पाथीभरामा दर्शनार्थी बढे

पहिला बोकापाठाको बली चढाउने गरिएकोमा पछिल्ला वर्ष भने माना, पाथीमा भरेर सिक्का चढाउने प्रचलन
आनन्द गौतम

ताप्लेजुङ — झापा बिर्तामोडदेखि ताप्लेजुङसम्म जमरे औंसीदेखि दसैंका लागि आउजाउ गर्नेहरूका कारण चहलपहल बढेको छ  । बिर्तामोडदेखि चारआली हुँदै ताप्लेजुङ सुकेटारसम्मको २ सय ४० किलोमिटर मेची राजमार्ग सानाठूला सवारी साधनको दोहोरीलत आउजाउ भइरहेको छ  ।

ताप्लेजुङको पाथीभरामा सिक्का पैसा चढाउन भर्दै महिला । तस्बिर : आनन्द/कान्तिपुर

तराईबाट पहाड उक्लने र फर्कनेको ताँती सुरु भएको छ । बर्सेनि छुट्ने यो ताँती वडा दसैंको पूर्वसन्ध्यामा गरिने धार्मिक भ्रमणमा निस्किएको हो । ३ हजार ७ सय ९४ मिटर उचाइमा अवस्थित पाथीभरामा यो सिजनमा दैनिक पाँच हजारसम्म तीर्थयात्री आउने गरेको माथिल्लो फेदीका होटल ब्यवसायी बताउँछन् ।


Yamaha

पाथीझै चुलिएको मन्दिरमा पुग्न उनीहरूले फुङलिङ नगरपालिका ११ फुरूम्वूको काफ्ले पार्टीसम्म गाडीमा यात्रा गर्नुपर्छ । सुकेटार विमानस्थलदेखि काफ्ले पार्टीसम्मको १२ किलोमिटर भने कच्ची सडकको यात्रा गर्नुपर्छ । त्यसपछिको साढे चार किलोमिटर पैदल यात्रा ।


दर्शनका लागि आउने तीर्थयात्रीको संख्यालाई दृष्टिगत गरी पाथीभरा मन्दिर क्षेत्रमा स्वयंसेवक, सुरक्षाकर्मी परिचालन, होटलहरूको व्यवस्थापन लगायतको काम गरिएको छ । पाथीभरामा क्रियाशील संस्थाहरू पाथीभरा देवी मन्दिर संरक्षण तथा संवद्र्धन समिति, पाथीभरा क्षेत्र विकास समिति र स्थानीय प्रशासनले यसको व्यवस्थापन मिलाएका हुन् ।


फुङलिङ नगरपालिका १० र ११, पाथीभरा ३, सिरिजङ्गा ३, र फक्ताङलुङ गाउँपालिका ४ को शीरमा चुलिएर बसेको मन्दिरमा पुग्ने पैदलमार्गसम्म जस्तै बनाइएको छ । मोटरबाटो पुगेको काफ्ले पार्टीदेखि मन्दिरसम्मै ठूला ढुंगा ओछ्याएर यात्राका लागि सहज बनाइएको र यात्रुलाई कुनै समस्या नहुने समिति उपाध्यक्ष नारान थापा बताउँछन् ।


उकालोमा खानका लागि ठाउँठाउँमा पानीको व्यवस्था गरिएको छ भने मन्दिरमा चिया र तातोपानी खुवाउने व्यवस्था छ । सुकेटारसम्म कालोपत्रे र गोरेटो बाटो पनि हिँड्न सहज भएकाले त्यो बीचको कच्ची सडक नियमित सञ्चालनका लागि १२ जना सडक हेरालु राखिएको क्षेत्र विकास समितिका सदस्य गोपाल न्यौपाने बताउँछन् ।


न्यौपानेका अनुसार उनीहरूले १५ दिनअघिदेखि खाल्डामा ढुंगा हाल्ने, पानी कटाउने र यातायात सञ्चालनमा सहज बनाउने काम गरिरहेका छन । धेरै बिग्रेको सडकमा स्काइभेटर मेसिनले सडक बनाउने कामसमेत गरेको उनले बताए । सडक नियमितताको जिम्मेवारी तत्कालीन जिविस सदस्य ओमप्रकाश राईलाई दिइएको छ । साँझ बिहान हिँड्न सहज बनाउन सडक बत्तीको व्यवस्था गरिएको छ ।


माथिल्लो फेदी अस्थायी प्रहरी चौकीको तथ्यांकअनुसार देसको कुनै पनि जिल्लाका नागरिक पाथीभरा आउनबाट वञ्चित छैनन् । यहाँको चौकीमा तीर्थयात्रीको विवरण राखिन्छ । सबैभन्दा बढी तराईको झापा, मोरङ, सुनसरी र काठमाडौंका यात्रु आउने गरेका छन् । भारतको सिक्किम, आसाम, मनिपुर र दार्जेलिङबाट पूजाका लागि भक्तजन आउँछन् । अधिकांशले समूह बनाएर आफैंले गाडी लिएर आउने उनीहरू सदरमुकाम फुङलिङ र सुकेटारदेखि स्थानीय गाडीमा जान्छन् । सुरक्षा र सहयोगका लागि नेपाल प्रहरी र सशस्त्र प्रहरीले नौरथ सुरु भएसँगै थप जनशक्ति परिचालन गरेको छ ।


स्वास्थ्यका लागि माथिल्लो फेदीमा स्वास्थ्यकर्मीको टिम छ । तल्लो फेदीदेखि माथिल्लो फेदीसम्म बाक्लैगरी होटल तथा लज रहेकाले यात्रीलाई खानबस्नको समस्या नरहेको होटल व्यवसायी इन्द्रनारायण भट्टराई बताउँछन् । प्रशासनले होटलमा रेट बाहिरै टाँस्न लगाएको छ ।


प्राकृतिक सुन्दरता र जैविक विविधताको भण्डार यो क्षेत्रमा शोधकर्ता र पर्यटनमा रमाउनेहरू पनि आउने गरेका छन् । दुर्लभ रेडपाण्डाको प्रमुख बासस्थान यही क्षेत्रमा हो । सुकेटारदेखि भालुगौंडेसम्मको क्षेत्रलाई रेडपाण्डा संरक्षण क्षेत्रका रूपमा लिइएको छ ।


मौसम खुल्दा मन्दिर परिसरवाट ताप्लेजुङमै रहेका ७ हजार मिटर माथिका ११ वटा हिमाल देख्न सकिन्छ । विश्वको तेस्रो अग्लो हिमाल कञ्चनजङ्घा (८,५८६ मिटर) संखुवासभाको मकालु (८,४६३ मि.) सहजै नियाल्न सकिन्छ तीर्थयात्रीले यिनै हिमाललाई पृष्ठभूमिमा राखेर तस्बिर खिच्ने गरेका छन् । उत्पत्तिकालदेखि नै जातजाति, भाषाभाषीको विवाद र विभेद नभएको पाथीभरा सबै जातजातिलाई जोड्ने सेतु पनि हो । त्यसैले यहाँ पूजा र दर्शनमा सबैको सहभागिता रहने गरेको छ ।


परापूर्वकालमा भेडापालकको बथान अकस्मात हराएपछि हतासिएका भेडापालकले चारै दिशामा खोजी गर्दा पनि नपाएको र सपनामा देवीको दर्शन पाएपछि पूजा गर्ने चलन सुरु भएको एकमात्र किंबदन्ती छ । त्यो ओडार अहिले पनि छ । तर, विकटस्थानमा भएकाले त्यहाँ जान भने प्रोत्साहित गरिदैन ।


तत्कालीन राजा वीरेन्द्र, ज्ञानेन्द्र, युवराज दिपेन्द्र, पारसदेखि राष्ट्रप्रमुख विद्यादेवी भण्डारीले दर्शन गरेको पाथीभरा नपुगेका कुनै सरकार प्रमुख नरहेको समिति पदाधिकारी बताउँछन् । विभागीय मन्त्रीहरू त पैदल हिँडेरै देवीको दर्शनका लागि आउने गरेका छन् । प्रधानमन्त्री भने हेलिकप्टरमा आएर फर्कने गरेका छन् ।


पाथीभरामा पहिला बोकापाठाको अधिक बली चढाउने गरिएको थियो । पछिल्ला वर्ष भने माना, पाथीमा भरेर सिक्का पैसा चढाउने तर बली नदिने प्रचलन बढदो छ ।

प्रकाशित : आश्विन २६, २०७५ १०:२०
ADVERTISEMENT
प्रतिक्रिया
पठाउनुहोस्

मापसे सवारी चालक परीक्षा दिँदै

देवनारायण साह

मोरङ — मादक पदार्थ सेवन गरी सवारी चलाउने १ सय ६४ जनाले जिल्ला प्रहरी कार्यालय मोरङमा ट्राफिक नियमसम्बन्धी परीक्षा दिएका छन्  ।

सवारी दुर्घटना न्यूनीकरणका लागि मादक पदार्थ सेवन गरी सवारी चलाउने चालकलाई ट्राफिक नियमलगायत ऐन कानुनसम्बन्धी परीक्षा दिनुपर्ने नयाँ व्यवस्था मोरङ प्रहरीले मंगलबारदेखि जिल्लाभर लागू गरेको छ ।


जिल्लामा भएका सवारी दुर्घटनाको प्रमुख कारण मादक पदार्थ सेवन गरेर सवारी चलाउँदा भइरहेकाले मोरङ प्रहरीले नयाँ नियम लागु गरेको हो । प्रहरीले बुधबारबाट मादक पदार्थ सेवनकत्तर्त चालकको लिखित परीक्षा लिनु सुरु गरेको छ ।


