प्रदेश पर्यटन विधेयक–'एक स्थानीय तह एक पर्यटकीय क्षेत्र’
मोरङ — उद्योग, पर्यटन, वन तथा वातावरण मन्त्रालयले बिहीबार प्रदेशसभामा प्रदेश पर्यटन विकास विधेयक प्रस्तुत गरेको छ । विधेयकमा ‘एक स्थानीय तह एक पर्यटकीय क्षेत्र’ को प्रस्ताव गरिएको छ ।
प्रदेश सरकारले कुनै एक स्थानीय तहको कुनै पनि स्थान वा एकभन्दा बढी स्थानीय तहका खास क्षेत्रलाई पर्यटकीय क्षेत्र घोषणा गर्न सक्ने विधेयकमा उल्लेख छ ।
विधेयकको दफा ३७ मा पर्यटकीय क्षेत्र र स्वदेशी तथा विदेशी पर्यटकको सुरक्षाका लागि प्रदेश सरकारले पर्यटक प्रहरीको व्यवस्था गर्ने उल्लेख छ । होमस्टे सञ्चालन गर्नेले अनुमति लिनुपर्ने व्यवस्था छ । ६ परिच्छेद र ४१ वटा धारा रहेको विधेयकको परिच्छेद ३ मा होमस्टे दर्ता र सञ्चालनबारे उल्लेख छ ।
होमस्टे व्यक्तिगत र संस्थागत दुवै तरिकाले सञ्चालन गर्न पाउने प्रस्ताव गरिएको छ । परिच्छेद ५ को धारा २७ मा जलयात्रासम्बन्धी व्यवस्था छ । प्रदेश सरकारले तोकेका नदीमा जलयात्रासम्बन्धी व्यवसाय गर्न चाहनेले मन्त्रालयबाट अनुमति लिनुपर्ने भनिएको छ ।
दफा २८ मा पाराग्लाइडिङ, जंगल सफारी, क्याम्पिङ, हाइकिङ, बर्ड वाचिङ, स्काइङलगायत तोकिएका अन्य पर्यटन व्यवसाय गर्न प्रदेश सरकारले अनुमति दिने व्यवस्था छ ।
विधेयकले पर्यटकले ल्याएका मालसामान खरिद, बिक्रीमा प्रतिबन्ध लगाउने व्यवस्था गरेको छ । परिच्छेद ६ को धारा २९ मा प्रदेश सरकारले सूचना प्रकाशित गरी तोकिएको मालसामान कुनै पर्यटकले प्रदेशभिक्र ल्याई बित्री, दानदातव्य वा अरू कुनै प्रकारबाट हक छाडिदिन नपाउने गरी आदेश जारी गर्न सक्ने उल्लेख छ ।
मन्त्रालयबाट इजाजत लिएर पथप्रदर्शकको काम गर्न पाउने व्यवस्था गरिएको छ । परिच्छेद ४ को दफा १९ मा पर्यटकीय स्थानका लागि पथप्रदर्शकको काम गर्न चाहने व्यक्तिले तोकिएबमोजिमको इजाजतपत्र लिनुपर्ने व्यवस्था छ । तीन वर्षमा उक्त इजाजतपत्र नवीकरण गराउनुपर्नेछ ।
इजाजत नलिई पथप्रदर्शकको काम गरे २५ हजार जरिवाना र दुई वर्षसम्म पथप्रदर्शकको काममा प्रतिबन्ध लगाउने प्रस्ताव छ । इजाजतपत्र नवीकरण नगरी काम गर्नेलाई २५ हजार जरिवाना र १ वर्ष प्रतिबन्ध लगाउने व्यवस्था छ ।
प्रदेशमा पर्यटकस्तरको होटल, लज, रेस्टुरेन्ट, रिसोर्ट तथा बार सञ्चालन गर्न पाउने व्यवस्था विधेयकमा गरिएको छ । परिच्छेद ३ को धारा १२ मा उक्त व्यवस्था छ । होटल, लज, रेस्टुरेन्ट, रिसोर्ट तथा बारको स्तर निर्धारण गर्नेसमेत व्यवस्था गरिएको छ । होटल, लज, रेस्टुरेन्ट, रिसोर्ट तथा बार सञ्चालकले दर वा मूल्यको सूचना मन्त्रालयमा दिनुका साथै सार्वजनिक गर्नुपर्ने उल्लेख छ ।
परिच्छेद २ को दफा ३ मा ट्राभल तथा ट्रेकिङ एजेन्सीको काम गर्न इजाजतपत्र लिनुपर्ने व्यवस्था गरिएको छ । दफा ४ मा ट्राभल र ट्रेकिङ एजेन्सीको वर्गीकरण गर्ने व्यवस्था छ । सेवा दिएबापतको शुल्कबारे मन्त्रालयलाई जानकारी गराउनुपर्ने व्यवस्था गरिएको छ । एजेन्सीले पर्यटकलाई सेवा उपलब्ध गराएबापतको शुल्क संघीय सरकारले तोकेको परिवर्त्य विदेशी मुद्रामा बिल भुक्तानी गर्नुपर्ने विधेयकमा उल्लेख छ ।
इजाजत नलिई ट्राभल र ट्रेकिङ एजेन्सीको काम गर्नेलाई २५ हजार जरिवानाको व्यवस्था गरिएको छ । विधेयकअनुसारको पर्यटन व्यवसाय गर्ने व्यक्ति वा फर्मले प्रदेश सरकारलाई प्रतिवेदन बुझाउनुपर्ने विधेयकमा उल्लेख छ ।
पर्यटन व्यवसायका लागि लिएको इजाजतपत्र अरूलाई सञ्चालन गर्न दिन विधेयकले निषेध गरेको छ । उद्योग, पर्यटन, वन तथा वातावरणमन्त्री जगदीशप्रसाद कुसियतले प्रस्तुत गरेको उक्त विधेयक बिहीबार नै सभाले पारित गरेको छ ।
प्रकाशित : फाल्गुन १०, २०७५ ०९:१८