बारीमै तरकारी कुहिँदै

रौतामाई, लिम्चुबाङ र ताप्ली गाउँपालिका र कटारी नगरपालिकको पहाडी र लेकाली क्षेत्रमा वबमौसमी जैविक तरकारी खेती गरिन्छ । टमाटर, आलु, काउली, बन्दा, घिउसिंबी, करेला र हरियो रायोको साग यी स्थानीय तहको लेकाली क्षेत्रमा प्रशस्त खेती हुने गरेको छ ।

सडकको अवस्था राम्रो हुँदा गाईघाट र कटारी बजारका व्यापारीले बारीमै पुगेर गएर खरिद गर्ने गरेका छन् तर सडक अवरुद्ध भएपछि व्यापारीसमेत नआएको किसानले बताए । वर्षाबाट बचाएको तरकारी र फलफूलसमेत बिक्री नहुँदा समस्यामा परेको किसान विजय राईले बताए ।

‘टनेल बनाएर खेती गरिए पनि जमेको पानीले खतम पारिदियो,’ विजयले भने, ‘टनेलाले वर्षाको पानी मात्रै थेग्ने र बगेर आएको पानीलाई रोक्न नसक्दा तरकारी खेती नष्ट भएको छ ।’ वर्षाबाट जोगाएको तरकारी पनि बिक्री नहुँदा बारीमै कुहिएको उनले बताए ।

रौता/रानीबास, रानीबास/गाईघाट ४४ किलोमिटर सडक पूर्ण रूपमा अवरुद्ध छ । रौता र आसपास क्षेत्रमा उत्पादन गरिएको तरकारी रौता/रानीबास, रानीबास/गाईघाट हुँदै गाईघाट बजारमा ल्याएर बिक्री गर्ने गरिन्छ तर सडक सवारीसाधन सञ्चालन गर्नै नसक्ने गरी बिग्रिएकाले तरकारी र फलफूल बजार पुर्‍याउन नसकेको कृषि अभियन्ता गंगा रानामगरले बताए । ‘किसानले उत्पादन गरेर मात्रै हुँदैन रहेछ, उत्पादित वस्तु बजार पुर्‍याउन सडक आवश्यक पर्छ,’ कृषि अभियन्ता रानामगरले भने, ‘सडक नहुँदा पछिल्लो समय रौता क्षेत्रमा मात्रै लाखौं रुपैयाँको तकारी खेर गइरहेको छ ।’

कृषिलाई प्राथामिकता दिएर काम गरिए पनि व्यवस्थित सडक नहुँदा तरकारी, फलफूल र दूध बजार लैजान समस्या भएको कटारी नगरपालिका ११ वडाध्यक्ष दीपक बुढाथोकीले बताए ।