जिल्लाका विभिन्न ठाउँमा चेकजाँच गर्ने क्रममा मंगलबार ८८ र बुधबार ७६ जनाले मादक पदार्थ सेवन गरी सवारी चलाएको ट्राफिक प्रहरीले फेला पारेको थियो । मादक पदार्थ सेवनकर्ता चालकको कागज पत्र नियन्त्रणमा लिई प्रहरी कोड नम्बर लेखेको चिट थमाएका थिए र चालकका आफन्तलाई बोलाएर सबारी जिम्मा लगाइएको प्रहरी उपरीक्षक मनोजकुमार केसीले बताए ।


‘बुधबार सम्पन्न भएको पहिलो दिनको परीक्षामा ८८ जनामध्ये १५ जनामात्रै उत्तीर्ण भए,’ उनले भने, ‘उत्तीर्ण भएको प्रमाण पत्र प्रदान गरेर ट्राफिक ऐनअनुसारको कारबाही गरी चालक अनुमति पत्रलगायतको कागजातका लागि जिल्ला ट्राफिक प्रहरीमा पठाइएको छ ।’ अनुत्तीर्ण हुनेहरूले पुन: परीक्षा दिएर पास गरेपछि मात्रै कागजात पाउने उनले बताए ।


केसीका अनुसार बिहीबार भएको परीक्षामा २३ जना उत्तीर्ण भएको छ । परीक्षामा सोधिएका ८० वटा प्रश्नमध्ये ६४ वटाको सही जवाफ मादक पदार्थ सेवनकर्ता चालकलाई दिनुपर्ने व्यवस्था गरिएको छ । ६४ वटाको जवाफ नदिनेलाई पुन: परीक्षा दिनुपर्ने व्यवस्था गरिएको केसीले सुनाए ।


‘चाँडपर्व सुरक्षा योजनाअन्तर्गत दुर्घटना न्यूनीकरणका लागि ल्याएको नयाँ नियमलाई निरन्तरता दिन्छौं,’ उनले भने, ‘मादक पदार्थ सेवन गरेर सवारी चलाउने चालकले घरै बसेर मोबाइलबाटै अनलाइन परीक्षासमेत दिन पाउने सुविधाका लागि प्रविधिको विकास गरेका छौं ।’

मोबाइलबाट अनलाइन परीक्षा दिनका लागि जिल्ला प्रहरी कार्यालय मोरङको वेबसाइटमा गएर क्लिक गरेपछि प्रहरीले दिएको चिट नम्बर माग्छ र त्यो नम्बर लेखेपछि सफटवेयर खुल्ने उनले बताए । सफटवेयर खुल्ने बित्तिकै अटो भिडियो रेकर्ड सुरु हुने व्यवस्था रहेकाले परीक्षामा अरूले सघाउन र चोरी गरेर जवाफ दिनसमेत नपाउने केसीले बताए ।


केसीले सफ्टवेयरमा प्रवेश गरेपछि पहिलो पटक १५ देखि २० वटा प्रश्न आउँछ र त्यसको जवाफ दिएपछि पून: अर्को २० वटा प्रश्नको सेट आउने बताए । उक्त परीक्षामा पास भएपछि जरिवानालगायतका कानुनी कारबाही सुरु हुने र सवारी चालक अनुमति पत्र र सवारीको कागजात प्राप्त गर्न सकिने व्यवस्था गरेकाले मादक पदार्थ सेवन नगरी सवारी चलाउन उनले सबैलाई आग्रह गरे । ‘बढ्दो सवारी दुर्घटना नियन्त्रणका लागि मोरङ प्रहरीको यो नयाँ प्रयास हो,’ केसीले भने, ‘यसअघि मादक पदार्थ सेवन गर्ने सवारी चालकलाई जरिवाना तिराएर ट्राफिक नियम बारे जानकारीमूलक कक्षा दिएर छाड्ने गरेका थियौं तर त्यसले दुर्घटनाको संख्यामा न्यूनीकरण नआएपछि नययाँ व्यवस्था गरेका हौं ।’


यसअघि पहुँचवाला मादक पदार्थ सेवन गरी सवारी चलाउनेले भनसुन गराएर छुट्ने गरेको थियो तर अब डयुटीमा खटेका प्रहरीले मादक पदार्थ सेवन गरेको थाहा पाउने प्रहरीको मोबाइल एपबाट फोटो खिच्ने व्यवस्था गरेको उनले बताए । एपमा फोटो आइसकेपछि कसैको पनि भनसुन काम नलाग्ने केसीको भनाई छ । साउनयता मात्रै मोरङमा एक सय ७१ वटा सवारी दुर्घटना भएका छन् । ८० प्रतिशत दुर्घटना मादक पदार्थ सेवन गरेर सवारी चलाउँदा भएको उनले बताए । दुर्घटनामा परेर साउन यता मोरङमा १७ जनाको मृत्यु भएको छ ।

प्रकाशित : आश्विन २६, २०७५ १०:१८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT