दुर्गममा थपिँदै टेम्पो
भोजपुर — केही महिनाअघि भित्रिएको टेम्पोमा स्थानीय बासिन्दाको आकर्षण बढेको छ । जिल्लाका ग्रामीण भेगमा टेम्पो आएसँगै स्थानीय बासिन्दा टेम्पो चढ्न तँछाडमँछाड गर्न थालेका छन् ।
उत्तरी व्यापारिक केन्द्र दिंलामा टेम्पो सञ्चालन सुरू भइसकेको छ । संखुवासभा र भोजपुर जोड्ने लम्सुवाघाटमा पक्की पुल नहुँदा डुुङ्गाबाट तारेर टेम्पोलाई दिङ्ला बजार ल्याई सञ्चालन सुरु भएको हो ।
यसअघि भोजपुरको प्याउली, भोजपुर, सिम्ले, घोरेटार लगायतका रूटमा दर्जनभन्दा बढी टेम्पो सञ्चालनमा छन् । टेम्पाले दिंला आसपासका रूटमा सतिघाट, लम्स्वा, केराबारि, बैदारभञ्ज्याङ, चिउरिबोटे लगायतका स्थानसम्म यात्रु र सामान ओसारपसार गर्ने गर्छन् । सुरुवाती अवस्था भए पनि यात्रुको ओइरो लाग्ने गरेको र रिजर्भ भाडामा राम्रो फाइदा हुने गरेको व्यवसायी बताउँछन् ।
चार जनासम्म यात्रु अटाउने टेम्पोले दैनिक ५ हजारसम्म आम्दानी हुने भएपछि धरानबाट आएर दिंलामा टेम्पो चलाइरहेको चालक हेम तामाङले बताए । कच्ची सडक भएका कारण १२ महिनौ टेम्पो चल्न नसक्ने र मरितरि आठ महिना मात्र टेम्पो सञ्चालन हुन सक्ने तामाङले बताए । ग्रामीण भेगमा टेम्पोले लिने भाडादर ट्याक्सी र बसभन्दा दोब्बर भए पनि स्थानीय बासिन्दाहरू आनाकानी नै नगरी टेम्पो चढ्न लालयित हुने गरेको टेम्पो चालक बिनोद विश्वकर्माले बताए ।
दिंला लगायत आसपासका क्षेत्रमा सेवाग्राहीलाई ओसारपसार गर्न भ्याइनभ्याइ हुन थालेको उनले बताए । टेम्पो सञ्चालन सुरु भएपछि आसपासका क्षेत्रमा जान सहज भएको स्थानीय कल्पना श्रेष्ठले बताइन् । भनेको समयमा आफूले चाहेअनुसारको स्थानमा छोटो दूरीको यात्रा गर्न आनन्द र सहज हुने उनेको भनाइ छ ।
प्रकाशित : पुस २८, २०७५ ०८:५३
