भालुको आक्रमणबाट दुई महिला गम्भीर
ओखलढुंगा — सोलुखुम्बुको दुधकुण्ड नगरपालिका–३ माठुङका दुई महिला भालुको आक्रमणबाट गम्भीर घाइते भएका छन् । घाँस काट्न गएका बेला भालुले आक्रमण गर्दा स्थानीय ४० वर्षीया सानु मगर र ४७ वर्षीया मनकुमारी मगर घाइते भएका हुन ।
बिहीबार घाँस काटेर फर्कदा भालुले आक्रमण गरेको हो । आक्रमणबाट उनीहरुको टाउको, घाटी, ढाड र तिघ्रामा गहिरो चोट लागेको छ । घाइते दुवैलाई बिहीबार साँझ उपचारका लागि ओखलढुंगा सामुदायिक अस्पताल ल्याइएको थियो ।
घाइतेहरुको अवस्था गम्भीर भएकोले मौसम सुधार भएमा थप उपचारका लागि काठमाडौं पठाइने अस्पतालले जनाएको छ ।
पाँचजना महिलाहरु घाँस काट्न गएकोमा अन्य तीनजना भने आक्रमणबाट भागेर जोगिएका थिए ।
प्रकाशित : भाद्र २९, २०७५ ०९:१३प्रतिक्रिया