चालु संसद्‍ बैठकबाटै प्रदेश नामांकन र स्थायी राजधानी टुंगो : मुख्यमन्त्री राई

बिहीबार धनकुटामा स्वास्थ्य निर्देशनालय र शिक्षा विकास निर्देशनालय उद्घाटनपछि मुख्यमन्त्री राईले एक महानगर, दुई उपमहानगर र अन्य नगर तथा गाउँपालिकासहित दर्जन बढी स्थानीय तह समेटेर त्यस क्षेत्रभित्र राजधानी कायम हुन सक्ने संकेत गरे । उनले विराट, सप्तकोसी, कोसी, सगरमाथा, किरातलगायत प्रस्तावित नाममध्ये एकलाई प्रदेशको नामांकन गरिने बताए ।

आफू सहजकर्ताका भूमिकामा रहेकोले एकिन नाम हुनु पर्ने बताउन नचाहेको स्पष्ट पारे । ‘पिरा र गुन्द्रीमा बसेर काम थालेको प्रदेशले अब उपलब्धिमूलक गतिविधिमा फड्को मारिसकेको छ’, उनले भने, ‘प्रदेशसभालाई भुमिकाविहीन भन्दै मिडियाबाजी गर्नेका लागि अब हामी गतिलो जवाफ दिने पक्षमा उभिएका छौं ।’ उनले प्रदेशका कार्यशैलीबाट अब्बल प्रदेशको पहिचान दिने दाबी गरे ।

आगामी १५ दिनभित्र प्रदेशअन्तर्गतका सम्पूर्ण प्रशासनिक संरचना गठन गर्ने जानकारी दिए ।