म्याद थपेको थप्यै

विराटनगर महानगरको मझौला सहर एकीकृत सहरी वातावरणीय परियोजनाको कामको ६ पटक म्याद थपियो 
देवनारायण साह

मोरङ — विराटनगर महानगरको मझौला सहर एकीकृत सहरी वातावरणीय परियोजनाको काम निर्धारित समयमा नसकिने भएको छ । निर्माण कम्पनीलाई ६ पटकसम्म म्याद थप्दासमेत समयमा काम नसकिने भएको हो ।

विराटनगर १४ मा निर्माणाधीन फोहोर पानी प्रशोधन केन्द्र ।तस्बिर : देवनारायण/कान्तिपुर

महानगरले परियोजनाअन्तर्गत ३ अर्ब २७ करोड रुपैयाँलागत स्टिमेटमा ३६ किलोमिटर नाला, ६२ किलोमिटर ढल, ४० दशमलव ८५३ किलोमिटर सडक र फोहोर पानी प्रशोधन केन्द्र निर्माणका लागि सिटिसिइ–कालिका जेभि काठमाडौंलाई ठेक्का दिएको छ ।

Yamaha

निर्माण कम्पनीले २ अर्ब ३९ करोडमा उक्त निर्माण कामको ठेक्का लिएको हो । सन् २०१३ डिसेम्बर २ मा ९ सय दिनभित्र सन् २०१७ मे २७ तारेखसम्ममा निर्माण काम सक्ने गरी निर्माण कम्पनीले ठेक्का सम्झौता गरेको थियो । तर महानगरले हालसम्ममा ६ पटक म्याद थप गरिसक्दा पनि समयमा काम सक्ने छाँट देखिएको छैन ।

परियोजना प्रमुख भरतकुमार न्यौपानेले अन्तिम पटक डिसेम्बर १५ सम्ममा काम सम्पन्न गर्नका लागि ४ महिना म्याद थप गरिएको बताए । उनले फोहोर पानी प्रशोधन केन्द्रको ढलमा बर्षायाममा आएको बाढीले माटो पुरेको हुँदा ४ महिनाको म्याद थप गरिएको बताए ।

जनप्रतिनिधि निर्वाचित भएर आइसकेपछि तीन पटक म्याद थप गरिसकेका छन् । निर्माण कम्पनीका परियोजना अधिकृत उज्जवल प्रसाईंले डिसेम्बर १५ सम्ममा निर्माण कम सम्पन्न गर्ने बताए । उनले मर्मत र ढलमा भरिएको माटो सफाइ गर्न अझै दुई महिना लाग्ने बताए ।

जुन कामको लागि महानगरले अन्तिम पटक ४ महिनाको म्याद थप्यो त्यही कामका लागि प्रसाईंले अझै २ महिना समय लाग्ने भनेकोले प्रशोधन केन्द्र सञ्चालनमा अझै ढिलाइ हुने देखिएको छ ।

परियोजना प्रमुख न्यौपानेले निर्माण कम्पनीले हालसम्ममा बर्षातको पानी बग्ने ढल नाला निर्माण ३६ दशमलव ६७७ किलोमिटर, सडक छेउको नाला ३५ किलोमिटर, सडक निर्माण ४० दशमलव ८५३ किलोमिटर निर्माण सकिएको बताए । ४३ दशमलव २ सय ६२ किलोमिटर ढल प्रणाली निर्माणमा १ सय ९ मिटर निर्माण गर्न बाँकी छ ।

महानगरले ९ हेक्टर जग्गा खरिद गरेर विराटनगर १४ स्थित सिंघिया खोला किनारमा फोहोर पानी प्रशोधन केन्द्र निर्माण गरिरहेको छ । फोहोर पानी प्रशोधन केन्द्रको १ प्रतिशत काम मात्रै बाँकी रहेकाले १५ डिसेम्बरसम्ममा सक्नेमा विश्वस्त रहेको उनले बताए । निर्माण काम सकिएपछि निर्माण कम्पनीले एक वर्षसम्म प्रशोधन केन्द्र सञ्चालन गर्नुपर्ने र त्यस क्रममा देखिएका समस्याहरू समाधान गर्नुपर्ने सर्त रहेको न्यौपानेको भनाइ छ ।

निर्माण काम सकिएकोले समयमा नै काम सकिएको उनको दावी छ । उनले ढलभित्रको माटो सफाई र मर्मतको काम पछि पछि पनि चल्दै गर्ने बताए । पटक पटक म्याद थप्ने र ४ पटकसम्म भेरिएसन दिएका न्यौपानेले निर्माण कम्पनीलाई बढाबा दिइरहेको महानगर प्रमुखमा पराजित उमेश यादवले बताए ।

‘म्याद थप र भेरिएसनको बहानामा कमिसन खाँदै आएकै कारण निर्माण कम्पनीलाई न्यौपानेले छुट दिँदै आएको हो,’ उनले भने, ‘महानगर प्रमुख भीम पराजुली पनि निर्वाचित भएर आइसकेपछि तीन पटक म्याद थपेर कमिसनमा नै डुबेकोले यस्तो अवस्था छ ।’

निर्माण कम्पनीलाई पटक पटक म्याद थप र भेरिएसन दिँदै परियोजनाको लागत बढेको छ । निर्माण कम्पनीले हालसम्म ३ अर्ब ९ करोड ७ लाख २६ हजार भुक्तानी लिइसकेका छन् । प्रसाईंका अनुसार अझै ४ करोडभन्दा बढी भुक्तानी लिन बाँकी रहेको बताए ।

