७ बालबालिका बिचल्लीमा

कान्तिपुर संवाददाता

खोटाङ — अभिभावक गुमेपछि एक परिवारका बालबालिका बिचल्लीमा परेका छन् । हलेसी तुवाचुङ नगरपालिका ८ धितुङका चन्द्र किरात र आमा तलकुमारी राईको मृत्युपछि सात बालबालिका बेसहारा बनेका हुन् ।

०७३ भदौ १९ गते आमा तलकुमारी र २०७५ साउन १८ गते बाबु चन्द्रको मृत्युपछि ५ छोरी र २ छोरा बिचल्लीमा परेका छन् । आमाबाबु दुवै गुमाएका उनीहरूको शिक्षादीक्षा र पालनपोषणमै समस्या परेको छ । सात बालबच्चामध्ये १७ वर्षीया जेठी बुङातुङ (कक्षा १२), १४ वर्षीया माइली रिमाबुङ (कक्षा १०), १२ वर्षीया साइली माहुरबुङ (कक्षा ८), १० वर्षीया काइली छोरी इलाबुङ (कक्षा ६) गरी चार बालिका स्थानीय बुलापन्थे माविमा पढ्छन् ।


त्यस्तै ८ वर्षीय जेठो छोरा नामसाङहाङ (कक्षा ४), ६ वर्षीया कान्छी छोरी निवाबुङ (कक्षा १) र ४ वर्षीय कान्छो तिम्सुङहाङ (बालकक्षा) स्थानीय पारुहाङ प्राविमा पढ्दै छन् । बाबु–आमाको मृत्युपछि यत्तिका बालबालिकाको पढाइसमेत बिथोलिएको छ ।

Yamaha

प्रकाशित : आश्विन १०, २०७५ ०७:३४
ADVERTISEMENT
प्रतिक्रिया
पठाउनुहोस्

महाकालीपारि फेरि डुबान

बढ्यो जोगबुडाको झोलुंगे पुल बगाउने खतरा
भवानी भट्ट

कञ्चनपुर — लगातारको वर्षाले कञ्चनपुरको माहाकाली नगरपालिका जोगबुडा नदी किनारका बस्ती डुबानमा परेका छन् । नगरपालिकाको वडा ८ को सुन्दरनगर र १० को कुतियाकभरको बस्ती डुबानमा परेको हो ।

‘राति ४ बजेदेखि बस्तीमा बाढी पसेको छ,’ महाकाली नगरपालिका ८ का अध्यक्ष ओम प्रकाश ओझाले भने, ‘दिउँसोदेखि बिस्तारै कम हुँदै गएको छ ।’ उनका अनुसार जोगबुडाको बाढी बस्तीमा पसेपछि सुन्दरनगरस्थित धानखेत पूरै डुबाएको छ । करिब सय बिघाभन्दा बढीको धान कामै नलाग्ने भएको उनले बताए । उनका अनुसार पाक्न लागेको धान बाढीले पुरिएको छ ।


तीन दिनदेखि लगातार पानी पर्दा महाकालीसँगै जोगबुडामा बाढी आएको हो । महाकालीको बाढीले जोगबुडाको बहाव रोक्दा बस्तीमा पसेको इलाका प्रहरी दोधाराका प्रहरी निरीक्षक नरेन्द्रबहादुर चन्दले बताए । उनका अनुसार सुन्दरनगरमा नदी किनारका १० वटा पसल र ५ घर डुबेका छन् । ‘पसलभित्रको सामान सबै निकालेका कारण खासै नोक्सान भएको छैन,’ उनले जनाए ।


यसैगरी कुतियाकभरमा बस्तीमा बाढी पस्नुका साथै जोगबुडा नदीमा निर्माण गरिएको झोलुंगे पुलसमेत कटानमा पर्दा जोखिम भएको प्रहरी निरीक्षक चन्दले बताए । कटान नियन्त्रणका लागि सुरक्षाकर्मी र स्थानीय जुटेको उनले जानकारी दिए । नदीमा पानी घटे पनि कटान बढ्दै गएको उनले जानकारी दिए ।


बाढी आउनुअघि समेत भारतीय पक्षले शारदा नहरको पानी जोगबुडामा छाड्दा कटान भइरहेको थियो । बाढीपछि कटान झन् तीव्र भएको वडा १० का अध्यक्ष नरबहादुर सुनारले बताए । ‘पुलको जग बगाउनै लाग्यो,’ उनले भने, ‘अब कुतियाकभरको बस्ती पनि जोखिममा छ ।’ उनका अनुसार पुल आसपास करिब सय मिटरजति लम्बाइमा नदीले तीव्र कटान गरिरहेको छ ।


भारतीय पक्षले शारदा नहरको पानी कालापुलबाट सीधै जोगबुडामा छाड्ने गरेको छ । यसले एक महिनादेखि सुन्दरनगर र कुतियाकभरमा कटान भइरहेको स्थानीय बताउँछन् । करिब १५ परिवारको खेतीयोग्य जमिन कटान गरेर नदीले बगाइसकेको वडाध्यक्ष सुनारले जनाए ।


यसअघि साउन अन्तिम साता आएको बाढीले जोगबुडा किनारका बस्तीहरू गिरिटोल, शान्ति टोल, सुन्दरनगर र कुतियाकभरलगायतमा डुबान भएको थियो । करिब ५० परिवार विस्थापित भएर नजिकैको विद्यालयमा आश्रय लिई बसेका थिए ।


यसैबीच भारतको धार्चुलामा रहेको धौलीगंगा जलविद्युत् परियोजना बाँध मंगलबार बिहान खोलिएपछि महाकालीको बहाव बढ्ने अनुमान गरिएको छ । महाकालीमा बहाव बढेसँगै फेरि नदी किनारका बस्ती डुबानमा पर्ने खतरा छ । वर्षा नरोकिए कुतियाकभर, सुन्दरनगरलगायत फेरि डुबानमा पर्ने खतरा रहेको स्थानीय बताउँछन् ।

प्रकाशित : आश्विन १०, २०७५ ०७:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT