पूर्वाञ्चल बहिरा विद्यालयमा डेढ करोडको छात्रावास निर्माण

कान्तिपुर संवाददाता

सुनसरी — कान नसुन्ने बहिरा विद्यार्थीले सांकेतिक भाषाको माध्यमबाट पढ्ने पूर्वको एकमात्र शैक्षिक संस्था पूर्वाञ्चल बहिरा विद्यालयमा छात्रवास निर्माण गरिएको छ । दाताहरूको सहयोगमा करिब एक करोड ५० लाख खर्चिएर छात्रावास निर्माण गरिएको हो । 

विद्यालयका प्रधानाध्यापक रेनुका बुढाथोकीका अनुसार अमेरिकाको द रोज इन्टरनेश्नल फण्ड फर चिल्ड्रेन (टिआरआइएफसी) का बोर्ड सदस्य रोज स्टेफन, त्यसका अध्यक्ष रवर्ट रोज र सदस्य जोनले सुस्त श्रवण कल्याण संघमार्फत् एकमुष्ट नगद ५९ लाख ५० हजार रुपैयाँ आर्थिक सहयोग गरेपछि त्यसले धरान–१६ जनपथमा १७ धुर जग्गा किनेर भवन निर्माण गरिएको हो। यो विद्यालयमा नि:शुल्क पठन पाठन हुन्छ।

विद्यालयले जग्गा किनेपछि शिक्षा विभागको समावेशी शिक्षा शाखाबाट प्राप्त ८३ लाख रुपैयाँले १६ कोठाको २ तलाको भवन निर्माण गरिएको हो।

विद्यालयका ५५ विद्यार्थीलाई आवासीय सुविधा भएको छात्रावासको पक्की घेरावारा, अन्य व्यवस्थाका लागि स्थानीयले आर्थिक सहयोग गरेका थिए।

विद्यालयमा हाल विभिन्न जिल्लाबाट ६९ बहिरा विद्यार्थीहरू अध्ययन गरिरहेका छन्।

प्रकाशित : माघ २९, २०७५ १४:३४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

फोहोर प्लास्टिक किन्दै इलाम नगरपालिका

रासस

फिक्कल — इलाम नगरपालिकाले प्रयोग भइसकेका फोहर प्लास्टिक खरिद गर्न थालेको छ । वातावरण स्वच्छता कायम गर्नका लागि प्लास्टिकजन्य फोहर खरिद गर्न थालेको नगरपालिकाले जनाएको छ । गत माघ १ गतेबाट प्रतिकिलो १५ रुपैयाँका दरले प्लास्टिकजन्य फोहर खरिद गर्ने व्यवस्था गरिएको इलाम नगरपालिकाका प्रमुख महेश बस्नेतले बताए ।  

प्लास्टिक खरिद गर्न माघ एक गतेबाट सुरु गरिएको भए पनि अहिलेसम्म प्लास्टिकजन्य फोहर बेच्नका लागि कोही पनि नआएको नगरपालिकाले जनाएको छ । फोहर प्लास्टिक किन्नका लागि नगरपालिकाले तुरुन्तै ठाउँ तोक्ने र प्रसारप्रचारलाई अगाडि बढाउने बताइएको छ ।

इलाम नगरपालिकाले विसं २०६७ देखि पोलिथिनको झोलामा भने प्रतिबन्ध लगाएको छ । पोलिथिन झोला भने नगरपालिकाले किन्दैन । खानेपानीको बोतल, खाद्य वस्तुको प्याकेजीङमा भएको प्लास्टिक लगायतका प्याष्टिकजन्य फोहर खरिद गर्ने भएको हो ।

इलाम नगरपालिकामा दैनिक सात टन फोहर उत्पादन हुने गरेको एक अध्ययनले देखाएको छ । तीमध्ये करिब १० प्रतिशत प्लाष्टिजन्य फोहर हुने गरेको नगर प्रमुख बस्नेतको भनाइ छ । नगरपालिकाले खरिद गरेको फोहर स्टोर गरिने र यसलाई प्रशोधन गरेर पेट्रोलियम पदार्थ वा सडक पक्की गर्नमा प्रयोग गरिने अलकत्रा बनाउने योजना नगरपालिकाको छ ।

सिसाजन्य फोहरमा भने प्रतिबन्ध लगाउने नगरपालिकाको तयारी छ । हाल नगरपालिकाले महिनाको दुई दिन मात्रै सिसाजन्य फोहर सङ्कलन गर्ने गरेको छ ।

यो पनि पढ्नुहोस्ः

प्रकाशित : माघ २९, २०७५ १४:१८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT