मोटरसाइकल दुर्घटनामा एकको मृत्यु, दुई घाइते
दमक — मोटरसाइकल दुर्घटना हुँदा आइतबार राति झापाको भद्रपुरमा एक युवकको मृत्यु भएको छ । अन्य दुई युवक घाइते भएका छन् ।
राति पौने २ बजे भद्रपुर नगरपालिका–४ झिलमिलिया पुल नजिकै दुर्घटना भएको जिल्ला प्रहरी कार्यालयका डीएसपी महेन्द्रकुमार श्रेष्ठले जानकारी दिए । श्रेष्ठका अनुसार मृत्यु हुनेमा मोटरसाइकल चालक भद्रपुर–८ का २० वर्षीय किशोर प्रधान रहेका छन् ।
दुर्घटनामा परी मोटरसाइकलको पछाडि सवार सोही ठाउँका २० वर्षीय प्रताप तामाङ र २६ वर्षीय आशिष राई घाइते भएका हुन् । घाइते दुवै जनाको बिर्तामोडस्थित बिर्ता सिटी हस्पिटलमा उपचार भइरहेको डीएसपी श्रेष्ठले बताए ।
केचना–चारआली सडक खण्डअन्तर्गत दक्षिणबाट उत्तरतिर आउँदै गरेको मे ४ प ७७९५ नम्बरको मोटरसाइकल अनियन्त्रित भएर दुर्घटना भएको डीएसपी श्रेष्ठले बताए । दुर्घटनामा गम्भीर घाइते चालक प्रधानको भद्रपुरको ओम साई पाथीभरा हस्पिटलमा उपचारका क्रममा राति नै मृत्यु भएको थियो ।
प्रकाशित : कार्तिक २६, २०७५ ०९:२४