महानगर प्रमुख भीम पराजुलीले निर्माण कम्पनीलाई अन्तिम पटकको लागि म्याद थपिएको र अब पून: म्याद थप्ने अबस्था नरहेको बताए । ‘निर्माण कम्पनीले १५ डिसेम्बरभित्र निर्माण काम सम्पन्न गरेर फोहोर पानी प्रशोधन केन्द्र सञ्चालन हुने अबस्थामा महानगरलाई दिनुपर्ने हो,’ उनले भने ।

निर्माण कम्पनीले प्रशोधन केन्द्र सञ्चालन हुने अवस्थामा १५ डिसेम्बरमा हस्तान्तरण नगरेको अवस्थामा के गर्नेबारे प्रमुख पराजुली नाजवाफ बने ।

प्रकाशित : मंसिर २०, २०७५ १०:३६
ADVERTISEMENT
प्रतिक्रिया
पठाउनुहोस्
ADVERTISEMENT

पाथीभरामा थुप्रियो सिक्का

आनन्द गौतम

ताप्लेजुङ — प्रसिद्ध धार्मिक स्थल पाथीभरामा ठुलो परिमाणमा सिक्का पैसा थुप्रिएको छ । हाल ७० क्विण्टलभन्दा बढी सिक्का थुप्रिएको पाथीभरा भेट व्यवस्थापन समितिले जनाएको छ ।

गत वर्ष यतिनै परिमाणमा सिक्का साटिएको थियो । एक वर्षमा भक्तजनले चढाएको सिक्का पाथीभरा मन्दिर परिसरको गोदाममा राखिएको छ ।

समितिका सदस्य सचिव उदय भट्टराइले कम्तीमा पनि ७० क्विण्टल भएको वताए । तिर्थयात्रीले चढाएको सिक्का माथिल्लो फेदीको कान्छिथानदेखि मन्दीर परिसरसम्मको संकलन गरिन्छ । पाथीभरामा बली चढाउने प्रथा कम भएसँगै सिक्का चढाउने चलन बढेको छ ।

बलिको साटो तीर्थयात्रीले पाथी, माना, मुठी चढाउने गरेका छन् । पाथीभराका कर्मचारी राजेन्द्र महतका अनुसार गत वर्षसम्म सिजनको समयमा एक दिनमा १४ पाथीसम्म सिक्का हुन्थ्यो । यो वर्ष बढेको छ ।

बडादसैं र चैते दसैंको समयलाईपाथीभराको सिजनको रूपमा लिइन्छ । यो वर्ष गत असोजमा एकै जनाले १६ पाथी चढाएका थिए । एक पाथीमा करिब २२ किलो हुन्छ । दर्शनार्थीको भिड हुने सिजनमा दैनिक दुई क्विन्टल बढी सिक्का जम्मा हुने कर्मचारीराजेन्द्र महत बताउँछन् ।

मौसम राम्रो हुँदा रामनवमी पर्वको समय फागुनदेखि वैशाख र दसैंको सिजन असोजदेखि मध्य मंसिरसम्मै भिड लाग्छ । सिक्का पैसा लिएर जानेले काफ्ले पार्टीदेखि नै चढाउने गरेका छन् । पाथीभरामा पाथीले भरेर चढाए राम्रो हुने विश्वास पछिल्ला दिन बढ्दै गएको छ ।

पाथीले चढाएपछि मानो र मुठीले पनि चढाउने भक्तजन धेरै हुने मन्दिरका पुजारी डिल्लीआचार्य बताउँछन् । नोट गणना भइसकेकाले अव सिक्का ल्याएर गणना गर्ने भट्टराईले बताए । सिक्का भने बोरामा लगाएर काफ्ले पार्टीसम्म बोकेर ल्याउनुपर्छ ।

त्यसपछि गाडीमा ल्याइन्छ । गहुँगो र एक जनाले २५/३० किलोभन्दा बोक्न कठिन हुने भएकाले ल्याउन समय लाग्ने भट्टराई बताउँछन् । मन्दिरमा चढाएको सिक्कामा माटो, अक्षता लाग्ने भएकाले यसलाई धोएर टल्काएपछि मात्रै बैंकले लिने गरेका छन् ।

सफा सिक्काको तौलको आधारमा नोट सटही हुन्छ । एक रुपैयाँको सिक्काको तौल चार र दुई रुपैयाँको पाँच ग्राम तौल हुन्छ । सुकिलो सिक्का भए ४ किलोको एक हजार रुपैयाँ हुन्छ ।

गनिरहन झन्झट हुने भएकाले सिक्का सटही गर्नेले यसरी नै हिसाब कारोबार गर्ने बैंकले जनाएका छन् । भिज्न र माटोमा पर्न नदिई राखे सिक्का नबिग्रने बैंकको दाबी छ । बैंकले खोट लागेको पैसा भने नलिएको पाथीभरा संरक्षण समितिका नविन निरौला बताउँछन् ।

गत वर्ष झापा दमकको कन्काई बैंकले धुने, टल्काउनेसमेत जिम्मा लिएर सिक्का लगेको थियो । राष्ट्र बैंकले माटो लागेको सिक्का रिट्ठाको धुलो, सरफ पानीले धोएर धानको ढुटोले सफा गर्न सुझाउने गरेको छ ।

प्रकाशित : मंसिर २०, २०७५ १०:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT