९० वर्षमा आदर्श विद्यालय

विद्यालयले २८ माघमा ९० औं वार्षिकोत्सव तथा अभिभावक भेला गर्दैछ
कान्तिपुर संवाददाता

विराटनगर — विराटनगर ७ स्थित आदर्श माध्यमिक विद्यालयले ९० औं वार्षिकोत्सव मनाइरहेको छ । यो काठमाडौंको दरबार हाई स्कुलपछिको मुलुककै दोस्रो ठूलो विद्यालय हो । 

विद्यालयको आकर्षक भवन, कक्षापिच्छै प्रोजेक्टर, सीसीटीभी क्यामेरा, तालिमप्राप्त उत्कृष्ट विषय शिक्षक, विशाल चौर, सुन्दर फूलबारी, पुस्तकालय, थुप्रै प्रयोगशाला छन् । पूर्वप्रधानमन्त्रीहरू गिरिजाप्रसाद कोइराला, नगेन्द्रप्रसाद रिजाल, सूर्यबहादुर थापा र मनमोहन अधिकारीले पनि यसै विद्यालयमा पढेको बताइन्छ ।

१ बिघा १७ कठ्ठा ३ धुर जग्गामा फैलिएको यो विद्यालयमा अहिले १ हजार ९ सय ३७ छात्रछात्रा अध्ययनरत छन् । राणा शासनविरुद्ध आन्दोलनको थालनी गर्ने स्वर्गीय कृष्णप्रसाद कोइरालाले केही विद्यार्थी भेला पारेर १९८६ सालमा यो विद्यालय स्थापना गरेका थिए । पूर्वाञ्चलको १६ वटै जिल्लाका बालबालिका पढ्ने आदर्श विद्यालयले २८ माघमा ९० औं वार्षिकोत्सव तथा अभिभावक भेला गर्दैछ । ‘९० बसन्त पार गरेको अवसरमा अहिले साता व्यापी शैक्षिक, सांस्कृतिक र खेलकुदसम्बन्धी प्रतियोगिता एवं वार्षिकोत्सवको तयारीमा व्यस्त छौं,’ उक्त विद्यालयका प्राचार्य ५५ वर्षीय तुलसीप्रसाद दुलालले भने ।
महानगरकै सबैभन्दा पुरानो उक्त विद्यालयमा १० हजार ३ सय ८६ पुस्तक, ६२ कम्प्युटर, ४६ ल्यापटप, स्मार्ट बोर्ड र गीत एवं कार्टुन चित्रमार्फत पढाउन ४३ बालबालिका भएको शिशु कक्षामा ४० इन्चको एलसीडी टीभी छ ।

विज्ञान, व्यवस्थापन र शिक्षा संकायका सबै विषयबाहेक उक्त विद्यालयमा विहानी पख ऐच्छिक कम्प्युटर, तीन वर्षे डिप्लोमा इन कम्प्युटर इन्जिनियरिङ (डीकम), डिप्लोमा इन सिभिल इन्जिनियरिङ, १८ महिने प्राविधिक एसएलसीको पढाइ हुन्छ । निजी विद्यालयको दाँजोमा सस्तो शुल्कमा यहाँ प्राविधिक विषयको पढाइ गराइन्छ । एसईई उत्तीर्ण भएकाको हकमा सहुलियत शुल्क एवं छात्रवृत्तिमा विद्यालयले प्राविधिक विषय पढाउने प्रबन्ध मिलाएको प्राचार्य दुलाले बताए ।

प्रकाशित : माघ २७, २०७५ ०९:२१
प्रतिक्रिया
पठाउनुहोस्

राष्ट्रिय सहिद घोषणा परिवारले पाएनन् राहत

कान्तिपुर संवाददाता

धनकुटा — छिन्ताङ काण्डमा हत्या गरिएकालाई सरकारले गत वर्ष राष्ट्रिय सहिद घोषणा गरे पनि प्रभावित परिवारलाई हालसम्म कुनै सुविधा उपलब्ध गराइएको छैन । २०३६ सालमा भएको छिन्ताङ काण्डमा मारिएका १६ जनालाई सरकारले १३ महिनाअघि राष्ट्रिय सहिद घोषणा गरेको हो ।

सहिद भीमनारायण श्रेष्ठ र क्याप्टेन यज्ञबहादुर थापाको सम्झनामा धनकुटामा शनिबार आयोजित स्मृतिसभामा सहिद पत्नी लक्ष्मी श्रेष्ठले भीमनाराणको सालिकमा माल्यार्पण गर्दै ।तस्बिर : रमेशचन्द्र/कान्तिपुर

राज्यले राष्ट्रिय रूपमा सम्मान गरे पनि त्यसबापत दिइनुपर्ने कुनै सुविधा हालसम्म उपलब्ध नगराएको छिन्ताङ सहिद सरोकार समाजका अध्यक्षसमेत रहेका सहिद पुत्र बलराम राईले बताए ।

‘राज्यले वर्षाैंपछि सम्मान गरे पनि त्यसबापत दिइनुपर्ने सुविधा उपलब्ध नगराइनुले दु:ख लागेको छ,’ सहिद पुत्र बलरामले भने, ‘चार दशकसम्मको पर्खाइमा राज्यले सम्बोधन गरेको खबरले खुसी तुल्याए पनि सुविधा नदिइनुले अचम्म लागेको छ ।’

पञ्चायती शासनको विरोध गर्दै वामपन्थी गुटमा लागेको भन्दै तत्कालीन सरकारले छिन्ताङ, आँखिसल्ला तथा खोकुका १६ स्थानीयको हत्या गरेको थियो । उक्त घटना छिन्ताङ हत्या काण्डका रूपमा इतिहासमा चर्चित छ । घटना भएको झन्डै चार दशकपछि राष्ट्रिय सहिद घोषणा गरिएको थियो ।

राज्यले सयौंलाई सहिदको घोषणा गरे पनि छिन्ताङ काण्डका सहिद र उसका परिवारलाई उपेक्षा गरिएको अर्का सहिदपुत्र योगेन्द्र राईले बताए । ‘यदि राज्य गम्भीर हो भने सहिदको नाममा गरिएको निर्णय किन कार्यान्वयन नभएको ?’ उनले भने, ‘घोषणामा मात्र सीमित बनाइएको छ ।’

४० वर्षसम्म राज्यले उपेक्षा गरे पनि पछिल्लो समय अझ हल्लामा मात्र सीमित पारेर आफूहरूलाई भ्रममा पारेको सहिद स्मृति प्रतिष्ठानका अध्यक्ष रुपलाल राईले बताए । छिन्ताङमा हत्या गरिनेमध्ये अधिकांशले तत्कालीन शासकका विरुद्धमा भूमिगत शैलीमा संगठन विस्तार गर्दै रहेको अवस्थामा घटना भएको थियो ।

सहिद भीमनारायण र यज्ञबहादुरको स्मृति पञ्चायतकालीन शासन व्यवस्थाको विरोधमा उत्रँदा सहिद भएका भीमनारायण श्रेष्ठ र क्याप्टेन यज्ञबहादुर थापाको सम्झनामा धनकुटामा शनिबार स्मृति सभा आयोजना गरिएको छ ।

धनकुटा बजारस्थित भीमनारायण चोकमा आयोजित कार्यक्रममा सहिद श्रेष्ठ पत्नी लक्ष्मीले सालिकमा माल्यार्पण गरिन् । उनले देशका खातिर ज्यान अर्पण गर्ने सहिदको सपना पूरा गर्न सबै पक्षको चासो जानुपर्ने बताइन् ।

विसं.२०३० साल चैत ३ गते तत्कालीन राजा वीरेन्द्रको सवारीका क्रममा बम विष्फोट गराएको अभियोगमा भीमनारायण पक्राउ परेका थिए । यस्तै, २०३१ मंसिर अन्तिम साता कांग्रेसले ओखलढुंगा कब्जा गर्न गठन गरेको सशस्त्र फौजका कमाण्डर क्याप्टेन थापालाई टिम्बुरबोटेमा पक्राउ गरिएको थियो ।

राज्यद्रोहको अभियोग लागेका श्रेष्ठ र थापालाई तत्कालीन पञ्चायत सरकारले काठमाडौंको गोलघरमा कठोर कारावास सजाय दियो । दुवैलाई २०३५ साल माघ २६ गते गोली हानी फाँसी दिएको थियो । श्रेष्ठको शव कोसी नदी किनार र कप्तान थापाको शव कमला नदीका किनारबाट परिवारलाई जिम्मा दिइएको थियो ।

सहिद भीमनारायण श्रेष्ठ स्मृति प्रतिष्ठानको आयोजनामा आयोजित कार्यक्रममा सहिद पुत्र मनोजनारायण, १ नं.प्रदेश सांसद लीला सुब्बा, आयोजक संस्था प्रतिष्ठानका अध्यक्ष पुरेन्द्रलाल श्रेष्ठ, कांग्रेस उपसभापति नविनकिशोर शाक्य, शिक्षक संघ १ नं.प्रदेश उपाध्यक्ष गंगा ढुंगाना, सहिद स्मृति प्रतिष्ठानका महासचिव विजयसन्तोषी राई लगायतले सहिदको योगदानबारे चर्चा गरे ।

धनकुटा घर भएका श्रेष्ठले जिल्लाबाट कांग्रेसको राजनीतिमा भूमिगत रूपमा सक्रिय थिए । त्यस्तै, जागिरको सिलसिलामा धनकुटा पुगेका थापाले जिल्लामा राजनीतिको सुरुवात गरेका थिए । दुवैलाई नेपाल सरकारले २०७२ सालमा राष्ट्रिय सहिदको सम्मान गरिसकेको छ ।

प्रकाशित : माघ २७, २०७५ ०९:१९
पूरा पढ्नुहोस्
प्रतिक्रिया
पठाउनुहोस्