सार्वजनिक जग्गा खोज्दै उपमहानगर

सार्वजनिक जग्गामा कतै बस्ती, कतै खेतीपाती
अतिक्रमणबाट जोगाएर सार्वजनिक संरचना बनाइने
कान्तिपुर संवाददाता

सुनसरी — सार्वजनिक, ऐलानी, पर्ती जग्गालाई थप अतिक्रमित हुनबाट जोगाएर सदुपयोग गर्न इटहरी उपमहानगरले त्यस्ता जग्गा खोजी सुरु गरेको छ । बिहीबार मालपोत र नापी कार्यालयमा इटहरी उपमहानगरमा रहेका सार्वजनिक सरकारी, ऐलानी पर्ती जग्गा छुट्याइदिन आग्रह गरिएको छ ।

सुनसरीको इटहरी उपमहानगरपालिकाका कार्यालय परिसर । तस्बिर : प्रदीप

सार्वजनिक ऐलानी पर्ती जग्गासँगै अरूका पनि कित्ता नम्बर खुले पनि कहाँको नक्साअन्तर्गतको कित्ता नम्बर हो छुट्याउन नसकेपछि समितिले नम्बरी र सार्वजनिक सरकारी जग्गा छुट्याउन आग्रह गरेको हो ।


स्वामित्वमा समितिले साविक इटहरी नगरपालिका र पछि गाभिएका साविक गाविसका विभिन्न क्षेत्रमा रहेका सार्वजनिक, ऐलानी, पर्ती जग्गा खोजी गर्न गठित समितिको वैठकले खोजी सुरु गरेको समितिका संयोजक वडा १३ का अध्यक्ष शिवनारायण चौधरीले बताए । उपमहानगर क्षेत्रमा रहेका सरकारी ऐलानी पर्ती जग्गा पहिचानका लागि पहिले नापी कार्यालयसँग समन्वय गरेर वडा नक्साको आधारमा ती छुट्याउने संयोजक चौधरीले वताए । उनले भने, ‘नक्सा प्राप्त भएपछि प्राविधिकसहित प्रत्येक वडामा पुगेर जनप्रतिनिधि, राजनीतिक दलका प्रतिनिधि र नागरिक समाज लगायतसँग सर्वपक्षीय छलफल गरिनेछ ।’

Yamaha


उनले इटहरीमा सरकारी स्वामित्वका जग्गाहरू धेरै भए पनि कतै बस्ती बसेको, कतै खेती भइरहेको देखिएकाले ती जग्गा खोजी गरेर संरक्षण गर्ने र त्यस्ता जग्गामा बहुजातीय संग्रहालय, क्रिकेट, फुटबल खेल्ने खेलकुद मैदान, आन्तरिक पर्यटक आकर्षित गर्न बालउद्यान वा खुला पार्क, सार्वजनिक पुस्तकालय, निर्माण गर्न सकिने बताए ।


उनले उद्योग वाणिज्य संघ, नागरिक समाज र बुद्धिजीवीसँग बसेर जंगल, खोला खोल्सी, खहरे किनार क्षेत्रका जग्गा पहिचानका लागि छलफल गरेर समितिले सार्वजनिक, पर्ती, ऐलानी जग्गा कहाँ कति छ जानकारी प्राप्त गर्ने बताए । यसअघि इटहरी उपमहानगरका इन्जिनियर विकास भट्टराईको संयोजकत्वमा बनेको जग्गा खोजबिन तथा संरक्षण समितिले उपमहानगरमा ९ सय ९५ विगाह ६ कठ्ठा डेडधुर जग्गा ऐलानी, पर्ती, जग्गा रहेको प्रतिवेदन बुझाइसकेको छ ।


