धरानमा बालिका बलात्कृत, बलात्कारी तत्कालै पक्राउ
सुनसरी — बालिका बलात्कार गरेको आरोपमा धरान उपमहानगरपालिका–११ बस्ने ३० वर्षीय दुर्गाबहादुर विश्वकर्मालाई प्रहरीले पक्राउ गरेको छ । उनलाई बलात्कार घटना भएको केही घण्टापछि नै प्रहरीले पक्राउ गरेको हो ।
इलाका प्रहरी कार्यालयका प्रहरी नायब उपरिक्षक सुमनकुमार तिम्सिनाका अनुसार विश्वकर्माले १२ वर्षीय बालिकालाई डर देखाएर सप्तरंगी पार्क नजिकैको शेर्पा समुदायको संरक्षित जग्गाको कम्पाउण्ड भित्र बलात्कार गरेका थिए ।
बलात्कार लगतै बालिकाले आमालाई रुदै भनेपछि प्रहरीलाई जानकारी दिइएको थियो । आरोपीलाई मातेको अवस्थामा घरैबाट पक्राउ गरी आइतबार थप अनुसन्धानकालागि जिल्ला अदालतबाट म्याद थप गरी हिरासतमा राखिएको प्रनाउ तिम्सिनाले बताए ।
पीडित बालिकाका आमाले भनिन्, ‘डर देखाएर बलात्कार गरी छोरीको जिन्दगी बरबाद गर्यो । यो फटाहालाई मृत्युदण्ड हुन्छ कि सर्वस्वसहित आजिवन काराबास हुन्छ, हदैसम्मको कारवाहीको व्यवस्था हुनु परो ।’
प्रहरीले पीडित बालिकाका आमा र परिवारले दिएको मौखिक जाहेरीको आधारमा विश्वकर्मालाई पक्राउ गरी सोधपुछ गर्दा आरोप स्वीकार गरेका दाबी छ । बालिकाको शारिरिक र मानसिक स्वास्थ्य परिक्षणकालागि विपि कोइराला स्वास्थ्य विज्ञान प्रतिष्ठान लगिएको र उनको अवस्था सामान्य देखिएकाले अभिभावकको जिम्मा लगाइएको पनि प्रहरीले जानकारी दिएको छ ।
प्रहरीले थप अनुसन्धानकालागि बालिकाको भेजिनल स्वावको टेस्टकालागि फरेन्सीक विभागमा पठाउने तयारी गरेको छ । विश्वकर्मा विरुद्ध जबर्जस्तीकरणी अन्तर्गत मुद्दा चलाउने तयारी भइरहेको प्रहरीले जनाएको छ ।