएको तेस्रो मुलुक पुनर्वासपछि हाल बाँकी रहेका बेलडाँगी २ र ३ तथा पथरी शनिश्चरे शरणार्थी शिविरमा गरी ६ हजार १ सय ४३ जना मात्र दर्ता भएका शरणार्थी रहेको शिविर व्यवस्थापन समितिले जनाएको छ ।

दर्ता हुनबाट बञ्चित भुटानी शरणार्थीको संख्या एक हजार ७ सय ४१ रहेको उनीहरुले दावी गर्दै आएका छन् ।