समितिले बुझाएको प्रतिवेदनमा खोलानाला, पोखरी, मठमन्दिरले चर्चेकोसहित साविकको इटहरीमा २ सय ३० बिघा ७ धुर, खनारमा ३ सय २६ बिघा १९ कठ्ठा ११ धुर, एकम्वामा १ सय ७३ बिघा १६ कठ्ठा ११ धुर, पकलीमा १ सय २२ बिघा ६ कठ्ठा ५ धुर र हाँसपोसामा १ सय ४१ विघा १५ कठ्ठा १५ धुर जग्गा छ ।


प्रतिवेदनमा उपमहानगरपालिकाको स्वामित्वमा वा सरकारी सार्वजनिक जग्गा भनेर देखिए पनि संरक्षण र सदुपयोग हुन नसकेकाले अरूको स्वामित्वमा रहेको जग्गाको कित्ता नम्बर र नक्साबाट छुट्याउन समितिले पहल गरिरहेको चौधरीले बताए ।


समितिका सदस्य अधिवक्ता शारदा अधिकारीका अनुसार अघिल्लो समितिले दिएको प्रतिवेदनमा वडावडामा रहेका जग्गाको कित्ता नम्बर उल्लेख गरिए पनि नक्सा पहिचान हुन नसकेकाले नापी र मालपोत कार्यालयबाट नक्सा पहिचान गरेर ती सवै जग्गा छुट्याएर संरक्षण गरिने छ ।


उनले सार्वजनिक जग्गा संरक्षण नगरे निकट भविष्यमा ती जग्गाको स्वामित्व अरूमा सर्न सक्ने भएकाले जग्गा खोजी कार्य तीव्र पारिएको बताइन् । उनले खोला खोल्सी अतिक्रमणले बाढीपहिरोको बेला बढी धनजनको क्षति हुन सक्ने र सार्वजनिक जग्गा अतिक्रमणले सरकारी स्वामित्वको सम्पत्ति दुरुपयोग हुने भएकाले समितिले ती जग्गा छुट्याउन सुरु गरेको बताइन् ।

Esewa Pasal

प्रकाशित : भाद्र २९, २०७५ ०९:५६
ADVERTISEMENT
प्रतिक्रिया
पठाउनुहोस्
ADVERTISEMENT

आँखाका भारतीय बिरामीको चाप

विराटनगर आँखा अस्पतालको आकर्षण बढ्दो
१२ वर्षमा ५ लाख ७९ हजारको शल्यक्रिया
कान्तिपुर संवाददाता

मोरङ — भारत, बिहारको पूर्णियाका ६० वर्षीय रुद्रनारायण यादव विराटनगर आँखा अस्पतालमा शल्यक्रिया गराएपछि देख्न सक्ने भएका छन् । २५ वर्षदेखि उनी दृष्टिविहीन उनी एउटा आँखामा नानी प्रत्यारोपण गरेपछि देख्न सक्ने भएका हुन् ।

जवानीमै सुरुमा आँखाबाट आँसु बग्न थालेको र बिस्तारै धमिलिँदै पछि देख्नै छाडेको यादवले बताए । दृष्टि गुमेपछि गाउँमा ‘सुरदास’ नाम पाएका यादवले शल्यक्रियापछि देख्न सक्ने हुँदा खुसी व्यक्त गरे । यस्तै, भारतको उत्तर प्रदेशका मनिस पाण्डेका १२ वर्षीय छोराको आँखा शल्यक्रिया गरेपछि देख्न सक्ने भएका छन् । जन्मैदेखि दृष्टि नभएका छोराले संसार हेर्न पाएपछि खुसीको सीमा नभएको पाण्डेले बताए । उनले भारतमा सुविधासम्पन्न अस्पताल भए पनि अत्यन्तै महँगो र उपचार सहज नभएकाले यहाँ आएको बताए ।


अस्पतालले आँखा शल्यक्रियाका लागि अत्याधुनिक सुविधासहितको उपकरण ल्याएको छ । अझ बालबालिकाको आँखा शल्यक्रियाका लागि ‘जेप्टो फेको’ सर्जरीले धेरै सजिलो भएको चिकित्सकले बताएका छन् । अस्पतालमा भारतका विभिन्न प्रान्तबाट आँखा उपचारका लागि बिरामी आउने गरेको अस्पतालका प्रबन्धक कुमार पृथुले बताए । अस्पतालका अनुसार हालसम्ममा ५ लाख ७९ हजार ४ सय १५ जनाको आँखा शल्यक्रिया गरिएको छ । यस्तै हालसम्ममा २१ लख ६८ हजार २ जनाले आँखा उपचार गराएको अस्पतालले जनाएको छ ।


अस्पतालको १२ औं वार्षिकोत्सव अवसरमा बिहीबार प्रस्तुत गरिएको तथ्यांकमा सन् २०१७ सेप्टेम्बरदेखि सन् २०१८ अगस्टसम्म ५१ हजार ७ सय ५२ जनाको आँखा शल्यक्रिया गरेको उल्लेख छ । अस्पतालका कार्यक्रम निर्देशक डा. सञ्जयकुमार सिंहका अनुसार सन् २०१७ मा ४ लाख १३ हजार ४ सय ८५ जनाको आँखा जाँच गरिएको थियो । आँखा उपचारका लागि अस्पतालले गाउँगाउँसम्म पुगेर पनि सेवा उपलब्ध गराइरहेको उनले जनाए ।


सन् २००६ मा विराटनगरमा घर भाडामा लिएर स्थापना गरिएको अस्पताल हाल आफ्नै सुविधासम्पन्न भवनमा छ । नेपाल नेत्रज्योति संघको सहकार्यमा सञ्चालन भइरहेको अस्पतालले न्यूनतम शुल्कमा गुणस्तरीय सेवा उपलब्ध गराइरहेको सिंहले दाबी गरे । ‘आँखा उपचारमा न्यूनतम शुल्कमा गुणस्तरीय सेवा प्रदान गरेकै कारण अस्पतालले ख्याति कमाएको छ,’ उनले भने, ‘चुस्त व्यवस्थापन, दक्ष जनशक्ति, अत्याधुनिक उपकरण र सुविधायुक्त पूर्वाधारका कारण अस्पतालले सफलता पाउँदै गएको छ ।’


नेत्रज्योति संघका महासचिव श्यामकुमार पोखरेलले विराटनगर आँखा अस्पताल नेपालकै सर्वोत्कृष्ट अस्पताल बनेको बताए । ‘गुणस्तरीय सेवाका कारण अस्पतालले कामाएको ख्यातिले नेपालकै गौरव बढाएको छ,’ उनले भने, ‘अस्पताललाई आँखासम्बन्धी विश्वविद्यालय बनाउनका लागि जुनसुकै सहयोग गर्न संघ तयार छ ।’


संघका कोषाध्यक्ष तथा सगरमाथा आँखा अस्पतालका अध्यक्ष रविन्द्रलाल चौधरीले लहानमा डाक्टर बस्न नमानेका कारण विराटनगरमा पनि आँखा अस्पताल सञ्चालन गर्नुपरेको बताए । विराटनगर प्रदेश १ कै सबैभन्दा ठूलो सहर भएको र भारतीय बिरामीलाई पनि उपचारका लागि आउन सहज भएका कारण पनि आँखा अस्पतालमा बिरामीको सधैं चाप हुने गरेको उनले बताए ।


अस्पतालका उपाध्यक्ष विजयहरि शर्माले विराटनगर यो अस्पताल स्थापनाले आँखा उपचारका लागि विदेश जानुपर्ने बाध्यता हटेको बताए । अस्पतालका अध्यक्ष पदमनारायण चौधरीले गुणस्तरीय स्वास्थ्यसेवा सर्वसुलभ रूपमा जनतामाझ पुर्‍याउने अभियानमा अस्पताल लागिपरेको बताए ।

प्रकाशित : भाद्र २९, २०७५ ०९:५५
पूरा पढ्नुहोस्
ADVERTISEMENT
प्रतिक्रिया
पठाउनुहोस्